Hlimna Isua – Lalsangzuali Sailo

HLIMNA ISUA
Phuahtu – Lalsangzuali Sailo (1949 – 2006)
Satu – J. Hualkunga

Pan lai ka hringnunah chuan,
Ka chun leh zua thlazar hnuaiah
Muangin ka chawl ṭhin, sen nau ang nui zain,
Eng dang reng ka dawn ngai lo.
Khuanuleng zaran lo seilianin,
Ṭhangthar nunten min hip a,
Khawvel par mawi ka tan a vul ta,
Chuai ni reng awm lo tur ang hian.

Beidawnna, manganna te,
Natna, Lusunnaten
Min hual vel chang ni te chuanin,
Hlimna tak ka hmu thei lo.
Muanna awm lo, hlimna awm lo,
Ṭah leh rumna khawvel hi.

Hringmi nunna a ral ṭhin,
Par mawi tin vul an chuai;
Chutin sum leh pai zawngte pawh,
Chatuan daih reng an awm lo.
Muanna awm lo, hlimna awm lo,
Ṭah leh rumna khawvel hi.
Lal Isua ka neih chinah
Lawmna, hlimna ka nei;
Chhandamtu Lal Isua chauh hi
Min hmangaihtu a lo ni si!

Hlimna Isua, lawmna Isua,
Khawvel pek loh thlamuanna;
Nula, tlangval, hringfa zawngten
Lalpa Isua ring rawh u.

Leave a Reply

Your email address will not be published. Required fields are marked *

error: Content is protected !!