Hruaitu Vanapa kan ngai – Zikpuii pa

HRUAITU VANAPA KAN NGAI
Phuahtu – Zikpuii pa / KC Lalvunga

Aw, nang Vanapa kan ngai che,
Lo leng leh la Zoram sual thim takah hian,
Remna tlangpui tlawmngaihna i rem sa kha,
Seifa thinlung sakah hian han tinung leh ang che.

Tlawmngaihna siam liantu Zofa
Buaina karah hnutiang kan thlir let changin,
Zan thim liam tur zingṭian si-ar eng mawi iangin,
Pi pu lenkawl thim riai karah nang zawng i eng e.

Aw thlir teh mihring thinlung hi,
Seifa lenna lentu ram nuam kan tih kha,
Mahni hmasialna thinlung chuan a luah zo ta,
Chapo, uanna, itsikna leh duhamna nen hian.

Aia u zawk zahna a bo,
Ka dawn thiam lo laituala chaite chen hian,
Chapo uanna chhingmit chauh chu em ni kan hmuh,
Sawrkar milian, hruaitu, sumdawng thlang kawrvai tawnan.

Sum tin in dawng in uang zo ta,
Pawisa dere chenin in phut riang tawnan,
Lersia ro dar in khum, Liando in hnawl a maw?
Hnawl zel ang che Vaipui chhuangin rulpui chhunrawlah.

Ningzu kan dawn, kan dawn thiam lo,
Chun zua ṭahna a ni kei zawng val ṭha hi.
Hmanah vangkhaw pumpui humtu a-ngur uanna,
Tunah a chang phurrit Zoram sang tur tihniamtu.

Tlawmngaihaa piallung chu kan pel
Chirhdup rahka hmangin kan zuan zalenna,
Hei zawng zaleng rual hian Krista chu khual tum ngeiin,
Pawl tin an lian, rilru a phir, inerna hnar chu.

Ṭhuro nun mawi Aw Vanapa,
Dikna hriamhrei tlawmngaihna han hum lutin,
Krista fa chuam intite hi han timualpho la,
Mahni angin ṭhenrualte tih thu han hrilh leh rawh.

Zoram chul tur tivul furin,
Thuhnuairawlh leh tlawmngaiin lo lut leh la,
Aw vangkhaw leng zawng humtu Vanapa, ka hmuak
Nang che dailungrawnah, vaipui ngur hnehin.

Leave a Reply

Your email address will not be published. Required fields are marked *

error: Content is protected !!