FAPA PÊKIN KAN AWM TA

-K. Zalawma

Tin, chûng lai chuan heti hi a ni a, Kaisara Augustan khawvêl zawng zawng hming ziak tûr thu a pe a. (Chu chu Suria ramah Kurinia chu ram awptu a nih laia hming ziak hmasa ber chu a ni.) Tichuan, mi zawng zawng chu an hming ziak tûrin anmahni khua ṭheuhvah an kal a. Tin, Josefa pawh, Davida chhûngte leh a thlah a nih avângin, Galili rama Nazareth khua aṭangin Mari, a nupui hual, rai ṭeuh chung nên chuan hming ziak tûrin, Judai rama Davida khua Bethlehem an tihah chuan an kal ta a.Tin, heti hi a ni a, chuta an awm lai chuan a hrin a lo hun ta a. Tin, a fa tîrah mipa a hring a; puanin a tuam a, khualbûka an len ve tâk loh avângin ran chaw pêkna thlêngah a muttîr a. Luka 2:1-‬7
Fapa neitu chuan nunna chu a nei; Pathian Fapa nei lotu chuan nunna chu a nei lo.1 Johana 5:12.

Pathianin sualfate chhandam tura a Fapa Isua min pek chungchanga, Lal Isua a lo pian hun thuah hian thil chiang tak hriat a har hle. A chhan chu Rom sokar chanchin ziak dan leh Bible thu hi a inmil loh vang a ni. Luk chuan Isua pian hun hi Kurinia chu Suria rama Governor a nih laiin Isua hi a piang tih min hrilh a. Rom sawikar record dan chuan Kurinia Governor a nih lai hi A.D. 6-ah a ni, a ti a. A.D. 6,7-ah Kurinia hian chhiarpui a nei ngei tih ziak a ni bawk a.

Chanchin ziaktu Josefa sawi dan chuan, Heroda Ropuia rorel laiin Isua hi a lo piang a, Heroda hi B.C. 4-ah a thi niin sawi a ni. Mathaia pawhin Isua thah a tum avangin nausen kum 2 chin hnuai lam a rawt thu a sawi bawk. Chuti a nih chuan chhiarpui Luka sawi hi eng kum chiah nge tih a chiang lo deuh. [(B.C. 1 leh A.D 1 hi kum thuhmun anga ngaih a ni. B.C chu before Christ/Isua pian hma tihna a ni a, A.D chu Anno Domini – after Christ/Isua pian hnu lam tihna a ni. B.C leh A.D chhut chhuaktu Dionysius-a chhût dan leh Rom sorkar chanchin ziak dan hi a inmil chiah lo tihna a ni. Isua kha Herodan a thah loh nan Aigupta ramah tlanbopui a nih thu Matthaian a ziak a, kum engzat nge an awm a sawi lo va. Aigupta-a an awm lai hian Hetoda Liana hi a thi tih a sawi bawk (Mat. 1.13-15,19-21). A.D. 1-na (Isua pian kum) leh B.C. 6/7 hi a in ang vel niawm takin a ngaih theih.]

Kaisara, Augusta: Kaisara hi Isua pian laia ram awptu lalber a ni. A hming tak chu Octavia (Octavian) a ni a, mahse a lalna hming Kaisara Augusta tia hriat lar a ni zawk a ni. Augusta lal lai hian Mediteranean chhehvel ram zawng zawng deuhthaw chu Rom thuhnuaia awm a ni.

Mite hming ziak vek tur: Rom sawrkar hian sipaia ṭang thei zat tur leh lei man tuk zat tur hriat chian nan chhiarpui hi kum 14 danah an nei ṭhin. Kurinia hi ramawptu a nih laia chhiarpui/hmingziak hmasa ber chu he chhiarpui hi a ni tiin Luka hian a ziak bawk.

Isua pian hun lai: Isua pian hun lai hi hriat a har hle a. Krismas hmang hmasatute chuan Jannuary ni 6 hi an hmang phawt a, chu chu kum zabi 3-na hun lai vêl khân a ni. December ni 25 hi Rom sorkarin Mitbar Pathian chawimawi ni atân an serh ṭhin a, kum zabi 4-na aṭang chuan Rom ram chu Kristian lalin a awp tâk avangin December ni 25 chu Rom Pathian chawimawi nâna hmang loin Isua piang lawmna ni, Christmas ni atân hman a ni a, miten Rom pathian an biakna ni kha an theihnghilh a, Isua an chawimawi zâwk theih nân Krismas ni atân an hmang ta zawk a, tun thlengin kan hmangta zel a ni. A champha, a ni dik lam aiin, ring lote rilru laksak theihna remchâng kha Isua piang lawmna ni atana hman a ni ta zawk a nih chu.

Khualbûka leng lo Isua: Isua nu leh pa te hming ziak turin Galili rama Nazareth khua aṭangin Jadai rama Davida khua Bethlehemah an kala, chuta an awm lai chuan Isua chu a piang ta a, Khualbuka an len ve tak loh avangin in lamah insuanin Isua chu ran chawpekna thlengah muttir a ni. Ran chawpekna hi kâwng thlrng vêla dawh kân a ni ṭhin a, chumi chungah chuan a thlêng chu an hûng ṭhin niawm tak a ni.

Tunlaia Isua pianna nia sawi, Church of Nativity an sak hnanah chuan, Isua pianna chu pûk a ni a, hetih hun lai hian mi tam tak chuan pûk hi in atan an hmang ṭhin niin sawi a ni. Khawvel chhandamtu tur a nih avangin hmun hnuaihnung leh tlâwm ber aṭangin a rawn ṭan a ni ngei ang.

1. Eng vangin nge van lal fapa meuh pêkin kan awm?:
Mihring, Pathianin a anpuia a siam, a pâwl ṭhinte chu suala tlua chatuan thihnaah lûtin, Pathian nêna in mihran, Pathian pâwl tlâk loh, mahni thua intinung leh thei tawh lo kan ni a. Pathian duh zâwnga nunga a pâwl tlâk ni leh thei tur chuan a dân zawh famkim a ngaih si avangin, kan tih theih loh min tih sak a, sualbawiha tâng min chhuah zalên turin Pathian Fapa chauh lo chu tumah an awm bawk si loh avangin, a hmangaihnain Pathianin a Fapa meuh min rawn pe ta a ni. A va ropui em! Haleluiah!

2. Chhandamtu a piang ta, Lal Krista chu:
Berampute hnênah Vantirhkohin a sawi ang khân, sual thihna ata min chhandam tûrin Chhandamtu, Pathian Fapa chu khawvelah keimahni taksa ang pûin a lo piang ta a, Siamtu chu a thilsiam mihringah a lo chang ta a ni; hei hi inngaihtlawmna tawpkhawk a ni.

Krista tih hi Grik ṭawnga ‘mi ruat, hriak thih’ tihna a ni a, Hebrai ṭawnga ‘Messia’ tih nên a inang. Pathianin min tlan tura a mi ruat chu Messia, Krista hi a ni.

3. Fapa nei chuan nunna a nei:
I Joh. 5.12-a kan hmuh ang in, Fapa nei a ringtu chu nunna, chatuana nunna neitu kan lo ni ta a, Krista zârah minung kan lo ni leh ta a ni. Fapa nei lotu chuan nunna a nei ve lo. Chuvangin chatuan boralnaa kal tur a ni mai.

Chatuan nunna kan neih leh theihna tûra Pathian min pêk a Fapa leia lo kal a, mihringa a lo pian thu hi a chiang a, a pian hun leh ni te, a pianna hmun te hriat fuh leh hman dik aiin, Fapa neitu nih hi a pawimawhin nunna neihna a ni zawk tih hi i ringin i hre chiang.tawh zawk ang u.

Lal Isua pianni (date) dik tak lawm aiin, a lo piang Lal Isua zawk lâwmin Krismas hi i hmang ṭhin ang u.

Lei Bethlehem leh ran in aiin, kan thinglung hi Isua pianna leh chênna atan a pawimawh tawh zawk tih pawh i hre thar leh bawk ang u.

Ka thinlung ram Kaisar lalnaah hian,
Bethlehem tlangpui rawn din la;
I tân ran thlêng rawn hûng leh la,
Tahchuan lo chêng ang che.

Leave a Reply

Your email address will not be published. Required fields are marked *

error: Content is protected !!