Hawilopari thawnthu bihchianna – Thang Sian Tluang – Mizo literature

HAWILOPARI THAWNTHU BIHCHIANNA

-Thang Sian Tluang

Lehkhabu hming – Hawilopari
Ziaktu : L.Biakliana.
Ziah hun : 1936.
Bung – 29 a awm.
Plot – Simple Plot-a ziak a ni.

L.Biakliana hian kutchhuak novel (Hawilopari) a ziak a, short story (Lali) a ziak bawk a, hla 20 vela phuah nghe nghe. He novel Hawlopari hi kum 1936-a a ziak a ni.

Eng novel nge anih?

Hawilopari thawnthu hi Regional Novel a ni a. Hetiang thawnthuah chuan a ziaktu-in ram bial khat chhunga thilthleng a ziak a,a changtute leh a thawnthu innghahna pawh hi ram bial khat chhung ami a ni tur a ni. Hawilopari thawnthu kan en pawh hian L.Biakliana hian a changtu atan Mizo a hmang a, a thawnthu tam zawk chu Mizorama innghat thawnthu a ni bawk. Chutih rual chuan hnam nunphunga innghat thawnthu nih theihna lai a tam hle.

Eng narration a ziak nge a nih?

Hawilopari thawnthu hi Direct method hmanga ziak a ni tiin Dr.Zoramdinthara chuan a ziak a (Fam Rohlu-82). Hetiang method-ah chuan inbiakna ṭawngkam awm lem lovin thawnthu chu an sawi chho pawr pawr mai ṭhin a ni.( Literature Lamtluang-231) Lalrinkimi erawh chuan Mixed Narration method a hmang niin a sawi a, chutah chuan direct leh indirect method hman kawp a ni ṭhin. ( Re-Reading of Mizo Literature – 70)

 A thawnthu ngun taka kan en a, kan zir chian chuan Mixed Narration Method a hmang niin a lang zawk mah a ni. He thawnthu-ah hian a thawnthu min hrilh bakah inbiakna ṭawngkam a awm nual a, chuvangin Mixed Narration Method a hmang tiin sawi ila pawm a nuam zawk hle in a rinawm.

A Thawnthu Tlangpui :

Aizawl aṭanga khawchhak lampang, in 150 vel awmna khua-ah hian ṭhian dun pahnih inkawm ngeih em em an awm a. Pa an nih huna an nupui tur, an duhzawng chu an sawi ṭhin a, an duhthusam ve ve chu an nei ta a. Pakhat chu Hminga pa hi a ni a, pakhat zawk erawh chu Hawilopari pa a ni thung. An chhungkua hlim taka an awm lain vanduaithlak takin Hminga nu chu a boral hlauh mai a, an tuarthiam lo em em a. An nu berin a thihsan avang chuan an chhungkaw nun chu a harsa hle a, chuvang chuan Hminga pa chuan nupui dang a nei ta a. Chu an nu thar chuan Hminga te uanau chu a tiduhdah em em a, fa an neih chinah phei chuan a hmusit zual hle mai a. Hminga leh Hminga pa-in an hauh chang lahin a tlan zel mai si a, a tihngaihna an hre lo a ni ber.

Ṭum khat chu Liana chuan a nau a awm a, an inhnawk chu a hlim deuh nge ni, a nau puak chu a thlauh palh hlauh mai a. Chu chu a nuhrawn chuan a ngai thiam lo em em a, a vel a, chil te a chhak a. Hminga chuan a nau chu chhanin a hmaa an kal fona ṭhin daiah chuan a kalpui ta a. Chutah chuan anmahni duhsak em emtu Zema chuan a awmpui a, kal bo dan tur chu a ruahmanpui a. Chu thu chu anmahni bakah an lal fapa Chhana leh an naupan tet aṭanga an kawm Hawilopari te ṭhianho chauh lo chuan an hre lo a. Hminga te chu an kal bo ta a, an kal bo hlan chuan lal leh Hminga nu te chuan thiam chi tinrengin Pari chu an dawp a, ṭhi pek hial an tum thu te sawi mahse Pari chuan engtin tin emaw a zep thei hlauh a.

Hminga te kal bo pawh kha vanneihthlak takin Sipaiah an ṭang hlauh mai a, an sipai ṭanna hmunah chuan duhsak an hlawh a, anmahni an huaisen bawk nen an kaisang chak hle a. Chutihlai chuan Mizo hovin vaiho an run ṭhin a, chumi do let tur chuan sipaiho chu an tir a, Hmingate chu an kal ve hlauh mai a. Chutiang a nih lai chuan Pari chu an lal khawnbawl upa Khuala’n a beisei a, Parin a duh si loh avangin ka nula a ni tih thu-ah lal hmaah an inkhing a, lal chuan Khuala chu thiam a chantir a, Pari te chu an pem phah ta a, hla taka a pute khuaah chuan an pem ta a. Hminga te Mizoram lo kal chuan anmahni hruaitu sap hnenah an khuaa haw an dil a, chu Sap chuan a phalsak hlauh mai a. An khua an thlen chuan Ngaihi leh Mawii te ṭhingphur chu an hmu hmasa a, mahse Pari a awm loh avangin an lawm a kim lo hle a. Chutihlai kar chuan Hminga pa a boral vei nen Hmingate chu mittui nen khua an lut a ni ber mai. Mahse chu chuan an nuhrawn nen an inkarah inremna a thlen hlauh thung. Hminga chuan a ṭhiante tibuai lova Pari zawn chu a duh a, amahin a kal a, mahse Zema chuan a rukin a lo zui a. Vanduaithlak takin Pari te pemna khua chu Pawi ralin an lo run a, an khua an hal sak a. Chung pawiho chu Hminga chuan a um a. Chuta a umna-ah chuan a hriat hauh lohin Zema chuan alo tanpui a, Zema chu Pawi a lo ni bawk nen Pari te chu an chhan chhuak a. Amaherawhchu Zema chu Pawi pakhatin a hliam palh hlauh a, a hliam tuar lovin a thi ta a. Hmingate chu hlim takin an innei ta a ni.

A Theme :

He thawnthu-in tarlan a tum ber chu ṭhian chhan thih ngam hi a ni awm e. Chumi tichiangtu atan Chhana’n lalna leh thuneihna aia a ṭhiante a thlang zawk te, Savawm laka Chhana leh Hmingate intlansan mai lova an in chhan avang te leh Zema’n ama nawmsakna tur pawh ngaihtuah hmasa lova a nau te an kal bona tura a hruai avang leh a tawpa Hminga te tana a nun a hlan hian a tichiang hle a ni.

Setting of the Novel :

 He thawnthu innghahna hmun ( setting of place) hi Aizawl aṭanga khawchhak lampang, In 150 vel awmna khua leh Silchar leh Tlawng kam vel niin a lang. A hun thu-ah chuan he thawnthu a ziak aṭanga kum 100 liam ta ni angin sawi mahse Mary Winchester an man thute a ziah lan avangin 1871-80 vel bawrah ngai ila a sual tam lovang.

Changtute Mizia :

He thawnthu-ah hian changtu mi chi hrang hrang lo lang mahse a pawimawh zual nia lang te chauh han en ila,

1). Hminga : He thawnthua a changtu ber a ni a, a naupan lai aṭanga naupang fel a ni a. A thiltih tur ngun taka ngaihtuah ṭhin mi niin a lang bawk. Tlangval fel leh huaisen tak a ni tih Rova ṭawngkam aṭang bakah vai misual a beih danah kan hre thei bawk. Mahni chauh inngaihtuah mi ni lo, ṭhiante dah pawimawh thiam mi niin a lang a, nula tan chuan ngaihzawnawm tak ni tur a ni. A ngaihzawng tana rinawm tak a ni bawk.

2). Chhana : Chhana hi lal fapa a ni a, chutih rual erawh chuan an mi ṭhatna a chhuang lem lo niin a lang. Naupangte anih lai aṭanga mi dik leh tha, felte ngaisang mi a ni tih a ṭhianpa, Hminga chunga a rilru puthmang hian a tichiang hle. Lal a nih hunah Hminga chu a Upa atan a hual lawk a nih kha. Mi chhia leh mi ṭhate inkar zau lutuk vei mi a ni a, khawtlang nun siam ṭhat duhna rilru a pu zau hle a ni.

3). Zema : Zema hi fahrah ve tho a ni a (Biakliana Robawm-213), chumi anih avang chuan amah ang bawka fahrah Hminga te unau chu khawngaih em em niin a lang. Liandova te Unau lemchan thawnthua Pi Fangi nen hian an chan hi a inang hle a, Hminga te unau-in an mamawh hun apiangah a rawn lang chat chat ṭhin a, hei hi a thawnthua a pawimawhna tak niin a lang bawk. A tawpah phei chuan Hminga tan a nun a hlan hial a nih kha.

4). Hawilopari : He thawnthu hming put chhan a ni a, he thawnthua a changtunu ber a ni bawk. Mi biangbiak thiam leh hmelṭha ve tak a nih a rinawm a, nula ngaihzawnawm tak a ni tih rin theih turin an lal upa fapa Khuala pawn a atchilh ni berin a lang. Hmeichhe rinawm tak a ni a, a hmangaih tan chuan eng ang harsatna pawh a sepui ruah tawrh ngat ngat a, a rinawmna rah chu sengin a tawpah a hmangaih ber chu a nei thei ta a ni.

5). Nuhrawn : He thawnthu-ah hian Hminga te nuhrawn hi a hming ziah lan ni lo mahse a pawimawh ber te zing a mi a ni. Hminga te chunga harsatna thlentirtu a ni bul a, he thawnthu ti thawnthutu niin a lang. Nu ṭha lem lo tak, ṭhenawm khawvengte pawhin ‘em em a’ tia an sawi ṭhin a ni a, a tana hlawk turah chuan fel em em a, mi pawh hneh thei tak a ni.

Hawilopari thawnthu that tawk lohna :

He thawnthu, Mizotena kan novel neih hmasak ber hi duh khawp lohna lai a awm nual a, chu chu ziakmitena a ṭha leh zuala an ziah theih nana fuihtu a nih theih nan lo tarlang ila:

1). He thawnthu ziaktu hian a thawnthua a changtute hi a hre chiang lo deuh niin a lang. He thawnthua misual ber nia lang Hminga te Nuhrawn chu sual tak angin a din a, mahse a an hla leh a mizia a tarlan te han en chuan a nuhrawn tarlan hi a sual hmel lutuk lo a, an a thiam tawk lo niin a lang. Chu bakah a nuhrawn sualzia a tarlang tlem lutuk a, chu chuan a chhiartute a hip tawk lo niin alang bawk. A tawpa a nuhrawn inhmuhchhuah dan a tar lan pawh kha a awihawm viau loh a ni. Khatiang khawpa nu sual, mahni pasal baka a fate pawh ngaihsak hman lo kha Hminga te rawn haw khan a inhmuchhuak ringawt a, kha aia chiang khan tarlang se, bung khat emaw belh leh hlek se chuan a thawnthu hi a ngaihnawm zual leh ngawt ang.

2). Hminga ten ral khat aṭanga enlenna hmanga an khua an en a, mi pal hungna an sawi chat chat thei te kha a awihawm loh deuh. Enlenna hmang khan chiang takin lang pawh ni se kum kua dawn lai an khua an kalsan a, chuta an khaw awm dan engkim an hre chat chat thei te hian a thawnthu an titak lo deuh em aw a tihtheih bawk.

3). Hmingate ṭhianho kha an famkim mah mah a, hmangaihna chungchang pawh la sawi miah lo chunga kum kaw dawn lai an innghak thei te kha a mak a, khawi hmun mai pawha an che ṭha em em mai te, duhsak an hlawh bik em em mai te leh an rinawm em em mai te hian mihring nun an pel deuhin a lang. Hminga leh Pari chu eng ang pawn awm se a ngaih thiam theih deuh a, a thawnthuah pawh tlem chu a tarlang deuh bawk a. Chutiang ni lo a Chhana te, Liana te, Ngaihi leh Mawii te ho an chanchin eng mah tarlan awm lo a an han rinawm em em mai hian a thawnthu takna a ti da deuhin alang.

4). He thawnthu hi a plot a duan dan chu a ṭha a, thawnthu ngaihnawm tak tur a ni. Amaherawhchu a ziak chhuah dan a thiam lo deuh em aw tih tur a ni a, a character-te duh angin an nung ṭha lo bawk nen a chhiartute min hip lutuk lo niin a lang bawk.

5). Poetic justice a awm lo hian chhiartute rilru a hmin tawk lo niin a lang bawk. Mihringte hian kan rilruah duhdan leh lo suangtuah lawk kan nei ṭhin a. Chu chu mi sualten an sual man an hmuh a, mi ṭhaten an ṭhat man an hmuh hi a ni. Chutiang chu he thawnthuah hian hmuh tur a awm lo a, Hminga nuhrawn sual lutuk hian a sual man han hmu hlauh se chuan a thawnthu ngaihnawmna a belhchhah ngeiin a rinawm.

6) L.Biakliana hian a thawnthu ziahah hian a thawnthu atana pawimawh lo a tar lang hnem deuh awm e a tihtheih a, chubakah a mihring tarlante hi a thawnthua ṭangkai lo an awm nual a, a ṭangkai a te pawh an rawn lang nawn lo a, an reh char char a, chu chuan a ngaihnawm tur angin a tingaihnawm lo. Hmingate nuhrawn leh an pa-in fa an nei a, chu chu Lianan a thlauh lai vel chiahin a lo lang a. Chumi lanah chuan pawimawh hle mahse a rawn lang leh tawh miah lo a. Hmingate an khuaa an haw khan lo langin emaw a chanchin eng emaw tal sawi awm se chuan he thawnthu hi a awihawm lehzual thei ang.

7). Power of Imagination (mitthlaa hmuhtheih tur) nei tura min nawrtu an awm lo deuh em aw a tihtheih bawk. Harsatna leh manganna bakah an lawmnate thlengin kan mitthlaa lo lang iar iar thei tur khawpa ziah chhuah a thiam tawk lo bawk.

8) A ziaktu hian a zalenna a hre mah mah a, novel-ah chuan engkim a leng a, eng tiang pawn a ziah theih ti ṭhin mah ila, hringnun kalphung a pelh nasat deuh emaw ziah lan loh a ngah lutuk emaw chuan a thawnthu ngaihnawmna a tibawrhbang thei ṭhin a. Chutiang chu he thawnthu-ah hian hmuh tur a awm leh ṭhin a, chu chuan a thawnthu a ngaihnawm tur angin a tingaihnawm tawk lo ṭhin a ni.

9). Mi chhia leh mi ṭha inkar hlat zawng sawi siin lalpa leh Hminga pa te chu luiah a kal duntir a. Inṭhian ṭha tak an nih si chuan enga ti nge a tirah an fapate an inkawmtir si loh? An dinhmun inthlauh vanga an fate pawh inkawm lo ni awmin a tarlang si a, tlemin a thawnthu hi a hre chiang lo deuh niin a lang.

10) He thawnthu hi ngun taka kan chhiar chuan Bung 13-naah Pari chu a nu leh paten Khuala nei turin an sawi hmuh deuh tih kan hmu a, chu chu Pari chuan a duh lo hle a, zanah pawh a ngaihtuah zui zel a, a mut theih loh phah tih kan hmu a. Chutia mangang taka a awm lai chuan, “Aw Pathian, min awm pui rawh, ka rilru  a rethei em mai,” tiin a ṭawngtai tih kan hmu a. A thawnthu ziah hunlai, a thawnthu innghah hun nena ngaihtuah chuan Mizote hi kristian an la ni lo a, chuvangin helaia Pari ṭawngtai kan hmu hi a ziaktu hian a tisual niin alang.

11) He thawnthua hun kar awl awm hi a zau lutuk ṭhin a, a karawl hnawhkhahna tur a nei ṭha ṭhin si lo a, a thawnthu a tingaihnawm lo hret niin a lang. Chutih rual chuan a hun inhnaihte lah chu a inhnaih hle lawi si a, a ziaktu hi a hmanhmawh mah mah em aw tih tur a ni bawk. Hminga te kha a nu in Liana a sawisak aṭanga a naktipah an tlan bo nghal tih kan hria a. An tlan bo nia inlawm Rova leh Thangi te titiah chuan Rovan Liana nuin Liana a sawisak a hre hman lo a, an la pem hma thil niin an sawi a. Rova chu a nimin maia lo pem chu ni se ṭhian kawm tur a neih hman a rinawm loh a, chubakah ama ka ngei aṭangin Hminga nen an inkawm hman thu kan hmu bawk a, chuvangin he laia thil thleng hi a bichilh mah mah niin a lang bawk.

Hawilopari thawnthu thatna te :

Kan sel kan sel tawh a, he thawnthu hian ṭhatna a nei ve lo angah a ngaih theih hial ang, mahse he thawnthu hian ṭhatna tam tak a nei a, a ziaktu pawhin ziak mi dangte neih zen zen loh thiamna danglam bik a nei a, chungte chu lo tarlang ila:

1). He thawnthu ziaktu hi khuarel mawina sawifiah kawngah mitthlaa a tarlan thiam dan (graphic description) a sang hle. Thawnthu ziaktute hi khuarel mawina nen an inhne rem rem em em a, chu tihrual chuan an rilrua awm ziak chhuak thiam lo tam tak an awm a, he thawnthu ziaktu L.Biakliana chu a ziak thiam berte zing a mi ni ngeiin a rinawm.

“… Kaikuangte erawh chu an intihuai a, mi pawh lo kal se engah mah ngai lo anga lan an duh emaw ni, muang fe hian puk kiangahte chuan an phar daw daw vei a. Zuk man dawn chuan an leng nu but a, kil dangah an per zak a” (Biakliana Robawm – 231)

 a han ti thiam te hi a ropui a, mitthlaah a lang iar iar thei a ni.

2) A hunlai khawtlang dinhmun a tarlang chiang hle bawk. Mizote chu lal nei hnam kan ni a, lalte chuan thuneihna tawp an nei a, an rorelna chu mipuiin a dik emaw dik lo emaw an pawm a ngai tih kan hmu a. Mizo te chu lo nei ṭhin kan nihzia chiang takin a lang bawk. Mizote chu mipa rorelna hnuaia awm kan ni tih a tarlang thiam hle.

3). A changtute hi han enchiang leh lawk ila, Zema nun a duan dan hi a fuh hlein a hriat. Zema chu fahrah a ni a, fahrah dinhmun hreawmzia te, a harsat dan te chu hre vekin tlangval nun a hmang a. Chutiang nun lo paltlang hrep tawh a nih avangin Hmingate unau a khawngaih em em pawh hi a awihawm bik hle a ni.

 4) Bung 10-na kan en chuan Hmingan vai misual a beih dan kan hmu a, he bung hi tangkai lo anga lang thei anih laiin a ziaktu hian a thawnthu ziah a hriat chianzia tilangtu a ni lawi si a ni. Pari te Pawi ralin an man khan mahni chauha umzui ngam tur chuan huaisen tawk tak nih a ngai ngei ang. Chu mi tur chuan L.Biakliana hian a lo ruahman lawk niin alang. Hminga, an sipai tan laia huaisen lawmman dawng tawh, mahni chauh pawha tuman engtin maha an tihngam loh Vai misual bei ngam kha a mamawh tih a hre lawk a. Sipai ni bawk, huaisen tawk tak nibawk tan chuan ral beih chu a huphurhawm ai mahin a phurawm hial zawk thei a, chuvangin he bung 10-na hi a pawimawh hle a ni.

5) Hawilopari thawnthu-ah hian khawtlang nun siam ṭhat duhna au aw hmuh tur a awm a, mitinte tana fimkhurna tur min hrilh nasa hle. Chhungkua-ah chuan pa chuan ro a rel tur a ni a, a rorelna chu a chhungkua-in an zawm tur a ni. Chutiang ni lova nu ber a huaisar lutuk chuan chhungkua-in harsatna tam tak an tawk thei a ni tih entir nan Hminga te chhungkua a din a. Khawtlangah chuan lal chu roreltu, thu tawp neitu a ni a, chuvangin dik takin ro a rel tur a ni tih hi Biakliana duh dan a ni a. Chu ti ni lova dik lo taka ro a rel emaw thlei bik neia ro a rel chuan a khuain harsatna a tawk thei a ni tih lantir nan Lal rorelna dik lo a tar lang bawk. Hetiang hian Biakliana hian khawtlang nun a veizia a thawnthu kar lakah hian a tar lang a, a thawnthu tihlu bertute zing ami a ni ngei ang.

6) He thawnthu ruangam (plot) a din dan hi a ṭha a, plot ṭha tak a ni a. Characteristic of Plot a zawm ṭha hle a, harsatna inṭan dan, harsatna vawr tawp thlen lai leh an sut kian dan thlengin hmuh tur a awm a ni.

Tlipna:

He thawnthu HAWILOPARI L.Biakliana ziah hi mizo tena kan novel neih hmasak ber a ni a. Duhkhawp lohna tam hle mahse a ziah hun lai ngaihtuah chuan a ṭha thawkhat hle a. Hnam chanchin chhui theihna a nih piah lamah khawtlang dinhmun siam ṭhat duhna rilru pu chunga a ziah a nih avangin a hlu hle a. Mizo literature tana a ṭangkaizia  leh a hlutzia hi ṭhangtharten an zir chiang zel ang a, kan ngaihlu-in kan ngaisang telh telh dawn niin alang.

References :

  1. Laldinmawia, H. Edt. Fam Rohlu. Pachhunga University College. Beraw Press, Saron Veng, Aizawl. 2012. Print
  2. Laldinmawia, H. Literature Lamtluang. CreatiVentures. KL Offset Printers, Upper Khatla, Aizawl. 2015. Print
  3. Lalrinkimi. Hawilopari: A pioneer Mizo Novel. Re-Reading of Mizo Literature ( with special reference to under graduate course). Edt. Govt Hnahthial College. Lois Bet, Chanmari, Aizawl. 2017. Print

Others :

  1. Enid H. Lalrammuani, Class Teaching
  2. Retrieved from https://kumtluang123.blogspot.com>biakliana-hawiloparithawnthuruangam
  3. https://kumtluang123.blogspot.com//2015/10aukhawk-lasi-book-review

Leave a Reply

Your email address will not be published. Required fields are marked *

error: Content is protected !!