Biakdika (BDA) – (1973 – 2009)

Biakdika, a hming lam tawia BDA tia koh leh hriat lar hi kum 1973-ah a piang a, 2009-ah a boral a. Hla hi 130 bawr vel a phuah a. Lengzem hla leh Pathian fakna hla a phuah ve ve a.  A Pathian fakna hla phuah zingah Eldorado, Riangvai fate, Daffodil, Khawngaihna, Min hriatrengna hi, Babulon, Thim leh eng, Ka vahvaihna khawvel,  Kraws kawng, Khaw thianghlim Jerusalem leh a dang tam tak a tel a. A sa lartute zingah Rebecca Saimawii te, Saizikpuii Sailo, Jennifer Vanlallawmawmi, R. Lalbiaksanga leh mi lar tak takin a hla an sa a ni. Tin, lengzem hla phuah lamah pawh Mizo zinga a thiam berte zinga tel phak a ni a. A hla phuah tam tak zingah ‘Ka hmangaih che, I chuai ta maw?, Lungrun, Zo barbie, Zoram hmangaihtu, Sakhmel mawi’ tih leh hla dang tam tak a phuah a ni. A sa lartute zingah Daduhi te, H. Lalmuankimi te, Lalngengpuii te an tel a ni.

Biakdika hla kalhmang kan hmun langsar tak pakhat chu khawharna hi a ni a,  A Pathian hla tam tak chu Vanram ngaih ngawih ngawihna hla a ni. A lengzem hlaah te pawh khawharna leh lunglenna kan hmu nasa a. Tin, a hlaa hmuh hmaih theih hauh loh chu mi inngaitlawm tak a nihna hi a ni. Biakdika hi vawi khat mah hmaichhanah ka kawm lo a, a dam laiin a thu leh hla ka ngaihven hek lo, mahse a hla ka en chuan mi nunnem, mi inthlahrung, mi inkiltawih, a hmel duh zawng nula pawh phu lo em emt nia inhre tlat a ni a, a khawngaihthlak ang reng hle. He a mizia hi a Pathian hlaah pawh a hmuh theih a, Pathian tana tling lo, a mit hmuha misual leh ngaihdam ngai niin a inhria a, chu chu a hlaah a lang nasa em em a. Vanram a kal chak chhan pakhat pawh lei chu a tan ṭahna leh lungngaihna a nih vang a ni a, a lungngaih chhan chu sual vanga tling lo nia a inhriat vang a ni.

Bda hian hla phuah a thiam a, a hla hi a lungleng a, a khawharna hi khawngaih tlak a ni a, a inngaihtlawmna hi a ngainatawmna ber tur a ni.

-Lalrammuana Sailo. Dt.9th April 2020

Biakdika, Bda hla phuah thiam, Hla phuah thiam biakdika, Hla phuah thiam Bda, Biakdika, Hla phuah thiam Lalbiakdika,
Biakdika (Bda)

Leave a Reply

Your email address will not be published. Required fields are marked *

error: Content is protected !!