Hiroshima chunga atom bomb an thlak hma ni – Pathian venhimna mak

HIROSHIMA CHUNGA ATOMB BOMB AN THLAK HMA NI
Pathian venhimna chanchin mak tak

– J. Tsuftada, Mutsuko-i makpa

Japan ramah khian Hiroshima khaw Hotu (Mayor) fanu upa ber Mutsuko-i chu Shinto sakhaw zuitu nghet tak chhungkuaah a lo sei lian a, kristian sakhua chu a rim-ara pawh a hre lo. Nimahsela, a lo tleirawl chhuah lai vel chuan an khuaah America missionary nula pakhat rawngbawlna avangin Krista chu Chhandamtuah a lo pawm ta a ni.

Pasal a nei : Japan dan angin pasal a nei ta a. A pasal chu damdawi thiam Doctor a ni a, kristian a ni ve tlat lo. Mahse, Mutsuko-i chuan a kristian sakhua chu nghet takin a vuan a, harsatna hnuaiah theihtawp chhuahin a rinna chu nghet takin a chelh zel a ni. Fanu pathum an nei a, an tlum ber chu thla thum mi chauh a nihin Mutsuko–i pasal chu Pacific tuifinriat thliarkarah raldo turin an ko ta a.

Vanduaina leh intihhlum tumna : A pasal chu, “An lalber tan ropuitakin a thi ta,” tih Mutsuko-i chu an rawn hrilh ta a. Mutsuko-i chu a lungchhe em em a, a tan beisei a bo zo ta. A pasal thih thu a hriat hnu chuan in lam panin a fate pathum chu relin a hawn pui ta a. Rela an kal lai chuan a fate pathum nen chuan rel ațanga zuang chhuakin intihhlum a tum ta a ni. A rilruin an hmaa leilawn seipuiah chuan a fate pathum chu zuanthlakpuia, a lungngaihna leh rilru buaina chu a reh tawh mai dawn a ni tih a ngaihtuah a.

Mahse leilawn thlen hnain zaidam taka thu rawn sawi Pathian aw a hre ta tlat mai. Pathian chuan Mutsuko-i chu kristian tleirawl hlimtak a nih laia missionary nih chak țhin a ni tih a rawn hriatchhuahtir a. Mutsuko-i chuan, “A ni tak e, Lalpa, hmanlai khan missionary nih chu ka chak țhin ngei tak a, nahse, hetiang awmdan hrehawm tak hnuaiah hian tunah enge ka tih theih ang? Mahni intihhlum mai hi ka tan kawng awmchhun leh țha ber niin ka ring a ni,’ tiin a chhang a.

Pathian hruaina, mangan laiin : Pathian chuan lainat takin, “Mutsuko, nangmah tak phei chuan missionary nih i tlin lo mai thei a, mahse i fanute hi missionary-a siam turin i nunpui thei alawm,” tia chhangin a hria a.

Tichuan a thinlungah êng a lo awm ta a, chhandam nih lawmna kha a lokal thar leh ta a ni. A hnungtawlh avangin Pathian hnenah ngaihdam a dil hnuah chuan, a fanute pathum chu missionary atan siam turin Pathian chu a dil ta a. A thinlung chu lawma khatin Hiroshimaah a haw leh ta a, kristian taktak nun nunpuiin a fate chu Lalpa rinna kawngah a zirtir tlat țhin a ni.

Damdawi inah thawkin : Hiroshima khawpui lailia awm private damdawi in lian tak, a laizawnnu enkawlah chuan Mutsuko-i chu a thawk ta a. A chungah mite an țha hle a, a hna pawh thawh nuam a ti hle. Tuk khat chu tawngțai hunserhna leh Bible chhiarna hun pangngaiah chuan rilru nawm lohna tak a nei ta a, sawifiah dan pawh chu a thiam si lo. Tuk tina Pathian hnena a țawngțai lai apiangin a rilru nawm lohna chu a nasa ta deuh deuh va, tichuan a fate nen Hiroshima khawpui chu kalsan turin Pathianin a ko a ni tih a hre ta a ni.

“Tlangah tlanbo rawh u” tih thu hi a lo kal nawn leh a. Ani chuan, “Lalpa hetah him taka kan nun theihna hi nangma min pek a ni a, engati ta nge tunah kalsan leh tura min tih leh tak mai?” tiin Lalpa chu a hnial ta a. Mahse khawpui kalsan tura Pathian kohna chu a zual nasa ta deuh deuh si.

A tawpah chuan an doctor-nu hnenah chuan a kal a, Hiroshima kalsan tura kohna thu chu a va hrilh ta a. Doctor-nu chuan a lo hriatin a nuih a za nasa mai a, chu khawpui himzia chu a ring em em a ni tih a lo hrilh a. Mutsuko-i chuan thawpik thlak a ti khawp a, ngawih chuhin damdawiina thawh zel zai a rel leh ta ringawt a.

Hiroshima a chhuahsan ta : Khawpui tlanbosan turin a riltuah turna lo awm chu a ni telin a nasa zual telh telh a. A tawpah chuan chu nawr luihna chu a nasat tak em avangin Mutsuko-i chuan Lalpa hnenah chuan, “Doctor chu ka dil leh ang a, doctor chu a thinur chuan nangmahin mawh i phur tur a ni,” a ti ta a. Doctor hnenah chuan hreh tak chungin, “Riltu natna emaw, ka hnathawhnaah hian lungawilohna ka neih vangin emaw hei hi ka dil a ni lo. Pathianin he khawpui hi ka fate nen kalsan turin min hrilh min hrilh avangin a ni zawk a, in kal thuai tur a ni tiin a ni min hrilh,” a ti a. Doctor chu kristian țha tak a ni a, a sawi anga kal tur chuan a lo hril a. Tichuan chawhnuah chuan motor lorry (truck) a “hire” (hawh) a, a fanu pathum te leh bungraw eng eng emaw nen tlandung Hiroshima khaw hual veltu piah lamah an kal ta a.

Atom bomb a puak ta : A tuk kum 1945 August ni 6 zing dar 8 : 20-ah chuan Hiroshima khawpui chungah Atom bomb an thlak ta a, mi sang tam tak an boral a, an damdawi in kha chu a hmelhmang hriat theih rual lohvin a chhe zo vek ta!! Amaherawhchu Pathianin a fa thuawih thei leh a fanu pathumte chu tlang sang piah lamah a hruai a, an tana ama thil tum ropui tak te chu a tihthlen theihna turin. Hiroshima chhiatna chu harsatna nasa takin a rawn zui a, mahse, Pathianin amah ringtu a bawihnu chu a veng tlat zel a ni.

Lehkha zirin missionary-ah : Indona a tawp hnu chuan Mutsuko-i leh a fanu pathum te chuan lehkha an zirna turin Tokyo an pan ta a. Chu khawpuiah chuan pakhat tetea indawt zelin a fanu pathumte chuan Isua Krista chu an Chhandamtu atan an vuan ta a. Pathianin a rawngbawl tura a kohna an hriatin nula pathunte chuan an pawm a, an nu chu a lawm em em mai a ni. College zirna an zawh hnuin Japan rama Immanuel Bible Training College-ah an zir tur an zir zo leh ta a.

Kum 1966, October ni 20-ah khan Yokyo khuaa Immanuel Central Church (Biakin) ah Mutsuko-i fate chu, an unau thumin, a rualin pasal an nei ta a ni. An unau zain an pasalte nen missionary hna an thawk ta țheuh va, tuak khat chu Kenya ramah, tuak khat dang chuan Jamaica thliarkarah, tuak khat dang leh chuan India ramah hian an thawk a ni.

Dource : Gospel Tlangau February 1980.

Leave a Reply

Your email address will not be published. Required fields are marked *

error: Content is protected !!