LALSANGZUALI SAILO (1949 – 2006)

Lalsangzuali Sailo hi kum 1949, May ni 15 khan S.Vanchhuma leh Sapthangi Chawngthu te fa 11 zinga upa ber atan Thingsai khuaah a piang a. Kum 1978, June ni 27 ah Laldinliana nen Mission Veng Kohhran Biak Inah inneiin fa pathum, mipa pahnih leh hmeichhia pakhat an nei a, Aizawl Nursery Vengah an chhungkua in an khawsa a ni.

Lalsangzuali Sailo hi hla phuah leh zai thiam tak niin zai lamah All India Radio ‘A’ Grade Artist a ni a. Hla hi 365 phuah tawhin tam tak chu aman a sa a. Radio-ah hla 450 chuang a record tawh a, chung zinga 297 chu ama phuah niin zaithiam hrang hrangin a hla 86 an sa bawk a, a hla phuah tam tak sikul leh zirna sang zawkahte zir a ni bawk.

Lalsangzuali Sailo,Lalsangzuali Sailo thlalak, Lalsangzuali Sailo photo, Padma Shri Lalsangzuali Sailo,
Lalsangzuali Sailo

Audio Album hi 29 tichhuak tawhin kum 1977 khan a mimal audio album tichhuakin Mizo zinga mimal audio cassette siam hmasa ber a ni a. Zai leh hlaphuah a thiam avang hian chawimawina chi hrang hrang hriat theih chinah 12 zet a dawng tawh a. Kum 1975 khan milar thlan hmasak berah Mizo hmeichhe lar ber ‘Women of the Year 1975′ chawimawina hlan a ni a. Chawimawina a dawn dang thenkhatte chu kum 10 chhung Mizo hmeichhe thu leh hla thiam bera thlan niin, 1991, 1992, 1996-ah te hla phuah thiam ber lawmman a dawng a. 1998 khan AIR Outstanding Award chawimawina hlan a ni a, kum 2000 khan kum 100 chhunga zaithiam ber (Greatest Singer of the Century) Award hlan a ni.

Mizo literature lamah a thawh hlawkin lehkhabu thahnem tak a ziak bawk. Lehkhabu 25 leh Thelep lehkhabu Bu 3 ziakin kum 1999 khan ‘Tlawm Ve Lo – Lalnu Ropuiliani ’ tih a ziak atangin Mizo Academy of Letters (MAL) chuan Book of the Year chawimawina  a lo pe tawh a ni. Heng bakah hian a lehkhabu ziak avangin chawimawina thahnem tak pek a ni bawk. India khua leh tui te chawimawina sang Padma Shri in Literature chu India President K.R.Narayanan chuan April ni 12, 1998 khan Rashtrapati Bhawan, New Delhi-ah a hlan a ni. A damlai pawhin a chanchin an ziakin a hlate pawh a bua chhuah a ni tawh ṭhin a, mahse a phuah belh zel a. A thih hnu hian a hla phuahte dah khawmna bu Lalsangzuali Sailo Hla-te tih chu kum 2007 khan a pasal Laldinlianan a chhuahsak a ni.

Zirna lamah chuan St.Paul’s High School, Aizawl. St.John Bosco’s Convent, Cherrapunji leh St.Mary’s College, Shillong-ah te zirin 1972 khan B.A (Honours in Education) a pass a. 1981-ah B.Ed zovin AD 2000 khan Himachal Pradesh University atangin M.A (History) a zo leh a ni.

Hnathawhna lamah chuan kum 1973 Feb 1 khan sawrkar hnaah zitrtirtu hna thawkin a lut tan a. Govt. JL Higher School-ah rei tawk tak zirtirtu hna a thawh hnu-ah Aug. ni 21, 2002 ah Headmistress-ah a kaisang a. Kum thum a thawh chhunzawm hnu-ah Govt. Aizawl High School-ah May ni 19, 2005-ah a thawk leh a. Feb. ni 17, 2006 khan Govt. Comprehensive Model School, Model Vengah sawn leh a niin a thih ni thlengin he school-ah hian a thawk a ni. October ni 16, 2006-ah thluaka thisen zam puar (Aneurysm) vangin a a boral a, Mizo thu leh hla khawvela Arsi lian tak pakhat taksa chu vui liam a ni ta a ni.

Lalsangzuai Sailo
Lalsangzuali Sailo

 

Leave a Reply

Your email address will not be published. Required fields are marked *

error: Content is protected !!