Good Friday awmzia leh an hman tan dan

Source : Kohhran Ni Pawimawh
By Rev. Dr. Dengțhuama

Good Friday hi Kristiante ni pawimawh tak a ni a. Kum tin kum bul lama hman țhin a ni. He ni hi Lal Isua khawvel sual tlan nana a nun pea khenbeha a awm hriat rengna ni atan Chawlhni angin khawvel pumah kristianten kan hmang țhin a ni.

Good Friday awmzia : Good Friday hi a awmzia kawng hnihin an sawi țhin a, hetiangin :

*A awmzia pakhatna : Good Friday hi a hming hmasa chu “God’s Friday” (Pathian Zirtawpni) tih a ni an ti a. God (Pathian) tih kha “Good” tia an thlak chhan chu Isua thihna leh thawhlehna hmanga Pathianin kan tana a hnathawh chu a țhat em avangin “God” tih aiah “Good” tih hman a ni. Pathian chuan nun thar min pe a ni. Sapțawng hmanna ramah chuan he ni hi “Good Friday” an ti deuh bik a. Ram țhenkhatah chuan “Zirtawpni Rei” (Long Friday) tih te, “Inbuatsaihna Ni” (Day of Preparation) tih te, Lalpa Lungngaihna Ni (Day of the Lord’s Passion) tih te, “Kraws-a Tuarna Ni” (Passion of the Cross) ti tein an sawi bawk.

A awmzia pahnihna : Good Friday tih awmzia sawi dan dang leh chu “Good” (Țha) tih chu “Holy” (Thianghlim) tihna a ni bawk; mahse “Good” tih leh “day” tih inzawm dan hi chhui chhuah theih a ni lo. Good Friday (Zirtawpni Țha) kan sawi tawh angin God’s Friday (Pathian Zirtawpni) tih ațanga lo kal kan tih khan sapțawnga “Good Bye” tih ang deuh a ni. Mi hnenah “Good Bye” kan tih chuan “Pathian i hnenah awm rawh se” (God be with you) tihna a ni. Good Friday kan tih hian “Lungngaihna lo thleng chuan thil țha ber a hring chhuak e” tihna a ni. He ni hi Lungngaihna Zirtawpni (Mourning Friday) te pawh ti ta ila, Kristiante kawng zawh chu tuarna kawng (Kraws kawng) hlir a ni ang. Good Friday (Zitawpni Țha) kan tih erawh chuan Kristian kawng zawh chu Pathianin a enkawl, a khawngaihna leh a hmangaihnaa tuam tih a entir a ni.

Lungngaih hapta : Good Friday hma Thawhțanni ațanga he ni hapta chhung hi “Lungngaih Hapta” tih a ni a. Kohhran țhenkhat chuan Good Friday ni hian Krista tuarna țawmpuina entir nan chaw an nghei țhin.

Frigg’s day ațanga lo kal : Friday (ni ruk ni) hi Frigg’s-day ațanga lo kal a ni an ti bawk. Frigg (or Freya) tih chu “pathian Odin nupui” tihna a ni. Chu chuan a entir chu Norway mite thawnthua “hmangaihna leh mawina” (love and beauty) tih a entir a. Rom miten hmangaihna pathian nu “Venus” an tih nen thuhmun a ni. He ni hi “pathian nu Venus” tana inhlana ni a ni. Judate tan chuan Sabath ințan ni a ni a. Kristiante tan chuan Isua kan tana kraws-a a tuarna champha (anniversary) a ni.

Isua thih ni : Kohhran Pa Irenaeus-a leh Tertullian-a te chuan Good Friday hi Kalhlen Kût ni (The Day of the Pasch) an ti a. Mahse, a hnu lama lehkha ziaktuten (writers) hmun hnihah an țhen a, “thih ni” leh “nunna ni” an ti a. Nunna ni chu Isua thawhlehni a ni a. Kristiante tan chuan “Isua thih ni” (Khenbeh ni) a ni. “Thawhleh ni” hi kût hlun tak a ni. Hun hmasa lamah chuan Kristianten “Zirtawpni apiangin chaw an nghei țhin. (Matt. 27 : 25 – 26; Mk. 13 : 33 – 40; Lk. 23 : 44 – 49; Joh. 19 : 28 – 30).

Good Friday hman dan : Kum zabi palina ațang khan an hmang țan a. Lal Constantine-a hun ațangin “holy day” angin an hmang tawh a. Kum zabi 4-na tawp lamah Jerusalem-a chengten Isua Kraws ngaihhlutna leh zahna an nei tawh tih lehkhabu pakhat “The Pilgrimage of Etheria” an tihah a chuang a. Kum zabi 6-na leh 7-na ațanga kar tin Lalpa Zanriah Sakramen an kil tak khan Zirtawpni chu Bible chhiar a, țawngțaia chaw ngheina ni atan an hmang a. Kohhran siamțhatna hun a lo her chhuah khan țawngțaina bu a lo chhuak a, chutah chuan Good Friday nia chhiar tur Chanchin Țha bua mi leh Lehkhathawna nite an la chhuak a. England ramah chuan Queen Victoria hun lai khan Good Friday-ah Lalpa Zanriah an kil a. Mahse, Lalpa Zanriah kil bansan a nih hnuah Kraws-a Isua thusawi pasarih hmanga inkhawmna urhsun tak hman a ni a. Britain ramah chuan Good Friday-ah Office khar a ni a. Roman Catholic Kohhran te, Anglican Kohhran te leh Protestan Kohhran țhenkhat te chuan Isua Krista tuarna hriatreng nan darkar thum chhung Biak Inah inkhawm an hmang țhin a ni.

Maundy Thursday : Good Friday hma Ningani hi “Maundy Thursday” an ti a. “Maundy” tih awmzia chu “Thupek” (commandment) tihna a ni. Ningani zana Isuan a zirtirte hnena a thupek kha a entir a. Isuan a zirtirte hnenah “Thupek thar ka pek che u hi, inhmangaih ula, keiin ka hmangaih che u ang hian nangni pawh inhmangaih ula,” (Joh. 13 : 34) a ti a. Isua thupek chu “Inhmangaih ula” tih hi a ni. Zanriah an kil lai khan “Mi hriatreng nan hei hi ti țhin rawh u” a ti a. Hemi zan bawk hian Isuan a zirtirte ke a silsak bawk a. Krisrtian lo din tirhah khan Isua thupek angin inngaihtlawmna entir nan Lalpa Zanriah kil dawnin ke an insilsak țhin. Kohhran țhenkhat chuan tun thlengin ke insilsak an la ching a ni.

Leave a Reply

Your email address will not be published. Required fields are marked *

error: Content is protected !!