Lehkhabu hming – Lungrang Laiawrha
Ziaktu – Lalhmingliana Saiawi
Chhuah kum – 1993, 1998 rpt.
Phek – 185
A man – Rs. 80
Genre – Novel

Lungrang Laiawrha thawnthu hi Mizorama Kristianna rawn luh hlim leh khawvel Indopui pakhatna ṭan tirh lai vel aṭanga inṭanin he thawnthua mi langsar ber chu thawnthu hming putchhan Lungrang Laiawrha a ni a, thawnthu khaikhawmtu ber erawh Laiawrha nu Chhuahthangi a ni thung. Lalhmingliana Saiawi thawnthu ziahte hi chhungkaw thawnthu tih mai theih a ni a, a thawnthu ruangam (plot) aiin changtute an langsar zawk fo a, character a din ṭhat theih em avangin plot hliah khuh thei khawpin changtute an langsar thei ṭhin a ni. A thawnthuah hian chhungkaw nunphung te, inhmangaih tawnna hlutzia te, mi hlauhawm leh vantlangina an thinhrik mihringte pawh hi mi khawngaihthlak ber ber an lo nih ṭhinzia te kan hmu a, mihring nun enfiahna darthlalang ṭha tak a tling a ni.

Lalrammuana Sailo, Lungrang Laiawrha, Lungrang Hmangaihna, Lalhmingliana Saiawi,

Indopui pakhatna laiin Saihum khaw Lalpa chuan a khua aṭanga Frace rama indonaa kal tur mi pathum thawh ve a tum a, chung zinga pakhat chu Huliana a ni. Saihum khaw nula hmelṭha Chhuahthangi chuan an rin loh takin Darkhuma fa a lo pai reng mai a, mahse Darkhuma chu sakei hliam an beihnaah a thi ta mai si a. A chhungte leh a hnam hming takngial pawh chhui hleih theih a ni lo a, chuvangin Chhuahi fa chu Lungrang Laiawrha tiin an ko a, a pian hlima a lai a awrh avangin, Lungrang chu pitar pakhatin Darkhuma te hnam hming nia a sawi deuh vang a ni. Saihum khaw naupangah chuan Sakawlhi an tih mai a awm a, a nu pawh nu nasa leh hlauhawm tak a ni a. An naupan laiin Sakawlhi leh Laiawrha te chu an insual nghe nghe a. Nulat tlangval an han hria a, Laiawrha chuan an khaw nula to Laleni chu a rim ve ṭhin a, nupuia neih mai pawh a rilruk laiin Laleni chu mikhual laka chesual anga thu a than avangin palai an tirh zet hnuah Laiawrha chuan Sakawlhi zawk neih a tum ta thut a, Laleni mangangin Laiawrha hnenah nula thianghlim a nihzia lantir nan a lo inphal ve leh a, mahse Laiawrha leh Sakawlhi te chu an innei ta tho a. An inneih hnu chuan zan khat chu Sakawlhi chuan mumang a nei a, a mumangah chuan Laiawrha chuan a lo um hrep mai a, tin, amah Sakawlhi nu ngei pawh chuan Sakawlhi nau pawm chu kawkin ‘I fa a nih loh kha’ a lo ti bawk a.  Sakawlhi chuan Laiawrha chu chan a hlauh vang ni maw, a rilru a mangang ṭhin niin a hriat a, Laiawrha erawh chuan Pathian hmaa inneih thu ka tiam tawh a, chuvangin ka nupui i ni a, lan thei che tumah an awm lo. Kut pawh ka thlak ngai lo ang che tiin Sakawlhi chu a thlamuan a.

He thawnthu hi thawnthu inzawm kan tih ang chi a ni a, he thawnthu hian a zawmna Lungrang Hmangaihna a nei a, chu chu 1995-ah chhuah a ni.

Contributor – Lalrammuana Sailo

 

1 thought on “Lungrang Laiawrha

  1. In ti lawm awm hle mai a novel hmasa ber chanchin in rawn ziak hi. Kan chhung hmingin lawmthu ka hrilh che u

Leave a Reply

Your email address will not be published. Required fields are marked *

error: Content is protected !!