Hawilopari – A pioneer Mizo novel – Lalrinkim

HAWILOPARI, A PIONEER MIZO NOVEL

– Lalrinkimi
Asst. Professor
Department of Mizo,
Govt. Hnahthial College.

THUHMAHRUAI:
L. Biakliana thawnthu ziah “Hawilopari” tih lehkhabu ka chhiar apianga ka rilrua lo lut chu, hetiang taka ngaihruatnaa thawnthu phuah thiam, a thawnthu huam chhunga a changtute nunchan leh behbawm thil thlengte chipchiar leh inkhaidiat ṭha sia a lo ziak thei hi a mak ka tiin a ropui ka ti takzet a ni. A bengvarthlakin, a lehkhabuah hian chhiartute min chentir veng veng thei nia. A lehkhabu hming ‘Hawilopari’ tih ringawt mai pawh hian lairil a fan ngâih mai a ni. Tun ṭumah hian a ziaktu chanchin tlêm leh a bu chhung thu seprawtuina kan tar lang dawn a ni.

1.BIAKLIANA:
L. Biakliana, Rev. Liangkhaia fapa hi August ni 26, 1918-ah a piang a, lehkha thiam thei tak a ni. Kum 1936-ah kum 18 mi a nihin Matric a passed a, Gauhati Cotton College-ah Intermediate of Arts ( IA ) zirin, kum 1937 khan a kum khatna a zo va. A kum hnihna a beih leh laiin natna khirhkhân tak TB-in a tlâk buak ta hlauh a. Kum 1941-ah Cherra Theological School-ah Pathian Thu a zir leh laiin a natna pangngai TB avang bawkin Oct. 19,1941 khan a boral ta a ni. Ani hian Mizo thawnthu (Novel) puitling hmasa ber ‘Hawilopari’ (1936) leh a pahnihna ‘Lali’ (1937) te chu a ziak a. Novel ziah kawnga Mizote tana sulsutu pawimawh tak a ni.
“Mizovin thawnthu phuah thar (Novel) kan neih hmasak ber chu kum 1936-a Cotton College, Gauhati-a I.A zirlai, L. Biakliana ( 1918 – 1941 ) ziak, HAWILOPARI a ni a.” (Vannghaka,199)

“Mizo zinga thawnthu phuah hmasa ber Biakliana hming hi literature zirtute zingah phei chuan a chul lo viau awm e. Kum 1936-a a phuah HAWILOPARI hi Mizo Novel hmasa ber a lo ni ta a.” (Thuhlaril,152). Mithiam zawkte thu ziah hrang hrang kan thlir chuan ‘Hawilopari’ tih thawnthu hi kum 1936-ah L. Biakliana’n kum 18 mi chauh a la nih laia a ziah tih kan hre chiang ta viau a. Mizo Novel Golden Jubillee Souvenir leh ‘Ka lungkham’ tiha B. Lalthangliana thu ziah aṭang te pawhin a chiang viau awm e. Mizo thawnthu phuah hmasak ber ni mah se a thawnthu ruangam (Plot) indin dan te, a changtute ( Character) mizia leh khawsak dan a rem fuhzia te, leh a thawnthu boruak pum inpumkhatna lamah te hian a ṭha hle mai a. A ziaktuin Mizo ṭawng a hman dan leh a hmun azira ṭawngkauchheh chi hrang hrang a hman dan te hi a ṭha hle a ni.

2.HAWILOPARI THAWNTHU RUANGAM (PLOT):

HAWILOPARI thawnthuah hian a thawnthu ruangam (Plot) hi a ṭha thawkhat hle a. Novel chuan thawnthu ruangam fel tak a nei tur a ni a, Aristotle-a chuan, “The plot is the first principle and the soul of tragedy,” a lo ti hial a ni (Drama chungchang a sawina ni mah se kan hawh lawk ang). Plot hi thawnthu phuar khawmtu a ni a, thawnthu khawi lai mai pawh hian inkungkaihna mumal a nei tur a ni. He thawnthu hi Simple Plot-a duan a ni a, thil dang behbawm awm teh chiam lovin a thawnthuin a tum ber chu a kal tlangpui parh a ni.
He thawnthu tingaihnawm zual tur hian “Flash back technique” pawh a hmang zeuh zeuh a, thawnthu kal lai mek nena inzawmna nei lo ni awm tak thil thleng a zep tel a (P/24 leh P/81-ah te kan hmu a). Mahse, chu chu a tawpah a thawnthu kal lai nen thiam takin a ṭhui zawm leh a ni.

He thawnthua a bu hming hauhtu ber ‘Hawilopari’ chu mi hausa fanu zawng a ni hauh lo va, lungdi bera a neih tak Hminga lah chu fahrah mai a ni si. An karah tihdanglam theih loh khuarel harsatna (Nuhrawn sualna) a lo lang a, Hminga te unau chu an nuhrawnin a tihduh dah leh a huat em avangin an mahni inah pawh awm thei lovin an khua an chhuahsan a ngai ta hial a. Hminga leh a nau Liana, anmahni hmangaih em emtu an ṭhianpa leh an u ni kawp chawt Zema leh an khaw lal fapa Chhana te nen an khaw chhuahsan dan tur an rel a, an ṭhiante – Hawilopari, Ngaihi leh Mawii te bak hriatpuitu an nei lo. Tleirawl mai an la ni a, an thinlunga thu awm te phawrh chhuak turin an la huai tawk rih si lo a, thinlung na leh hrehawm takin, rinawm intiam chung zela an inṭhen a ngai ta a.

Hawilopari te leh Hminga teho intawng leh ngei tura intiam chunga an inṭhen hnu lawk chuan Lal khawnbawl upa fapa Khuala chuan Pari chu a ngaizawng tlat mai a, phungbawmah Remi nu (Hminga leh Liana te nuhrawn) chu a sawm a. Remi nu chuan a nuṭapa Suaka leh Pari te thingphurhpuinu nula pakhat Thangi kha Pari tihchhiat dan kawng a lo zawnpui leh bawk a. Khuala lahin Pari chu, “Ka nula a ni e” a ti tlat a, lal hmaah khing sateh mah se awmzia a awm lo a, Pari pute khuaa an pem a ngaih phah ta hial a ni. Hetiang harsatna hrang hrangin a hual vel karah hian Hawilopari erawh rinawm takin a awm tluan chhuak zak a.

He thawnthu ziaktu hian tih dan danglam tak a hmu chhuak a. Hminga leh Hawilopari te inkutsuih theih hma chuan an tana ṭhahnem ngai leh thawkrim em em, rinawm tluan chhuak zak, Zema a dah a. Zema hi a rinawmzia leh puitlinzia kan hmu a. Hminga te unau fahrah rethei tak chu duat takin a kai hruai a, duhsak takin a chhawm dawl char char a ni. Kum sawm dawn lai Hringchar lama vai sipaia an ṭan bo hnua Mizorama an let leh hnuah pawh ama nunna hial hlanin, Hminga leh Hawilopari te inhmangaihna chu a par chhuahtir ta a ni.

3.HAWILOPARI THAWNTHU INNGHAHNA HUN LEH HMUN (SETTINGS):
“Kum za dawn lai a ni ta, tunlai Aizawl hmun aṭanga khawchhak lampang khawilai emawah khian khaw lian deuh mai hi a awm a…” (Hawilopari,1)

A tir phat aṭangin he thawnthu innghahna hun leh hmun hi sawi chiang lutuk lo mah sela Biakliana’n a ziah kum 1936 aṭanga kan chhut chuan kum zabi 19-na chawhnu lam a lantir tih thil thleng aṭangin kan hmu thei a. Aizawl hmun aṭanga khawchhak lamah chuan khaw lian deuh mai, in 800 vel emaw khua a awm a. Chhak leh thlang indo (1877-80AD) vel aṭang khan an lo darh zo ta a. Chu hmun nuam tak maiah chuan in 150 emaw lek an awm ta tih he thawnthuah hian kan hmu a ni. Chhak leh thlang indo, sailo leh sailo lal khua indo thlenna hmun langsar ber kha Tachhip, Hmunpui leh Ruanzawl vel saw a ni a, heta chhak leh thlang indo aṭanga thawnthu inṭan chauh anga a sawi leh Bengkhuaia’n vai a runa, Mary Winchester a man kum 1871 hun lai nena chhut chuan he thawnthu setting hi a fuh chiah lo niin a lang.

A hunlai vantlang nunphung leh khawsak dan a tarlan avangin social setting kan hmu a. Mizoram pawn lam Hringchar lam daih te a lan ve bawk avangin exotic setting kan hmu tel bawk. He thawnthuah hian suspense ending hi a ṭha hle mai a, bung tin maiah hian a chhiartute tana chhiar zawm zel chakawm hliah hliah turin a titawp thiam em em mai te hi he thawnthu tehfung sanna pawh hi a ni.

Hawilopari te ṭhianho leh Hminga te ṭhianho an inṭhen aṭanga a kum lina-ah chuan Hminga te ṭhianho chu an puan sinlai nen ringawt mai, chau deuhvin Hringchar an thleng thla a. Eng emaw ti tiin chumi hmunah chuan Hminga te ṭhianho chu an tal ve nawlh nawlh a. Hun eng emaw chen an awm hnu chuan Sap sipai pakhat a lo chhuak a, Hminga te ṭhianho taihmakzia te, an tlawmngaihzia te a hriat chuan Hminga, Liana leh Chhana te chu sipaiah a la ta a. Zema erawh chu a ei siam leh eng ilo enkawl velah a hmang a(ibid,43).

Hetih hunlai hi a thawnthu kan zir chian aṭanga a lan dan chuan Mizorama a nawlpuia vailen kum 1872 hmalam kha a ni tih kan hmu thei a.
Chumi hnuah chuan Mizoram run tura inbuatsaih a lo ṭul ta a, a chhan chu Seifa ral an lo lian chiam a. Thingpui huan pakhat an run a , sap pakhat an kap hlum a, a nau pawm lai hmeichhe naupang te tak te chu an man a. Hetih hunlai hi kan Mizoram history bu hrang hrang en chuan Bengkhuaia vai run thu kha a ni tih kan hre thei. “Tahrik ni 23, Jan. 1871-ah Cachar chu an thleng thla a. Thingpui huana hnathawk vengtu Mr. Winchester chu a fanu naupangte Mary Winchester chu kaiin huanah chuan a leng vel a” (Mizo History kamkeuna,136). Heta ṭang hian Bengkhuaia vai run chungchang a ni tih a chiang mai awm e.

Hawilopari te leh Hminga teho an inṭhen aṭanga a kum kuana chu Pari tan chuan a rapin a rapthlak ringawt mai. Harsatna hrang hrangin a tlak buak ṭan ta a. A kum leh January ni-9-ah (Hemi kum hi kum 1872 a ni tawh a) erawh chuan Hminga te ṭhianho chu an sipai hotupa ber ho chuan Silchar chhuahsanin Mizoram run turin an thawk chhuak ta a (Hawilopari,119). Hei hi a changtute Hawilopari te leh Hminga te inhmuh leh theihna tura thil thleng pawimawh a lo ni ta a ni.

Thil pawi em em mai chu Hawilopari te chhungin Khualluta vangin harsatna namen lo an tawk a, Hawilopari nu nuṭapa Pu Rala te khuaa an pem a ngai ta hial a. An khua an chhuahsan fel hman chiah tihin Hminga, Liana, Zema leh Chhana te chuan khua an thleng ve leh ta chiah a ni. Khaw dai kiang lawk an thlen chuan Hawilopari ṭhian rinawm tak tak Ngaihi leh Mawii te thing phur nen an inhmu fuh ta hlauh a. Hawilopari chanchin an hriat chuan an lawm a kim lo hle a. Chuta karah khuaa an luh chuan Hminga leh Liana te pa chu a lo boral hman ta chiah a, “kum sawm lai an bo tawh” (ibid,185) hnuah chhiatna hlirin a lo hmuak ta emaw ni chu tih mai turin vanduaina chu a rual rualin a lo thleng ta puk puk mai a ni.

Heti zawng hian i han thlir teh ang, Hminga te ṭhianho kha sipaiah kum ruk zet an ṭang a, an dinhmun a leikang hman viauin a rinawm. Amaherawhchu, khami chhung khan an khaw lam tlawh nawn leh tumna an neih awm a lang lo a. An kalsan takte kha an thlahlel tawk lo emaw ni chu aw tih vawng vawng a awl ṭhin. Vailen vawikhatna hi thleng ta lo sela, engtin tak intawng leh hlawm ang maw?

He thawnthu ziaktuin a rem fuh em em mai chu, a changtupa ber Hminga hmangaihna ropui tak lo lan chhuahna tura Hawilopari te khaw lam a pantir leh Zema ropuina lo lang tura Hawilopari te pemna khuaa Pawi ral a chettir ta hi a ni. Zema nihna dik tak ‘Pawite’ a nihna laihlan a lo ṭul ta a. A tawpah he thawnthu laimu ber mai ‘|hian chhan thih ngam’ nun kha Zema chungah a lo thleng ta chiah reng a ni.
Phe 95-na-a kan hmuh ang hian Hawilopari chu Pathian hnenah a ṭawngṭai tih kan hmu a. Mizorama Chanchin Tha meichher chhit a nih hma daiha Pathian hnena a ṭawngṭaitir hi chu a fuh chiah lo a. Phek 101-na-ah pawh hian Hawilopari chuan an ṭhianhova an thuruk chu a puan a lo ṭul ta. A changtunu ber hmang lo hian misual(villain) lam emaw, an ṭhian dangte emaw hi hmang zawk ta se tih ngaihtuahnaah a lo lut leh ṭhin bawk.

Phek 203-na-ah chuan Pari thinlunga lo lut hla pakhat kan hmu a. Chu pawh Zema boral hlimteah a ni nghê nghê.

“Chhaktiang kawlrawnah khian,
Chung turni a lo chhuak,
A iangin lawmna a lo chhuak,
Thinlung kawlrawnah hian.”

Anmahni Hawilopari leh Hminga te pahnih tana a hun tawp thlenga rinawm leh a nunna hial chantu, Zema hian lainat taka ṭah hawm hawm a phu tehlul nen, Hawilopari hian a hre chang ve ta lo emaw ni chu aw a tih theih a ni. Hawilopari thinlunga hlathu lo lang tel lo pawh hian he thawnthu hi a kim tawk viau a ni a tih theih.

Engpawh chu ni se, he thawnthu hi a ṭha tawk viau a, Mizo faten Novel kan neih hmasak ber a nih avang hian dimdawi tak chunga chhiar a ṭha a ni. He thawnthu ziaktu hian Mixture method hmangin a thawnthu min hrilh a. Tluang tlam taka (Direct Narration) a thawnthu min hrilh bakah, a changtute pawhin thu an sawi (Indirect narration) ve bawk avangin Mixed Narration Method a hmang a ni.

He thawnthu hi Mizo ṭawng hlui mai tur leh thi mai tur vawngtu ṭha tak a ni. Phek 27-na-ah “thai lehlubin” tih kan hmu a. A awmzia hi ṭhangthar zingah chuan sawi fiah fet a ngai tawh ang. Phek 174-na-ah chuan Chhana thusawi, “Kan samte kha kan lo mêt ve ang tih ka hlau leh hnuhnawh ka ti,” tih kan hmu a. Tun thlenga ṭawng chungchanga inhnialna la awm reng, “lu met nge sam met?” tih thu sawi zauna atana ṭangkai tak a ni thei bawk. Kum 1936, hemi thawnthu a ziah hunlai pawh hian sam an met ve tho ni awm tak a ni.

Phek 43-na-ah chuan Mizo tia sawi kan ni tawh a, Phek 120-na-ah chuan Lusei tiin a dah thung. Kum 1870 velah khan a hnam pum anga koh nan ‘Mizo’ tih thumal an lo hmang ve fo tawh a ni ngei ang tih he thawnthu hian a nem nghet niin ka hria (Kum 1850 vela Saikuti hla phuah nena ṭang kawp pawhin a rin theih a ni). Hetih hunlai hian Mizote chuan hunpui felfai taka ṭhenin CHAPCHAR KUT (ibid,59) pawh an lo hmang fo tawh tih a chiang bawk.

He thawnthua chhiartute kan rilru a dam kim loh fona chu, misualho (Villain) Khuala te, Remi nu te, Suaka leh Thangi te chunga hremna kan hmu tel ve lo leh Remi nu bik phei chu ngaihdama a awm leh si kha a ni. Chubakah, khawvelah chuan hming inang tam tak a awm thei, kan thawnthua a changtupa ber Hminga hming ngei chu naupang dang hming atana a hmehbel leh kher pawh hian a thawnthu takna a tibo deuh niin a lang.

4.CHARACTER LEH THEME BIHCHIANNA:

HAWILOPARI thawnthua a changtute hian belh chian an dawl hlawm viau. He thawnthuah hian theme langsar tak mai chu ṭhian inhmangaihna (Friendly love) a ni. Hawilopari pa leh Hminga pa te kha an tlangvallai aṭang tawha ṭhian inhmangaih tak an ni a. Atir aṭang rengin thlah lovin an inkawp chawt a. Hminga pa a damloh a, a taksa a chauh em em hnuah pawh Pari pa chuan a theih chhung chu a buaipuiin a chhawm dawl zel a. Hminga pa thuchah hnuhnung vawngtu pawh Pari pa hi a ni.
Hawilopari te ṭhianho leh Hminga te ṭhianho pawh hi a thawnthu tawp thlenga rinawm tluan parh an ni a. Kum sawm lai inhmu lovin awm mah sela, a tawpah an rinawmna rah chu a tawpah an seng leh ta ṭheuh a nih kha. He thawnthua mi pawimawh berte zinga mi, Zema phei chuan a ṭhiante tan a nunna a hlan ta hial a, chu chu Hawilopari leh Hminga te pahnih tana kawng sattu a la ni ta zel a. ‘|hian hmangaihna’ tilang tur hian Zema chu a ṭul huna danglam thei (Round Character) ni turin a duang a. Pawite a nihna chu thiam taka hmang ṭangkaiin, he thawnthu tingaihnawmtu leh tihlu zual tur hian mi chak leh huaisen tak, rem hre bawk si a ni zel bawk a. Zema tih loh changtu dangte hi chu Flat character deuh vek an ni.

He thawnthua a changtunu ber Hawilopari hi ngaihzawnawm takin a duang a, hmeichhe satliah lo, mi biang biak thiam, ti zawk zawk lo a ni a. Hminga mai pawh ni lo, a khawtual tlangval dang Khuala pawhin a ngaihzawn em em a ni a. Khuala hi Hawilopari rinawmna lo lan chhuahna atana mi ṭangkai a ni zui ta zel bawk. Misual(Villain) tel lo se chuan he thawnthu hi chu a tluang purh ta ve ang. Mahse, Hawilopari tana Hminga hmangaihna rinawm, chuai ni awm lo lan chhuahna a ni leh ta zel a. Hawilopari leh Hminga te karah leh an ṭhian dangte karah pawh lungdi hmangaihna (Romantic Love) kan hmuh belh zel a. Hawilopari’n an zavaia ṭhat tlanna tur zawk nia a ngaih avanga an thuruk, a nu leh pa hnena a sawi tak pawh kha Hawilopari rinawm loh vang ni tawh lovin, a kaw tawpah a ṭang tawh a, thil ṭha zawk a duh vang a ni a tih theih awm e. Englai pawhin an ṭhian kal ta te an hre reng a, kum kha leh chen an thuruk an vawnsak a, midang hriatpui hauh lohva na tinreng an lo tawrh ngawt ngawtna (Stream of Consciousness) kha a tawpa an vanneihna thlentu, rinawmna rah a ni tho tho.

A changtupa ber Hminga pawh tlangval hleitling leh zaidam tak, thil a tih dawn reng renga ngunthluk taka ngaihtuah hmasa phawt ṭhin a ni tih chu, khua an chhuahsan hma aṭanga a u Zema hnena a thusawi aṭang pawh khan a hriat theih a ni. Tichuan, ram hla takah an kal a, a unaupa Liana a hmangaihna, thisen zawm hmangaihna (Parental & Filial Love) vangin amah pawh dinhmun khirh takah a awm a ngaih phah ta a. Amaherawhchu, he thawnthua theme pawimawh ber chu he hmangaihna hi a ni. A nau Liana hrehawmna chu phurhpuiin, he thawnthu inhawnna leh a tawp thlenga kang ve ngai lo chu a ni. Hminga’n Hawilopari a hmangaihna pawh hi a nep bik chuang hauh lo. Mipa dik tak a nihna lan chhuahtirin, a unaute hriat lohvin Hminga chu Hawilopari tlawh chhuak turin a feh chhuak ta a. A u Zema takngial pawh a hrilh lo, kha leh chenah a tihbuai nasat tawh avangin mipa taka mahnia kal mai kha a finthlak zawk rêng a ni. Chu chu Zema ropuina lo lan chhuahna hmanrua a ni zel bawk a. A tawp thlenga Hminga nungchang, a thinlung leh a ngaihtuahna danglam ve lo (Flat Character) hi he thawnthu tawpna chu a ni ta.

Kan sawi hmaih hauh loh tur chu Hminga te khaw lal fapa Chhana hi a ni. Khaw khat lal fapa, nakina a pa aiawha roreltu la ni mai tur, a ram leh a khua, a chhungkua kalsana Hminga te unau kalna lama thutlukna felfai tak siama a zui mai duh te hi fakawm tak a ni. Dinhmun leh thuneihna (Status & Power) pawhin a nunah ro a rel phak lo, a rilruin ngunthluk takin a ngaihtuah a, a tumah a chiang a ni. He tlangval nuna kan hmuh chian em em mai chu ‘rinawmna’ leh ‘ṭhian hmangaihna’, ‘inngaihtlawmna’ leh ‘dawhtheihna’ a ni.
Dinhmun leh thuneihna chungchang kan sawi ruala sawi hmaih hauh loh tur chu Khualluta hi a ni. Khuala hi chu lal khawnbawl upa fa a ni a, a dinhmun leh a nihna hmanga Hawilopari chungtlakin neih a tum a, ruahmanna tenawm tak nen, a hunlaia hmeichhe chunga hmingchhiatna tawp khawk chu a thlentir duh a. Mi laktlak loh tak, mahni induh tawkna pawh nei lo mi chapo si a ni. A sangawi zawnpuite pawh an la awm cheu, thawnthu tihlawhtlingtu misual (Villain) tak tak – Remi nu (Hminga leh Liana te nuhrawn) te, Thangi leh Suaka te pawh midang tihchhiat tum reng renga hmanhlel, ‘thikna’ leh ‘huatna’ hmanga rorel tlat ṭhin, character azawnga chhe ber mai te an awm bawk.

Character leh Theme chungchangah chuan duh tawk dawn ila. A hmawr bawkna atan, ‘Hawilopari’ tih thawnthuah hian a ram bial huam chhunga thil thleng leh khawsak dan kan hmu a, Regional Novel a nih rualin, Mizo nunhluia innghat thawnthu (Historical Novel) a ni kan ti thei bawk ang. Kan sawi tak zawng zawng kha chhiartu dangte ngaih dan a ni vek kher lo thei, engpawh ni se Biakliana’n hetiang taka lehkhabu rotling leh hlu Zofate min lo hnutchhiah hi a ropui a, he lehkhabu hmang hian hriat reng a hlawh tawh ngei ang.

Lehkhabu rawnte:

1) Biakliana – Hawilopari, first edition, 1983.
2) Khiangte, Laltluangliana, Dr. – Biakliana Robawm, LTL Publication, 2011 edition.
3) Lalhluna, R.K. – Mizo History Kamkeuna, An introduction to Mizo History, J.P. Offset Printers, 2013 edition.
4) Theory of literature, Three Year Degree Course, Department of Mizo, Mizoram University, 2013 edition.
5) Khiangte, Laltluangliana – Thuhlaril, 2005 edition, Felfim computer.


6) Lalthangliana, B. – Ka lungkham.
7) Vannghaka, K.C. – History of Mizo Literature, Three year degree course.

 

Leave a Reply

Your email address will not be published. Required fields are marked *

error: Content is protected !!