Hmelthatna lamtluangah

HMELTHATNA LAMTLUANGAH

“Tu maw Vanlalruati maw? Chute chu zaithiam hming alawm !.

“Ni lo ka sawi Vanlaruati chu, hmeltha chungchuang Vanlalruati, ka khawvel chhandamtu chu.”

Ani ka hmuh tirh ni atang khan khawvel hi duhawmna lam panin a inher danglam dawrh a. A changin ka hlim viau a, a mi biakna tawngkam naran mai mai pawh hisap zuiin zanlaiah te ka ngaihtuah zui vawng vawng a. A chang leh a sms rawn  thawnte chu chhiar nawnin ka fawp thul. Amah avangin college kal te a nuam thin a, amah vangin thinlaina te a dam thin a, amah avang vekin nun hi inthlahrung tak chungin ka hmang ral thin. A changin ho teah naupangchhia ang maiin ka nuar a, min thlem a tum leh tum loh ka thlir ru reng a. “A min va han thlem har tawh em! Min thlem a tum miah lo a ni ang a,” ti a ka ngaihtuah lai tak te hian min rawn bia a, inthiam lo hmel tak chung a mi melh pahin a seih zeuh a. Chutih hunlaite chuan lawm avangin mihring hi puak keh thei ni ta ila, ka puak ring thei ngawt ta ve ang.

A hmelah chuan “mawina” hi hrilhfiahin a awm a. A hmai tlang ngo tak mai karah duhawm takin a rawn meng paw riai a, chu ringawt pawh chu a that tawk tawh tehreng nen, bahsam dum hlap maiin ngil siauin a chawi zui a. A heh sen thianghlim lutukin min tihbuai tawh tehreng nen, a hnute bu han kawh lah maite chuan mit kalh lek lek a thlir rawn a hlawh a. Hmelthatna lamtluangah zahawm takin ke a pen thin. Chutiang taka hmeltha chuan kei hi mi hmangaih si. Aw ka duat ka Vanlalruat, I nu leh paten engtin nge an siam bik che a, a chawi tleitu che kutphahah chuan eng themthiamna leh malsawmna nge inphum ru bik le? Heti fakaua mawina tinreng i pumbilh bik hi! Aw, mitena khumlaizawla an suangtuah zuina che te phei hi chu puanzar ngam chi pawh a ni lo. Mahse nang chu i thianghlim si a. Chung thilte chu kei chuan hmangaihnain ka chawi nung a, hmangaihna hming zahawm tak chu chhalin ka nun hi i tan ka hlan a ni. Nang chu zuamawm miah si lovin i nelawm a. I zalna khum iangin chawi che ila, inchhuan leh chapo vangin hremhmun ka tlakpui thei hial ang.

Thianghlimna awmzia mi zawt se nang chu chhanna atan ka kawk ang che. Nang chu Biakbukah i thinlung thatna avangin i kal thin a, Pathian mite inpawlhonaah chuan i tel thin. Nang chu ringtu tha i ni tih ka hriat avangin mi vei reng theih nan i kiangah thlarau bo angin ka insawi thin a nih kha. “Ka hmelchhe si, hmangaih tlak pawh ka ni lo” ka tih lawm lawm pawn nang chuan, “I hmel chauh ka hmangaih hleinem, nangmah kha alawm ka hmangaih chu,” i ti thin. Nang chuan ka sihhnipna lai takah Setanan min bei thin tih i hriat avangin fianriala min awmpui dan tawk i thiam a. Zei tak a fawpin rinawmna thu min tiampui thin a nih kha. Nang chuan khawvel hi beiseina nen i hmang thin a. Duhthusam i hmuh famkim bik vang pawh ni lova suangtuah dan i thiam zawk avangin thil engkim hi dik takin i thlir thei a. Tanpui kan ngaih lai ber a mangang a kan rumin nang chuan min chelh a, min fawpin min thlamuan thin. Tawngtai thei lo khawp hial a thinrimna leh lungchhiatna vawrtawpin min man lai chuan nang chuan ka mamawh lai ber Bible chang leh hla min sak-sak tur i hria a. Nang chuan nawhchizuar riltam chu  ei tur i pe thin a, an mitmengah i hre si a, i khawngaih thin.  Nang chu i thiltihah i rin tlak a, nang chu i tlai ngai lo a, nang chu an entawn thin a chu i ni a. Nangmah ngei chu mirethei te nunna hnar, ka nunna hnar leh ka hmangaih chu i ni.

Lalrammuana Sailo

(He thu hi kum 2010 – 11, Pachhunga University College, Annual Magazine Buannel-ah chhuah tawh a ni)

Leave a Reply

Your email address will not be published. Required fields are marked *

error: Content is protected !!