R.L. KAMLALA CHANCHIN

R.L. Kamlala mihrinna hla leh a chhehvela thil thlengte

-Lalrammuana Sailo

R.L Kamlala chanchin tawi:

R.L Kamlala hi kum 1902 ah Ngurlen khuaah a piang a. Mautam vangin 1912 Kawnpui-ah an pem lut a. 1918-ah Kolasib ah Sikul a lut leh a, 1920 leh 1921 chhungin Aizawl M.E School-ah a lut a. Hetih lai hian 1920 ah Nisapui inkhawmpui-ah a kal ve a, tah chuan Pathian thlarauvah hlimna ropui tak a dawng a. Aizawl Thakthing venga zai khawmnaah te pawh a tel peih pawlah a ṭang zel a, Pathiana mi lungleng a lo ni zui ta a ni. Sikul aṭanga a chhuah hnu kum 1921 aṭangin hla a phuah ṭan a. 1923 May thla aṭanga 1925 thlengin Kolasib-ah zirtirtu a ni a, 1926 ah Kawnpuiah a insawn a. A thlarau chan vangin 1932-ah zirtir hna chu a bansan a. Kum 1933 ah Bualpui-ah a insawn a. a. A hla phuah run pui ber chu kum 1921 – 1930 inkar nia sawi a ni a, 1950 thlengin a phuah zeuh zeuh a (R.L Kamlala Kutchhuak, p,xxix-xxxi).

R.L Kamlala nuna thil thleng kan chhinchhiah turte zingah Nisapui leh Aizawl lama a awm laia Pathian thua hlim a nihna te, Khawserh tlang, tlang sang leh tlang thengthaw hmuna lo khawsa ṭhin a nihnate leh chuta ṭanga an pem hnu pawha Khawserh tlangah a la kal zui fo thu te, a lung tileng tur leh Vanram a ngaih tizual tura a fate a sun leh a nuna harsatna hrang hrang a tawhte chuan hla phuah mi thlarau chu a chawk nungin a hriat a ni.

RL Kamlala khuang, nghawngkawl leh amah RL Kamlala thlalak

Mihrinna hla:

R.L Kamlala hla te hi chi hnihah a ṭhen theih a; ‘Kristian Hla’ leh ‘Mihrinna hla’ tiin. Thlarau lam hla leh Pathian chawimawina lam hlate chu ‘Kristian Hla’ tiin a dah a. Chungte chu “hla serh”, Pathian-in a pek, Kamlala kaltlanga Pathianin a puanchhuah hlate an ni a. Chung hlate chu R.L Kamlala chuan Bible thu tluk bawkin a ngai thu pui a ni tih a lo sawi a (R.L Kamlala Kut Chhuak xxxiii). ‘Mihrinna Hla’ te erawh 1932 kuma thlarau lama inlarna a hmuh hnua a phuah te niin, ama ngaihtuahna aṭanga a phuah leh a inbunruahna niin a lang a, ‘Kristian Hla’ te kha chu chunglamin a pek nia a sawi laiin ‘Mihrinna Hla’ te chu “ka thinlung leh ka ka aṭanga lo chhuak” (97) tiin a sawi. Kum 1932 a thlarau lam inlarna a hmuh hnuah mi a ah ruatin man leh endawng a tawk a, thihnaten a run fo bawk a, ama chung leh a hualvela thil thlengte chu mihring taka dawnsawn chang a nei lo thei lova, “pawn lam leh chhung lam indona” (97) amaha awm zinga a pakhat zawk rilruin ‘Mihrinna Hla’ te hi a phuah niin a hriat a ni. Entirnan, Awithang tih hlaah chuan mitena an er zia leh a hming than si zia heti hian a lo phuah a.

Mi sawi an tam, mi rel an tam mang e,
Hnam tin naufa zaleng chhing tur ka ni,
Min dang zo hlei lo vang. (Chang khatna)

Heng a mihrinna hlaah te hian thupui ṭhenkhat langsar bik a awm a, chungte chu miten mi a nia an ruat avanga lung in an tan tir thute, mi a angin ngai mahsela a hmingthanna leh a ropuina chu hliahkhuh zawh rual loh tur a nih thu a puanna te, a lenna Bualpui tlang mawina te, sunna (elegy) hla hrang hrang, mitthi tawh pual te, ui thi ta pual te, lung hlum lianpui, an roh em em ‘Chawilung’ chu Khawserh tlang atanga Kolasib lama an laksawn avanga a uizia leh a rilru natzia a phuahna te leh ram leh hnam hla thupui keng te a ni.

Hlimna a chan dan:
R.L Kamlala hian 1932 kuma thlarau hlimna a chan aṭangin hlim buai hi lian tham takin vawi hnih neiin a sawi theih a. Chutih hunlaia a awm dan chu mi tam tak chuan ‘Thlarau Rui’ niin an sawi ṭhin. A hlim vawikhatna chu 1932 aṭanga a hlimna hi a ni a. Hemi kum hian Mission sikul Kawnpui-a zirtirtu hna a thawh chu a chan phah a. Mihlim vakvel ṭhin a nih avangin khaw hrang hrang fanga chhuah a nei fo a, hla phuah thiam leh mi hlim a nih avangin mi tam takin zaipuiah an lo thlahlel ve bawk a. A fanute pahnih an boral lai pawhin an khuaah a awm lo a, a vuinaah pawh a tel lo, chanchin inhrilhhriat a harsat vang a ni pakhat bawk. A hlim buai vawi hnihna hi 1938 vela lo thawk niin hemi ṭum hian lung inah hial khung a tawk a ni, amaherawhchu hlim vawi hnih a nei kan tih hian kawng danga sawi chuan a thlarau hlimna hi a khat tawkin a rawn lang chhuak leh ṭhin ang pawhin a sawi theih bawk. Kum 1939 velah Bualpui aṭangin Kawnpui-a a va kal ṭum chuan a ṭhuihhruai hmeichhia pahnih leh mipa pathum vel hian an zui a. Sikul thlang Field bulah chuan a au a, “Marona, marona” a ti vak vak a. Naupang sikul bang hlim te chuan “a a a ni’ang a” an ti hlawm a. An zirtirtu (1936-1945) Kawlbawia chuan ‘mihlim rui buai nasa a nih’ thu a sawi a. Tin, vawikhat leh chu Kawnpui khuaah chuan a ṭhuihhruaite nen an va kal ṭum chuan Sazuk ki hi a luah a chelh bet a, khuaah chuan a khum lut a ni. Zai a tui em em a, khuang hi a pu a, a zai tawh chuan a hawi chhuak ngai meuh lo niin an sawi.

Pathian fakin hlim takin leng ṭhin mahse an hlim zual lai hunte chuan reh chin a lo nei a, tin Pathian thlarau hnathawh dawngsawng thiam lo leh hrethiam lo an awm bawk a. Hlimna zai thawm chuai ri chu a hla hrang hrangah hmuh tur a awm. Tin, ‘Lei hmun tin a lo reh’ tih hla Kawnpui khuaah a phuahah pawh Pathian thlarau chu an dawnsawn thiam tawk loh thu leh Kristian nia Pathian pawlna changa an hlimna leh lawmna boruak te chu a reh tak thu kan hmu a. A hla chang hnihna leh chang thumnaah chuan:

“Van nunna kawng a reh
Hremhmun a lawm ta e
Setana lallukhum
Tunah a vul mek e (Chang hnihna).

Kan lawmna ropui ber
Par ang a chuai ta e
Aw, Kalvari Tlang Thing,
Kan nghilh che lo, lo hnai rawh (Chang thumna)

A hla pakhat ‘A vai rei lua Lalpa’ tih hla chang hnihnaah chuan,

“Nun a la dang chuang lo,
He khawvel thim hmunah
Riakmaw va ang Lalpa,
Aw, I vai rei e leiah
An la ngai thiam lo ve” (R.L Kamlala Kutchhuak 28)

tiin a lo au chhuak a.

R.L Kamlala chu kum 1933-ah Bualpui khuaah a pem a. Tlang leh mual a mawi lehzualna ram, sik leh sa boruak a nawm leh zualna ramah chuan amah pawh a lungawi khawp mai. Bualpui tih hla a phuahah chuan he khua leh tlang mawi a tihzia a chham chhuak a.

Bual khaw tlang hming a chul lawng
Hmar thim pui tlang lal ber
Serh ang an cham thlang Sappui
Tlang mawi ka ngaina che

Bawar iangin kum tluangah
Lal riang ka vai riai a
Lawmna ni lo thleng tawh rawh
Ropui ka rel nang e

Mahse chumi ramah chuan a beisei angin thil a kal vek lo tih a hla dang aṭangin a nun kan chhui chuan kan hria a, a hlaah pawh Bualpui khuaa harsatna tawn chu kan hmu bawk.

A Lung In Tan Chhan:
Thlarau ruia a awm nasat ṭum hnihnaah chuan Bualpuia Bangla hmunte chu ‘ka in’ a ti a, a luah tlat a. Chhuahtir an tum leh ṭan a lo khawh ve tlat si a. Sawrkar pawi a khawih an hlau a. Tin, zaikhawmnaah te pawh khuang pu a zai tui em em si kha, a’n tho thut a, chem a la a, mipui chungah te an vai thuak thuak a. Miin an hlau a, a bikin nunau tan phei chuan a thlamuanthlak loh a, chung avanga kawl bun tir bawk chu niin an sawi. Bualpui-a kawl an bun tir hun hi R.L Rokhuma chuan 1940 vel niin a sawi. A hlimna leh tihduhdahna a tawrh dan ziaka lo chhinchhiahtu R. Laldinsanga chuan R.L Kamlala an hrem chanchin chu heti hian a lo ziak lang a:

Pathian Thlarau a a ruih lai hian miten Pathian Thlarau ni lovin ramhuai thlarau changah an ngai tlat a. Lalin a man tir a. Thingkawltuk an bun tir a, chumai duh tawk lovin pawna chhuah pawh an phal sak lo a ni. A Lalpa angin thi ve rawh se an ti a. Kross-ah nilengin an phuar bet a, nisaah an pho a, tihel nan a hmaiahte bengin chil te an chhak khum a, silai ten kap tur angin an tinin an tihṭhaih a ni. (Past History of R.L. Kamlala 3)

RL Kamlala Kros-a an phuarna hmun. Tunah chuan Synod Compound a ni tawh

 

Heng hunlai hian Bualpui-a Kohhran leh khawtlanga mi langsarte chuan a awm dan chu hrethiam loin an phiar a, Lal Saitulera hnenah leh Bawrhsap hnenah an hek ṭhin nia sawi a ni bawk. A lungin tan hi 1938 bawr vel nia hriat a ni a, chhut dan kawng pakhat chu Kamlala lungin tan lai chuan a fanu Lalthuli chu nausen a la ni. A nuin puain Kamlal lungin tang pawh nau paw chungin Aizawl-ah a zui chho a, Lalthuli hi 1937 a piang a ni. Kamlala chu mi a nia puh ni mahse chutih hunlaia Bawrhsap A.G. McCall. I.C.S (1931-1943) chuan mi a nia a hriat loh avangin a chhuah leh vat a, hemi hnu pawh hian mi tam takin an la hlau tho. A.G. McCall-a hi kum 1937 a Kelkang harhnaa kal filawr nia a hriatte tu dai tura sipai nena thawk chhuak a, Harhnaa a bul tumtu deuh nia a hriatte lung ina khungtu a ni bawk a (Mizo Chanchin 175&176), R.L. Kamlala boruak nen pawh hian hmehbel theih viau tur a ni. Chutih hunlaia R.L Kamlala dinhmun leh a lung in tan dan chu L.L Hnema chuan heti hian a lo chhui ve bawk a, amaherawhchu L.L Hnema sawi dan anga hria erawh sawi tur an vang hle.

Hetiang dinhmuna ding a nih avang hian miten an nuih san a, an en san a ni deuh ber a ni. Chuvang chuan riangvai a inti em em a. Zanahte hian ṭhenawmte ina len luh te an tum ṭhin a, awm lo ang maiin an lo chhang duh lo ta ṭhin a. Chutiang chu mitinin an en dan chu a ni… Lung ina a luh chhan tak hi mi a, pawi khawih tum anga report a ni a, mahse sawrkarin amah an hmuhin chutiang mi niin an hre si lova, mahse hektute rilru a dam thei lo tih a hriatin amah ngeiin sawrkar pawi khawih lui ta a. Chuta a pawi khawih chu Thirhrui lu bawk a chhu chhia a, chutah chuan sawrkarin an rawn la ta a ni. Lung in a tan hnu pawhin sawrkarin a chhuah leh mai a, mahse a hektute lung a dam theih loh avangin vawi hnih lai a tang nawn leh a ni. (L.L Hnema, Kawnpui, Manuscript)

A lungin tan hlaah pawh “Bawar ianga vai reng reng a,/ Suanglungrun a lawi ta e;” tih kan hmu a, a buaina leh an ngaihtheihlohna chu nikhat thil thu mai ni lo a ni tih lan tir nan “vai reng reng” tiin a lo in sawi a ni.

R.L Kamlala leh Saitulera inkara khi awm deuh anga a lan chhan chu Fathang ineitir chungchangah a ni a. Kawnpui lal Saitulera hian a u fapa R.L Kamlala chu fathang leh sachhiah ei turin Bualpui-ah a tir phei a, mahse fathang chu a pe leh tak tak phal si lo nia sawi a awm a, K. Malsawmtluanga chuan chhiah te chu “amah ertuten Kawnpuiah an lo va pe phei zel ṭhin a ni awm e” (23) tiin a sawi bawk. Tin, Kamlala tihduhdah a nih chhan pawh an lal thu peka ti ni a ngai an awm a, an lal Saitulera chuan Kristianna kha a ngai thei lo nia rin theih a ni a, mahse 1921-ah Kawnpui lal Saitulera chuan a khuaa Biak In sak nan Rs 100 a pek thu Kohhran chanchinah ziahlan a ni. (Presbyterian Kohhran Kawnpui Hmarveng (1915 – 2015) 81). Tin, Kamlala fanu Lalthanhawli pawhin a pain Saitulera chu huatna emaw ngaimawhna emaw a neih a hriat loh thu a sawi. Tin, 1940-a Saitulera’n damlai lung a phun pawhin a lung ziah dan turah R.L Kamlala a rawn tih R.L Rokhuma chuan a sawi bawk (Khawserh Kawnpui Diary 23).

Works Cited:
Chuauṭhuama, Revd. R.L. Kamlala Kut Chhuak Second Revised Edition. Aizawl: Mizoram Publication Board, 2006. Print.

 

Lalengzauvi (Kum 95) Bualpui khaw chhuak kawmna. 5th Feb,2017. Pi Lalengzauvi hi kum 1977-1980 inkara Kawnpui Kohhran Hmeichhia Chairman a ni.

Hrangbana College Aizawl. Mizo Hla leh A phuahtute. Aizawl: Hrangbana College, 1999. Print.

Sapliana, Brig. Mizo Hla Phuahtute Leh Kei. Aizawl: Mizoram Publication Board, 1998. Print.

Laldinsanga, R. Past History of R.L. Kamlala.

Malsawmtluanga, N. Bualpui North Chanchin. T.M. Offset Printing Press, Aizawl. 2016. Print.

Rokhuma, R.L. Khawserh Kawnpui Diary. Efatha Press, Chaltlang, Aizawl. 2015. Print.

Lalmuankima, Dr. C. Kolasib Chanchin. Zochhuahtlang. Souvenir Committee on behalf of 66th YMA General Conference. 2011. Print.

Centenary Souvenir. Presbyterian Kohhran Kawnpui Hmarveng (1915 – 2015). Chhuahtlang Offset Printing, Kawnpui. 2015. Print.

R.L Manga (Manglianvunga) kawmna. Dt 11th Sept.2017 a a chenna Kolasib Hmarvenga kawmna. R.L Manga hi kum 1924-ah Kawnpuiah a piang a, 1928-ah Bualpuiah an pem lut a ni.


R.L. Rokhuma kawmna 11th Sept. 2017 Kawnpui

Liangkhaia, Rev. Mizo Chanchin, L.T.L. Publications. Aizawl: 2011. Print.

Leave a Reply

Your email address will not be published. Required fields are marked *

error: Content is protected !!