HMING DANG ZAWNG ZAWNG AIIN A MAWI BER LAL ISUA –  Suakliana.
(A constructive critisism)

-K. Zalawma

1.Hming dang zawng zawng aiin a mawi ber Lalsu-a,
Sual zing ata min tlan,
En rawh, van lalhutthlengah
Ro a rel mek e.

He hla chang 1-na hian Phil 2:11b-a Krista inngaihtlawm avanga Hming zawng zawnga hming chungnung ber Pathianin a pek tak thu tlawhchhanin, Hming dang zawng zawng aia mawi ber Lal Isua – min Tlantu chuan, Van Lalṭhutthlengah ro a rel mek hi en/thlir chho turin min approach hmasa te te a.

A thunawnah, “Rinna mitin han thlir ila, Lawmna par leh a hmangaihna zam velah khian, leia lungduh zawngte hi tel kim tak ang maw?  tiin zawhna a siam ta a ni.

Suakliana hian hming dang zawng zawng aiia hming mawi ber Lal Isua hi lo hmu chiang tawh lo selang chuan hetiang hian hla a phuah miah lovang le.

2.Aw ka thlarau vakvai,
I Lal i hmu lo vem ni?
En rawh Zion fate,
Chatuan ram ropui panin
An la kal mek e.

Chang 2-naah hian Van Zion khawpui la hmu thiam ve lo thlarau vakvaite pualin, Zion fate chatuan ram ropui pana  kal mekte en turin ama thlarau ngei biain  a kawhhmuh ta thung a. Tisa mita hmuh theih loh, rinna mit/thlarau mit chauha hmuh theih a nihzia a tar lang chiang hle a ni.

3.Sual thim hian ram ropui
Leh ka Lalpa hmel a hliah,
Pialral kalna ka bo,
Thlarau min hruairawh,
Lungngaihna a fawn vel e.

Chang 3-naah hian, sual thim avanga chatuan eng hmu thei lote dinhmuna ding meka inchantirin, “Sual thim hian ram ropui leh ka Lalpa hmel a hliah,” tiin pialral kalna hmu thei lova kawng bovin, sual thim zingah chuan lungngaihna a fawn vel a, Thlarau Thianghlim chauhin a hruai chhuak thei tih hriain, hruai turin a ngen ta a ni.

Chang tin tawp zelah a thunawn hmangin, “Rinnain lawmna par leh hmangaihna zam vel” thlir turin min kawhhmuh zel a.

Rinna mita chu eng zam vel han hmuh hian, Lungduh zawngte len vena atan a itawm em avangin, an tel kim angem le tiin hringlam taksa hian a zawt reng mai a nih hi.

Tih danglama kan awm hunah chuan he zawhna chhanna hi kan hrechiang ve tawh ang chu.

Suakliana hi kum 1901-ah Maite khuaah apiang a, a pa chu Hrangkûnga Sailo a ni. Naupangte a nih laiin a mit vei lam hmawlhin a dawt a, a mit naute a chhe ta hlauh mai a, chuvang chuan a mit veilam chuan khua a hmu thei ta lo va.

Kum 1930-ah a mit ṭha lam zawk pawh chu a lo ṭha lo zui ve leh ta zel a. Chutia a mit a lo chhiat ve ve takah chuan Thlarau pawlna pawh a dawn belh lehling a. Hla ṭha tak tak a lo phuah ta hlauh thung a ni.

Suakliana hi a naupan lai aṭangin sualin a bei ṭhin a, ramhuai hovin tihhlum te tumin an tibuai a, a hlau ṭhin hle a niawm e.

Kristian a lo nih chuan ramhuaiho chuan an tibuai ngam ta lova. A nun hi thim leh sualin chim buai fo ṭhin mahse, Pathian chakna ringin a hneh zel ṭhin a ni.

Hla phuahtute hian an testimony behchhanin an phuah chang a awm a, mi dang din hmunte mahni dinhmuna inchanin, mi dang tan an phuah chang a awm bawk a; an phuah zawng zawng hi aan nihna a ni vek chuang lem lo.

Rokungan a thih dawn hnaiha –

“Sualin bo mah ila,
Tu dang ka thlang chuang lo;
Ka dam chhan ber ka lo hre lo,

Lalpa mi ngaidam rawh”  tih hla a phuah te hi mi ṭhehkhat chuan, “Rokunga hi a va piangthar tlai em!” an ti ṭhin. Mahse suala boten Lalpa an hmuha an rilru lo thar ta chanchin (Testimony) hlain a rawn puang chhuak a ni zawk.

Suakliana pawh hi a nun ram nena inhmeh takin, amah ngeiin a lo pal tlang tawh hnu, sualin a tihbuai mekte tan he hla hi ‘mahni inchanin’ a phuah niin a lang. Chuti ni lo se, “Hming dang zawng zawng aiin a mawi ber Lal Isu-a” a ti thei hauh lo vang.

Mi tam takin hla kawng bo deuh nia ngaiin sak nuam lo an ti deuh ṭhin niin a lang a, he hla hi hla thunawn “refrain” an tih ang chiin a chang khatna hi siam ni ta se, a thunawn hi a tawpah awmin a thlûk pawh ‘bridge’ an tih anga siam ni ta bawk se, Church music-in rem ta ruai ruai ila, tûna lengkhawm zai hot tak, lam hla ang deuh hiala kan ngaih style ai hi chuan a hla thuchah hi man thiam a awl deuhin ka ring. A awmzia chu – a chang tin thu chhanna hi, a chang khatna hi a ni tihna a ni.

He hla chang 3-na tlar 3-na – ‘Pialral kalna ka ‘bo’ tih laia ‘bo’ lam dan hi, kum sawm hma lam kha chuan buaina kan nei hran lem lo. Tun lai media chak tawh karah tú pa ṭawngkam thiam deuhin emaw ‘a ri hniam tûr a ni e’ tiin a rawn vawrh chhuak a, bò tih hi a dik zawk tiin hla hriltute an hneh ta zel a; inhnialna tawp thei lo a lo awm ta a ni.

Engpawhnise,  kan ram zimteah hian ṭawng thlûk dan inang lo, kan chenna hmun azira kan thlûk dan danglam a awm nual a ni tih tilangtu a ni mai awm e. Kei chuan a ri sangin – Pialral kalna ka bo tiin ka lam ṭhin.

1 thought on “Hming dang zawng zawng aiin a mawi ber Lal Isua – Constructive criticism – K. Zalawma

Leave a Reply

Your email address will not be published. Required fields are marked *

error: Content is protected !!