HETIANG THU HI THAWN DARH VE SUH

Lalṭanpuia Ngente

A hnuaia mi hi ngun takin chhiar ula, fimkhur ula, dawtin ringtute bumin tibuai ve suh u. Hetiang thu hi vawrh darh ching an awm ṭhin a, Lal Isua leh tirhkohte kha la dam sela chuan ringtute zinga hetiang dawt thu sawi chhuaktute leh vawrh darh chhawng ṭhin tute hi na takin an dodal ngei ngei ang.

Hetiang hi Bible kalhmang a ni lo va, Pathian thu pawh a ni lo va, Lal Isua Chanchin Ṭha ni lo ‘Chanchin Ṭha dang’ hmanga ringtute tihbuaina leh bum tumna, setana hmanrua a ni.

Setana tirhkoh ten ringtute bum nana dawt an phuahchawp, an thu vawrh darh ṭhin ang chu:

‘Tun hnai mai khan canada ramah chuan vantirhkoh-in nasa takin tawtawrawt vawi ruk an ham ri a, vawi sarihna chu Pathian lo kal hun tur a ni. I Pathian tawk turin inpeih rawh. He thu hi mi dang 20 hnenah thawn rawh. I thawn chuan kar 3 chhug vanneihna i dawg ang. I thawn loh chuan kar 3 chhung i chungah anchhia nasa tak a thleng ang.’

‘He msg hi thawn darh rawh. Chumi khami pawhin a thawn darh a, a promotion nghal, vanneihna a dawng nghal. Chumi khami chuan a ti duh lo va a neih zawng zawng a chân vek’

A dang pawh a la tam mai.

Hetiang dawt thu hmanga Pathian thu tichingpen ṭhin tute hi Thutak hmelma, setana tirhkoh leh a hmanruate an ni e.

Tichuan, awih tur leh awih loh tur chin pawh thliar hrang thiam lo khawpa Pathian thu i hre lo a nih chuan setana tan bum nuam tak i ni a, i thlarau nun a ngaihtuahawm hle tih inhria ang che.

Tin, hetiang thil avanga Pathian tih lawm loh hlau leh, hetiang thila Pathian tih lawm tum leh, hetiang thil avanga vanduaina tawh hlau te, hetiang thil hmanga vanneihna chan beiseia ûm i nih chuan, Thuthlung hlui anga mahni thiltih hmanga inchhandam tum, Khawngaihna tluksantu, Krista nena inṭhen leh tate nen in inang chiah a, Krista Khawngaihna Thutak hmelmate zingah i inbarhlut tih inhria ang che.

Hei hi in awmna group hrang hrangah lo thawn darh ula, ringtute kawng dik kawhhmuhtu lo ni rawh u.

Leave a Reply

Your email address will not be published. Required fields are marked *

error: Content is protected !!