Hmanah pi pu len lai chul hnu – Damhauhva (1909 – 1972)

HMANAH PIPU LENLAI CHUL HNU
Phuahtu – Damhauhva

1.Hmanah pipu lenlai chul hnu,
Awmhar ka dawn changin,
Suihlung ruala zamual an liam,
Tinkim ka dawn ngam lo ve;
Zaleng dawntuai sen sir siar par,
Sai ang an lo ngirna,
Dawnlung, run hmun leh
Ramloh zalam-tluang a chul zo ta e.

Ka dawn ngam lo,
Hmangaihna khua a var hmaa fam zawng chu;
Khua romei tlang kai chang sirva
Nun hlui a thar leh ta.
Kan nun thlang puan anga chul tur,
Awih lai rel ve la aw.


2.Turnipui kawl en chang khua ṭhal
Romei a zam leh ta;
Chhawl lii liai par zaleng lungkuai,
Tawn mawi sirva lawm lai chu;
Khawtlang zing riai leh leng khua mawi,
Vul lai mual an liam ṭhin;
Lentu ngirtling ṭah lai dungthultu
Leng ka ngai mang e aw.

3.Fur khaw thiang thingrihnim
Chhawl lii liai hi a mawi mang e;
Ka ṭap hmar tlang, chhimhlei, thlang len,
Chhak tiang deng zel la aw;
Chul thei lo vangkhuaa leng zawng,
Thlafam ka dawn changin,
Rairah riang chuang tinkim dawn zo hi,
Kei mi chhing thei lo ve.

Leave a Reply

Your email address will not be published. Required fields are marked *

error: Content is protected !!