Hel hmangte hmangaihtu – Lal Ramhluna Ralte – Mizo Sermon

2 Samuela 14:28 “Chutichuan Absaloma chu kum hnih pumhlum Jerusalem-ah a awm a, nimahsela lal hmêl rêng rêng chu a hmu lo va.”

Davida fapa Amnonan a farnu Tamari a pawngsual thuah Absaloma a thin a ur avangin a farnu phuba lain Amnona chu a that a. Amnona a thah avangin Absaloma chu a tlan bo ta a ni.

Davidan a sipai hotu Joaba hmangin a ko haw a. Kum hnih pumhlûm Jerusalemah a awm a. Nimahsela lal hmel reng reng a hmu lo.

He lai thu hi tawitein heti hian i’n sawi dawn teh ang.
“Aw Pathian khawpui, I chungchang thu ropui takin an sawi thin a ni.”(Sam 87:3) a tih ang khan Jerusalem chu Pathian chenna khawpui tih a ni a. Chutiangin kohhran hi Pathian chenna, a hmun thianghlim chu a ni.

Kohhranah chuan mi chi tinreng, mi lian leh mi tê, hausa leh rethei, mi fing leh fing lo, nausen atanga tar thlengin kan awm a. Pathian bia leh a rawngbawl niin kan inhre theuh mai a nih hi. Amaherawh chu Absaloma Jerusalemah kum hnih pumhlûm a awm chunga lal hmel reng reng a hmu lo angin kohhranah hun rei tak awm ve tawh si, activity leh rawngbawlnaa a kûl a tâia tang ve tawh lèm, Lalpa hmel la hmu miah lo hi kan tam awm mang e. Kohhranin Salvation camping leh crusade vawi tam tak a buatsaih chung pawha sâwtpui nana hmang ve miah lo pawh tam tak kan awm àwm e.

Thawhlawm thawh lama thahnemngai tak, tanpui ngaite tanpui kawngah pawh duai lo tak ni chung siin Lalpa hmêl la hmu miah lo, thlarauva piantharna la nei si lo engzat nge awm ang le?

Absaloma chu a pa Davida lakah a hel ta a, a tlanbo ta. A tawpah Joaba leh a sipaiten an ûmna lamah sasaw thing zarah a in khai a, Joaba leh a sipaiten an tihlum ta a ni.
A laka hel nimahsela Davida hian Absaloma hi a va hmangaih em ve aw! A thih a phal lo va, “Keimah vang talin Absaloma chu dim takin va ti ang che u aw, ” tiin a ûmtute a chah lawm lawm a ni. A thih thu a hriat veleh, “Aw, ka fapa Absalom, ka fapa, ka fapa Absalom, i aiah han thi teh zawk ila aw, aw Absalom, ka fapa, ka fapa!” tiin a tap vawng vawng mai a nih chu.(2Samuela 18:33)

Pathian hmangaihna chuan a laka hel thin, tlanbosan thintu te pawh hi min ban phâk a, min ngaidam zo asin le! Lalpa chuan, “Kei, keimah ngei hi, keimah leh keimah avâng ngawta in bawhchhiatnate thai bo thintu chu ka ni; in sualnate pawh ka hre reng lo vang.(Isaia 43:25) a ti asin. Lalpa chuan a laka hel thin, tlan bosan thintu keimah leh nangma thih ai a lo thi ta. Chuvangin chhandam kan lo ni ta e. Lalpa chu fakin awm rawh se.
“Kei bumhmang leh misual,
Hel hmang thin tan pawh hian;
Jakoba Pathian ngei kha,
Ka Pathian a ni si.”
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!