Folk inheritance and value system in Mizo

Lalrammuana Sailo
17 Dec. 2015

Thuhmahruai: Hnam tin hian ngaihsan zawng leh ngaih pawimawh zawng an nei ṭheuh a, an chenna ram leilung, sik leh sa, anmahni hual vel tu thing leh mau leh ramsa te leh an chhehvela cheng hnamdangte awmdan chuan an khawsak danah kawngro suin an ngaihsan zawng thlengin chung thilte chuan a nghawng ṭhin. Entirnan, indona leh hmun ralṭi a awm te tan chuan Pasalṭha an ngaihsanawm ṭhin a, chutih rualin hmun ralmuangah erawh mi khawsa thei leh hmelṭhate an ngaihsanawm ṭhin. Tun hma Mizo khawtlang nun chu in tlem te teah Lal hran ṭheuh neia khawsa an nih hlawm avangin an khawtlang inenkawlna kawnga pui thei tur leh an inawpna atana ṭangkai thei tur tein dan an zam ṭhin a, an puithuna leh serh leh sang te pawh an nun hona atana ṭangkai thei tur anga zam a ni fo. Mizote chinphung tam ber chu thlahtute aṭanga an inhlanchhawn a ni a, chungte chu Zawlbukah upa zawkte titi aṭang te in leh nu leh pate aṭangin an zir chhawng ṭhin a ni. Tun ṭumah hian Mizo pi pute aṭanga inrochun thil ṭhenkhat leh an ngaihsan zawng thilte chhui chhuah kan tum dawn a ni.

Folk inheritance: Folk inheritance hian pi leh pu aṭang inhlanchhawn thil tihna a ni mai a, tahchuan, in sak dan, eizawn dan, thiam thil, chin dan phung, puithuna, thawnthu leh hla te thlengin a huam thei ang. Kan khung duh chin a zira a huang a zau theih em avangin a chipchiarin kan sawi hman dawn lo a ni.

Thuneihna: Mizo chhungkua leh khawtlang chu mi pa rorelna a ni a. Dinhmun pawimawh zawng zawng – Lal,  Upa, Bawlpu, Sadawt, Tlangau, Thirdeng hna chu mipain an chelh a, chhan eng emaw avanga lal nihna hmeichhiain an lo chelh ve zeuh erawh a awm tho. Entirnan, Ropuiliani te ang te kha. Khawtlang inawpna atana pawimawh tak pakhat Zawlbukah chuan hmeichhia an kal ve ngai lo. Mipa leh hmeichhiain chanvo an insem fel a. Hmeichhiain inchhung khawsak rel, tuichawi, buhden, eirel an ti vek a, an pasal ten an tihpui ngai meuh lo. Chutih rualin mipa chu lo vat tu a ni a, ral leh sa hlauhawm laka a nupui fanaute leh khawtlang venghimtu a ni thung.

Sakhua:  Mizo sakhua thlahtute aṭanga inhlanchhawn zel a ni a, hnam tinin sakhua bik an nei a, an biak dan kalhmang a hrang hret hret a. Sakhaw puithiam chu sadawt an ti a. Lusei pain Ralte sakhua a be ngawt thei lova, Ralte hnam ni ve loin Ralte sakhua a biak duh chuan Ralte hnamah a inleh phawt a ngai a ni. Pathian chu vanah khian chengin an ring a, an ṭawngkamah te pawh ‘chunga Pathianin bawkkhupin min thlir reng’ tihte an nei ṭhin. Sakhua an biakna kawnga an thlen theih sang ber chu an thih hnua ‘Pialral’ thlen theih a ni a, chu chu hna thawh hah ngai tawh lova awm theihna hmun nia an rin a ni. Chumi tur erawh chuan ‘Thangchhuah’ an nih ngei a ngai thung. Tin, thlarau dang pawh awmin an ring a, tlang lian deuh te, lui lian deuh te, dil te, kham te leh thil dang dang te hian ‘huai’ neiin an ring a, an hlau hle ṭhin. Chung huai te chuan tina theiin an ring a, an be tlawn bawk ṭhin. Tin, an dam loh pawhin eng emaw tinatu awmin an ring a, tihlungawi tumin ‘Bawlpu’ an inthawi tir ṭhin bawk.

Incheina: Hmanlai Mizote chuan anmahni kutchhuak hmangin an inthuam ṭhin a, a siam hna chu hmeichhe mawhphurhna a ni thung. Kan thawnthu te kan en chuan Ngaite, |uanpuii, Kungawrhi, Tumchhingi, Vanchung nula te thawnthu leh a dang dangah hmeichhiate inthuam dan kan hmu a. A langsar deuh chu  ṭhi te, ngun leh banbun te, dawhkilh, samkhui leh bengbeh te a ni.

La hmanga puan siam an thiam hma chuan hrui hmangin an hak tur an siam a, hmeichhiain Siapsuap sinin mipain Hnawhkhal an ha a. An lo changkan deuh hnu chuan an inchei dan aṭangin an nihna pawh a hriat theih chang a awm ṭhin. Entirnan, miin ‘Tawlhloh puan’ a sin chuan mi huaisen a nih a hriat a, ‘Thangchhuah kawr’ a hak chuan mi ropui, pialral thlenga ropui tur a ni tih a hriat theih a ni, ‘Ngotekherh’ an hak chuan hunpui eng emaw an hmang tih a hriat theih bawk. Tin, Lusei chuan an tukhum lamah an sam an zial a, Pawi ho chuan an chhipah an zial thung a. Miin ‘Vakulchang’ a tawn chuan amah chu Lal a ni emaw a sa kah hmanga khawtlang lo hrai tawhtu emaw a ni tih a hriat theih a, ‘Chhawn’ a tawn chuan ral that tawh a ni tih a hriat theih a, ‘Zawngchal’ leh ‘arkeziak’ hmanga inchei thei te chu ral beihnaa kal tawh mi hmingṭha an nih a hriat theih a, heng mite hi chu mi naran tan cho mi an ni lo a ni.

Nupui pasal Inneih leh inṭhen dan: A tlangpuiin Mizo danah mipain nupui a duh chuan a nupui tura a duh nu leh pate hnenah chuan palai a tir ṭhin a. An inrem theih chuan inneih hun tur leh man leh mual te an sawi fel ṭhin. Hmeichhia chuan man a nei a, K. Zawla ziah danin hnamchawm chu se li leh se nga manin an kal ber a, Pachuau leh lal chi dang chu se sarih manin an kal a, Sailo erawh chu lal lo mah se, se sawm manin an kal ṭhin a ti. Heta sial tih hi tlai sial (Rs.20) a ni a, se nufa erawh chu Rs. 60 a ni. Tangka an hman hma chuan man atan Silai te, Fei te, |hi leh Dar te, an inremna ang apiang an inpe ṭhin. Hmeichhe man chu a vua leh vang leh laina ten an ei ṭhin.

Mipa chuan a nupui chu a neih duh tawh loh chuan a man zawng zawng pe kim vekin a ‘Ma’ thei a, chutiang bawkin hmeichhia pawn a man zawng zawng pe let vekin ‘Sumchhuah’ in a ṭhen thei. Tin, heng bakah hian mipa leh hmeichhe inkar boruak azirin ‘Uire” vanga inṭhen dante, ‘Kawngkasula mak’ te, ‘Sumlaitan’, ‘Peksachang’ leh ‘Sazumeidawh’ a inṭhen dante a la awm bawk a.

Rochun thu leh hla:  Rochun thu leh hla (Folklore) huangah hian Mizo literature hi a hausa hle a. Hla lam a ni emaw, thawnthu lam a ni emaw, thufing leh puithuna lam pawh nise zirchian tham tak a awm ṭheuh a ni. Mizo hla hlui hmasa te chu a tlangpuiin hun bik- Chawngchen, Chai leh Mitthi inah te an sa ṭhin a, a hnu lamah mimal hming chawi hlate leh lengzem hlate a lo chhuak leh bawk. A tlangpuiin hla hmasa te chu hmun leh hmuna phuahchawp (Spontaneous overflow) a ni ṭhin. Thawnthu leh mi chungchuang te chanchin te erawh chu Zawlbukah te upa zawkin naupang zawkte an hrilh a, nuin a fate awih mut pahin a hrilh ṭhin bawk a. Heng thawnthu te hi chhuan tam tak lo paltlang tawh a nih avang hian a ngaihnawm lo lai leh  pawimawh lo lai nia an hriat apiang an hlawi ṭhen zelin a rinawm a, chuvang chuan a ngaihnawm a, a tak a, chhinchhiah leh zirchian dawl tak a lo ni zel tawh a ni.

 

Mizo te thil ngaihsan zawng:

Hausakna: Liandova te unau kha fahrah rethei tak, mite hmuhsit em em mai an ni chung khan an lal fanu Tuaichawngi khan Liandova te unau an lo hausak tak thu a hriat hnu kha chuan Liandova kha pasalah hial a thlang a. Retheihna leh mite hmuhsitna ata an dinhmun siam ṭhatu ber pawh an mizia ni loin an hausakna kha a ni. Chu chuan hausakna an ngaih pawimawh ve zia leh an dahsanzia a tarlang chiang hle.

Hmanlai Mizote khawtlangah chuan hausakna tehfung langsar tak te zingah Buh, Sial, Ṭhi, Dar neih te a tel a, a hnu lam deuhah chuan Silai pawh. Hausa te inelna leh inphochhuahna chu khawtlang hrai tam thei nihah a ni a, hausakna chu kawmpui mai loin vantlang tan malsawmna nih tumin an inhmang chhuak ṭhin a ni. Khuangchawinaah chuan heng Ṭhi, Dar, Pawisa, Bel, Darkhuang leh Silai te hi mipuiten an lo lak turin an vawrh darh chuai chuai a, midangten an zar an lo zo ve ṭhin a ni. Chu chuan an hausakna a tihlan chian rualin an dinhmun siamna a ni bawk. Mizo hla hlui kan en chuan Mangkhaia Zai aṭangin Mangkhaia te chhungkaw hausakna, an ṭhi leh dar ngahna chu tlangthang hial khawp a ni tih kan hre thei a. Khawnglung run ṭuma Pawi hoin sal atana an hruaite pawh kha an sal man chhungte chuan ro thilin rawn tlan leh tura an tihna an hla phuah aṭang hian a hunlaia an thil ngaihhlut te chu a hriat theih bawk. A hla hi lo tarlang ila:

In ngunte, ṭhite in Liando dar, hlawh ang in phal chuan e,
Lentlang liam hnu i tuai, bing ang a lo kir leh ang.

Pasalṭha: English mi ziaktu lar Thomas Carlyle-a chuan, “Mihringin harsatna tawngkhawng an tawh avanga chhanchhuah an ngaih hunah kawng hrang hranga chhantu tur Pathianin khawvel hmun hrang hrangah a khat tawkin mi chungchuang a buatsaih ṭhin” (qtd. in L. Keivom, Thukhawchang) niin a sawi a. Chumi atana Mizote hnena Pathianin an harsatna te chhawk zangkhai tura a pek chu pasalṭhate hi an ni. Kawng danga sawi chuan pasalṭhate hi mamawhnain a hrin chhuah, hnamin a koh chhuah mi huaisen leh tlawmngai chungchuangte an ni.

Hmanlai chuan Pasalṭhate leh Nula hmelṭhate hi an ngaisang em em a. Miin fa a neih a, mipa fa a nih chuan ‘Sa kap thei tur, ral lu la tur, nula ngai thei tur’ tiin ṭawngṭhain an chhilh a, mal an sawm ṭhin. Pasalṭhate chu an ngaisangin an ngai ropui em em a, khawi hmunah pawh awm sela, mi zah leh biakrawn an hlawh ṭhin. Pasalṭhate hi khawtlang tan an pawimawh em em a, Sakawlh leh ral laka khawtlang muantu an nih avangin miin an ngaisang a. Lal pawhin a pasalṭhate zara tlang ṭhut thei leh ral laka him a ni tih a hria a. Chuvangin an thu leh hla pawh a ngaichang hle ṭhin. Khawtlang tana pasalṭhate an muanpuiawm em avang hian pasalṭha neih hlutzia hriain pasalṭha hmingthangte chu lal dangte pawhin an khuaa pem turin an thlem fo ṭhin a ni.

Tlangvalte rual elna leh intihsiakna ber chu sum leh paiah ni lovin, in leh lo ṭha ni hek lovin pasalṭha nih kawngah a ni a. Tlangvalte duhthusam ram chu pasalṭhate khawvel a ni a, an mangphan ṭhin ber pawh ral leh sa laka an huaisenna leh chungnunna tih lan chu a ni. He rilru ropui tak hi Mizo hla hlui tam taka a thupui ber a ni bawk.

Nula ngai thei: Mipat hmeichhiatna chungchangah Mizo mipate chu a tam thei ang ber nula ngai tura ngaih an  ni a, chu chuan an thlarau nun thlengin a nghawng a ni. Nula ngai thei nih chu mipa tan inchhuanna a tling tak meuh a. Mi, nula ngai hman lova a thih chuan Mitthi khaw kawtchhuahah Pawlan a sairawkherh lianpui chuan a lo sai ṭhin niin an ring a. Chumi avang chuan Pawla sai pumpelh ngei tumin mipaten ṭan an la ṭhin a ni.  Mizo hla hlui pakhatah chuan,

Di nei lo Pawla’n a sai an ti.
Fam mah ila min sai bil tawh hlei lo’ng e,
Ka nemrang puan ṭial ka di zawnna

tih kan hmu a. He hla hian Mizo piputen thih hnu piah lam ram an rin dan a tarlan rualin mipat hmeichhiatna kawnga mipate rual elna a tarlang bawk. Mizo nunhluiah chuan mipate tan hmeichhe ngai thei nih hi thil ropui tak a ni a. Tlangvalte tan hmeichhe ngai thei nih chu inelna leh infiamna a tling. South Sabual khaw hlui, Mamit District-a thlan lung pakhatah chuan “NULA 16 A NGAI” tih an ziak tel a hial a ni.

Thangchhuah: Hmanlai Mizo nu leh pa, nula leh tlangval, pitar leh putarte duhthusam ber pakhat chu thangchhuah nu leh pa niha pialrala faisa ringa khawsak theih a ni. Hnam tin hian beisei ram kan nei ṭheuh a, kan pi leh pu te pawh kha an khawsak dan leh an puithunate thlir chuan mawlmang viaua an lan chang awm mahse an duhthusam ramah erawh hnamdang ang thoin thih hnua chawlhna ram awmin an ring a, chu chu ‘Pialral’ an ti a. Chuta kal thei tur chuan in lamah emaw ram lamah emaw ‘Thangchhuah’ nih a ngai a, chuta kalte tan chuan hnathawh hah a ngai tawh lova, faisa ringin thawk lovin an ei tawh zawkin an ring a. Chu hmun an suangtuah dan chuan an duhthusam sang ber ‘thawhrimna aṭanga chawlh an chakzia a lantir’ ni pawhin a sawi theih ang. Pi pute hmun ropui ber ‘Pialral’ chu Kristianten Vanram an suangtuah ang leh Greek hoin Elysium an suangtuah ṭhin ang hian mitin kal chakna hmun a ni a. Amaherawhchu chu hmunah chuan a thei leh tling fa Thangchhuah nu leh pa chauh an kal thei a ni.

Thangchhuah nih theih dan hi chi hnih a awm a, in lama thangchhuah leh ram lama thangchhuah te an ni. In lama thangchhuah tur hian mi neinung nih a ngai a. Sum leh pai nei kher lo tan pawh ranvulh leh buh leh bal lama hausak a ngai a. Chawnfangte, Sedawi chhunte, Zankhuang leh Mitthi rawp lamte an zawh vek a ngai a. Chung zawng zawng an zawh hnu chuan Khuangchawiin a hmawr an bawk ṭhin. Khuangchawinaah hian a tlem berah pawh sepa pathum, vawkpa pakhat leh vawkte pahnih talh a ngai a, sepui pakhat ‘tlangphal’ atan a ngai bawk. Heng thil zawng zawng hi an hlenchhuah theih chuan ‘Thangchhuah nu leh pa’ niin pialrala kal thei tawh tura ngaih an lo ni ta ṭhin a ni. Rev. Zairema chhinchhiah danin kum 1942-ah khan Farkawn lalin khuang a chawi a, kha kha khuangchawi kan hriat hnuhnun ber a ni ta a ni.

Pialral luh theihna kawng dang pakhat chu ‘ram lama thangchhuah’ a ni. In lama thangchhuah tur kha chuan mi neinung fal tan lo chuan a tlina han tlin chi rual a ni lo. Ram lama thangchhuah tur erawh chuan hausak kher a ngai lova, mi tam tak tak pialral kai ve theih an beiseina tinungtu a ni ngei ang. Ram lama thangchhuah nana sa kah ngai nia hriatte hi sawi dan a inang lo hlek hlek a, awmna hmun a zirin a danglam hret hret pawh a ni mai thei. A tlangpuiin Tumpang (Ramsial emaw Sele emaw) te, Savawm, Sakhi, Sazuk, Sanghal te hi thangchhuah nana kah ngei ngei ṭul a ni a, mi ṭhenkhat chuan Tumpang aiah Saza sawi tel zawkte pawh an awm. Tin, mi ṭhenkhat a thei fal deuh chuan ‘Thangchuang’ atan Rulngan leh Muvanlai te an kap ṭhin bawk. Miin hetiang a lo kah tel chuan pialral a luhna kawngah a Sazuk kah chungah chuangin sazuk ki hreuah chuan Rulngan chu a inkual ruah ang a, chung lamah vanlaizawl aṭangin Muvanlai chuan thlawh huala lo vengin ropui taka pialral lut turah an ngai a ni.

Thangchhuah nu leh pa chuan Mitthi khaw kawtchhuaha Pawla sai hlau lo leh inchhuang tak chungin an nun an hman theih phah a. An sakah emaw an khuangchawina chuan an thlarau nun thlenga awmzia nei phak tura an rin avangin chutiang ti hlawhtling thei te chu an ngaisang em em a ni.

Lal nihna leh dinhmun pawimawh dang an ngaihsan te:

Lal: A tlangpuiin khaw khat lal nihna chu thlahtute aṭanga inhlanchhawn a ni a. Dinhmun ṭha a nih avangin khua leh tuite pawhin an ngaihlu lo thei lo a ni. Dr. Laltluangliana Khiangte chuan Mizo lalte chungchang chu heti hian a sawi a, “Lalna an ngaihhlutzia chu tlang an insem chak danah a hriat theih. Kumpinu Sawrkar hnuaia an awm hnuah pawh lal te chuan lal nih zel an duh a, Sawrkar thu thua rorel tur pawh nise rorel chu an duh tlat a,” tiin. Hei hian thuneihna leh dinhmun an ngaihhlutzia a nemnghet hle awm e.

Khawnbawl Upa: Khawnbawl upa hi khawkhata pa challang leh dinhmun nei ṭha an ni a, chu ti ang dinhmun a ding thei nih chu an chak ṭheuh. Pa neinung leh chhungkaw hung deuh, pasalṭha leh lal vua leh vang hnaivai deuhte hi lalin khawtlang a awpna kawnga amah pui turin Upa atan a ruat ṭhin a. Lal Sadawt apiang chu Upa min ber chan chang a ni deuh zel a. Kawng engkima lal ṭanpuitu leh khawtlang hotu an nih avangin upate mawhphurhna pawh a sang ve hle. Lal leh Upate bakah Val Upa hi an zah hle a, Val Upa chu Mizo khawtlang nunah nihna pawimawh tak, a hun leh a hmun a zira roreltu a ni ṭhin.

Sadawt/ Puithiam: Sakhua an biaknaa serh leh sang khawihtu a ni a. A tlangpuiin khaw tinah Lusei an tam ber a, Ralte hoin an dawt a, Sakhaw thuah Lusei Sa leh Ralte Sa a danglam avangin sadawt an inhman ṭawm thei lova. Ralte hoin sakhua an biaknaa a puipa ber chu Puithiam an ti a, Lusei hoin Sadawt an ti niin Rev. Zairema chuan a sawi.

Bawlpu: Mi an dam lohin eng huai emaw tihnatah an inngai a, chung chu a thawi dam thiam an awm, chung ho chu Bawlpu an vuah a, a inthawina tihsak tur hian chi leh kuang bik an sawi lo. Sadawt leh Bawlpu te hi khaw khata pa fel leh fing, thil chik mi leh thil hre reng thei, ṭawng hmang thiam leh ṭawngkam bungraw ngah, mualkil pha an ni deuh zel a. Mite ngaihsan leh awh an ni phak a ni.

Hmelṭha: Hmelṭha an ngai sang a, nula mai bakah tlangval pawh hmelṭha tak chuan ngaihsan a hlawh em em bawk. Miin fa an neihin hmeichhia an nih chuan hmelṭha tak nia pasal a neih huna man tam tak man turin an duh a, “La deh thiam, sial man tur” tiin emaw an ṭawng thlamuan ṭhin. Hmeichhiate chu an hmelṭhatna leh an la deh thiamna te, an khawsak ṭhatna leh taimakna te chuan dinhmun sangah a hlangkai a, an ropui tehna ber pawh a ni.

Tlangval hmelṭha leh huaisen, lal ni bawk Lalvunga kha amah aia hmelṭha Lianchia nen hun khatah, khaw khatah an vanglai an hmang a. Nula te chuan Lianchia chu an dah sang zawk mah a. |umkhat chu Lianchia hovin nula leh tlangval rualin chawng an lo chen mup mup mai a, nula zawng zawng chuan Lianchia lam an hawi ṭhup a, khawkhat lal ve meuh ni si amah aia midang langsar zawk awm ta chu Lalvunga chuan ngai thei loin hla a phuah ta hial a nih kha. Lalvunga hla aṭang leh Lalvunga leh Lianchia te chanchin kan chhui chuan a hunlaia hmelṭhate boruak len tur zia a hriat theih hle a ni.

Miah Lianchi awm e, in sel e Lalvunga,
Tualah ngulrua ka bun, kawkvahai tlar na ngai.    

Tlangkawmna: Cicero chuan ‘kan pian hmaa thil thleng te ngaihven lohna hi puitling thei lova min siamtu a ni’ a ti a. Chanchin hlui zirchianna hian thil thar ṭha zawk hriat chhuahna min neih tir ṭhin rual hian min tifing var sawt bawk. Mizo ten an pi leh pute aṭanga an lo inhlanchawn sakhua leh khawtlang inawp dan, nupui pasal inneih dan, thuneihna inhlanchhawn dan, an inchei dan leh an thu leh hla inhlanchhawn kan sawi takte khi chhinchhiah a vawn ṭhat a zirchian hi a pawimawh awm em em a. Thangchhuah leh Pialral thurin chu chhawm nun tlak ni tawh lo mahse hausakna te, khawtlang tana mi inpe Pasalṭhate rilru erawh tun thlengin a la hlu reng a, he khawvel awm chhung chu hmelṭha te pawhin ngaihsan an hlawh reng dawn niin a lang. Mizo pi pu te khawsak dan, an thawnthu leh an rilru luah ṭhintu zir chian hi Mizo hnam lo ṭhan danglam zel dan hriat nan te a pawimawh a. Hnam dang te nena khaikhina an nep bik loh zia leh kawng tam takah an damkhawchhuahna atana ṭangkai thei tur chin dan phung tam tak an lo neihzia te ngaihtuah chunga Mizo pi pute nun hlui zir zel hi a hlawkthlak hle a ni.

 

Bibliography:

Chaldailova, R. Mizo Pi Pute Khawvel. Aizawl: Gilzom Offset. 2011. Print.

Chawngkunga, C. Sakhua. Aizawl: Department of Art and Culture, Govt. of Mizoram. 1997. Print.

College Text Book (Mizo) Editorial Board Publication. Fungki. Aizawl: Gilzom Offset. 2006. Print.

Dahrawka, P.S. Mizo Thawnthu. Aizawl: Synod Press. 2008 [Fifth Ed.] Print.

Department of Mizo, Mizoram University. Mizo Studies, A Quarterly Referred Journal.

Dokhuma, James. Hmanlai Mizo Kalphung. Aizawl:  Gilzom Offset. 2008 [2nd Ed.]. Print.

Keivom, L. Thukawchang Volume 1. Aizawl: Zolife Publication. 2011. Print.

Lalbiaknema, C. Zawlbuk Titi. Aizawl: Mizoram Publication Board. 2000. Print.

Lalhmuaka. Zoram Thim Ata Engah. Aizawl: Synod Publication Board. 1988. Print.

Lalthangliana, B. Culture and folklore of Mizoram. New Delhi: Publications Division. 2005. Print.

—_ India, Burma leh Bangladesh-a Mizo Chanchin. Swapna Printing Works (P) Ltd. Kolkata 9. 2014 [Revised & Enlarged]. Print.

—_Mizo Hun Hlui Hlate. Aizawl: RTM Press and Computer. 1998. Print.

Lianhmingthanga, Mr. Material Culture of the Mizo. Aizawl:  Tribal Research Institute. 1998. Print.

Malsawma, J. Zo- Zia. Aizawl: L.V Art. 2000. Print.

Mizo Academy of Letters. Thu leh Hla, A monthly Literary Journal of the Mizo Academy of Letters.

Mizo Academy of Letters. Zo Kalsiam: Aizawl: The RTM Press. 1997. Print.

Ruala, V.L. Zo Hnam Dan Deh. Aizawl: Technosys Offset, Aizawl: 2010. Print.

Thanmawia, R.L. Ngirtling. Aizawl: College Text Book (Mizo) Editorial Board. 2005. Print.

—_Mizo Hnahthlak Thawnthu (Tuanthu leh Ramsa Thawnthu) Vol-1. Aizawl: Dindin Heaven. 2009 [Reprinted].

Tribal Research Institute, Comp. Seminar & Important Papers. Aizawl: 2008. Print.

Zaikima, V.L. Bombay Fantasies. Aizawl: Lengchhawn Press. 1991 [3rd ed].  Print.

Zairema, Rev. Pi Pute Biak Hi. Aizawl: Zorun Community. 2009. Print.

Leave a Reply

Your email address will not be published. Required fields are marked *

error: Content is protected !!