ÊNG VAR TAK KA HMU
Mitthi tho leh Denise Beck

-Lettu : B. Lalchhuanliana

Mite an thi a, an thi nghal vang vang a, chutih laiin țhenkhat chu Doctor-ten an thih thu an puan tawh hnuah lo nung leh te an awm nual. Chutiang zingah chuan Denise Beck-i pawh hi thi tawh, lo tho leh a ni. John Beck-a te nupa chanchin leh an thil tawh hi thil mak leh ropui tak a tling a ni. John Beck-a nupui Denise Beck-in Nilaithawhțanni zingah Melodyland-a kan inkhawmnaah hetiang hian a sawi : –

A pasal nen an thlawk chhuak : “Kum 1976, December ni 26 ni chu a mawiin khua pawh a thiang țha hle a, thlawhnaa han thlawh vel nana itawm tak a ni. Hemi hma kar thum kal ta hian thlawhtheihna tê chi, mi pahnih chuan theihna Ercoupe kan lei ve a, kan thlawk fo nghe nghe a ni. Ka pasal te chhungkua hi boruaka thlawh ngaina mi tak an ni a, John-a pa, a unaupa leh a pami te pawh thlawhna khalh thiam vek an ni nghe nghe a. Ka pasal John-a nen hian thlawk chhuakin kan fapa neih chhun Johny-a chu kan hruai ve fo bawk țhin.

An fapa a pi hnenah : “Mahse hemi ni chuan John-a’n a nu hnenah kan fapa Johny-a chu lo awm turin a chak lawk a, mak ka ti viau nghe nghe a; a chhan ka zawh chuan kan pahnih chauhva van sanga thlawh dun vel a chak thu min hrilh a ni.

An pahniha thlawh an duh : “Kan inneih champha vawi hnihna kan lawm fel chauh a ni na a, John-a hi a hna lama a țul theih țhin em avangin kan awmdanin duhthu a sam lo hle a, chuvang chuan kan pahnih chauhva han thlawh chhuah dun pawh chu kei pawhin ka duhthusam tak a ni.

An thlawk chhuak dun ta : “Chhun dar 10 : 45-ah chuan Mesdowlark țumhmun, Huntington Beach, California ațangin kan thlawhna tê chi, mi pahnih lek chuan theihna Ercoupe chu John-a chuan a khalh a, kan thlawk chhuak ta a. Kan invawrh sang ta hle tihah chuan Carona, California lam panin kan thlawk a, chutah Lake Elsinore (Elsinor Dil) hrulah kan thlawk leh ta zel a.

Thlawhna khawl a dik lo ta : “Vawilehkhatah hruihruala vuak ang deuh țhak hi kan hre ta a, engnge a nih phei zawng ka hre lo. John-a chuan eng emaw dik lo a awm tih chu a hre mai a, rikrum thila chet lak dan tur chi angin a phe țan ta a, chutih lai chuan kan thlawhna khawl chu a dik lo ta a ni.

Leiah an țum ta : “Buaina lo thlen thut pawha țum mai turin țumna hmun remchang lei lam hi a khât tawkin ka melh fo țhin a, hei hi ka tih dan ve pakhat a ni rëng a, ka hlauthawng hma pawh in ti mai thei a ni. Tun țumah hi chuan John-a chuan Merietla bula phaizawl fai hun maiah chuan țum a tum ta a. Chutiang chu kan dinhmun ni mah se kan chiai lo dun hle a, kei chu hnunglamah âwn fein nghet takin ka țhu a : John-a chuan thlawhna tihzawih tumin a control-na chu a han kuai ta a, mahse a sâwt ta si lo. ‘Nghet takin i awm ngaiin awm tlat rawh ,’ tia min auh tuar chu ka hre hman a, vawilehkhatah a ri țhuai a, thlawhnain lei a zuk khawih a, boruakah a invawrh kang leh lawp a, kan tla leh a, chutiang chuan leiah kan țum ta a ni.

Nikhaw hre lovin an awm ta : Hliam ka neih leh neih loh pawh ka hre lo va, thlawhna khawl thununna bulah kan tla dun a. Chutah John-a chuan mi han en a, a thinlung chhungril tak ațangin min hmangaihin min ngai ngawih ngawih niin ka hria, ‘Denise, ka hmangaih che’ a ti sap a. ‘Kei paw’n ka hmangaih che John,’ tia ka chhan let rual chuan a rawn bu thla ta ngawih a, chutah kei pawh chu ni khaw hre lovin ka awm ve ta nghal a.

An nat dan chu : “A hnua min enkawltu Doctor hnen ațanga ka hriat danin ka pasal John-a chu a thluaka thi pût tuar lovin a boral nghal a lo ni a, kei erawh chu ka nghawng ruh tlem a keh a, ka chalah na takin ka hliam bawk a, ka luruh tlem a keh a, ka ban dinglam ruh a tliak a, ka kheimit bul ruh hmun hnihah a tliak bawk hi a lo ni a.

Ri a hria, a thim takzet : “Kan chetsual kha dar 11 : 38 chiah niin ka hria a, min chhanchhuaktute chu dar 1 : 42-ah an lo thleng a ni âwm e. Min hmuh chuan thiah min ngai ve ve bawk a ni. John-a ka malchunga a rawn bawh thlawp hnu chuan ka vel chu thim mup hian ka hria a, ka taksa chuan engmah a hre ta lo a ni. Chutah ri, eng emaw hi ka hria a, mahse ka vel chu a thim tak zet si.

Êng var tak a hmu : “Vawilehkhatah êng var mawi tak, ni êng em em mai hi ka hmu ta a, a ênzia chu khawvelah hian tehkhin tur pawh ka hre lo. A lakah chuan ni te khi chu hlimthla ang niin ka hria. Chu êng chuan ka vel chu a tiêng vek a, mahse a ên em avanga hmuh harsa emaw, mit vai emaw chu ka nei hauh thung lo. Ka thinlung chu muanna leh hlimnain a lo khat nghal a, êng lo kalna lam ka han thlir a, ka pasal duh tak John-a leh Isua Krista chu chiang takin ka va hmu ta a ni.

John-a’n ngaihdam a dil : “Isua hmel mawizia chu in hmuh ve ka va it em! Sawi ngaihna pawh ka hre lo. A sam chu a buang eng deuh thang a, a dar a vaw pha hnâp bawk. Țhuilohkawr dumpawl a ha a, ka lam a rawn hawi a, a hma chiahah chuan min hnung chhawn zawngin ka pasal John-a chu a ding thung a. Ka pasal ai chuan Isua chu a sang zawk hle a ni.

“Ka pasal chuan Isua darah a lu a nghat a, a thiltih dik loh leh a tana a țhathnem lohnate hrilhin ngaihdam a dil mawlh mawlh a, a inchhir hle niin ka hria.

“Thawklehkhatah Isua hmaa ding reng chung chuan kei pawh chu ka inhmu thei a, ka taksaah ka awm lo a ni tih ka hre ta a. Chutih lai chuan Isua dinglamah ka pasal chu a lo ding leh tawh a, a hmel hlimna leh lawmnaa khat chu ka hmu ta a ni.

John-a inthuamna : “Mahse, John-a inthuamna chuan makna tak a nei a, thlawhnaa kan thlawh dun laia a thuamhnaw hak kha a ha lo va; Jean chi khat, Denim pawdal suit a ha a, a nghawngawrh leh a kawr (suit ruala a lei chu) a ha bawk a, pheikhawk bun lovin mawza chauh a bun thung a ni. A inthuamna chu mak ka ti hle a, mahse kar hnih hnua ka harh chhuah lehin thudik ka hre ta a., chu chu pheikhawk bun chungin mitthi an phum ngai lo a ni. Tin, an phum dawnin ka hmuh ang chiah kha thawmhnaw an haktir bawk.

“Ka hlim em avangin awm ve reng mai ka duh a, Isuan kir leh tura min hrilh chuan ka hreh em em a ni.

Isuan kir leh turin a ti : “Isua chuan, ‘I tan kir leh chu a hrehawm ang tih chu ka hria, mahse, lungngai suh. John-a chu ka bulah chatuan hlimnaah a awm ve dawn a, i nun Pathian hnenah pe la, leia mi dangte hnenah thih hnua nunna a awmzia i hmuh leh hriat hi puangzar ang che,’ tiin min hrilh a. Tin, Bible min hrilhfiah bawk a, pianthar awmzia ka hriat loh ang bawkin Bible thu pawh ka hre lo va, mahse min hrilhfiah hnu chuan ka var uar uar mai a ni.

Isuan John-a a pawm : Chutah John-a chu ka’n en leh zawk a, a hmai chu Isua dar dinglamah a lo phum a, a maimitchhing a, mahse a hmel chu a hlim em em a ni. Isua chuan pain a fa duat taka a en ang hian a en a, chutih lai chuan ka lawm em avangin ‘Lalpa, heta hi ka awm e, eng pawh min tihtir i duh chuan a țha ka tiin ka pawm zel ang,’ ka ti a. Isua chuan John-a chu a kut khinghnihin a kuah a, a kawrfual chuan John-a ruangam chu a ke ler thlengin a khuh bo ta riai riai a.”

Denise Beck-i hi Riverside Genual Hospital-a enkawl a ni a, a inhliam nat tehlul nen kar hnih chhung leka a țhat chakzia hian Doctor-te a tihrilhhai mah mah zawk a ni. In lama inenkawl turin a chhuak hma hle a, ama țawngka i lo ngaithla leh teh ang :

*A pasal awmdan vangin a hlim : “Ka thil hmuh leh hriatte kha hre lo ila chuan ka rilru pawh a buai hial awm e. Doctor leh nurse-te pawhin ka hlim em em mai chu mak an tiin an hrethiam thei lo a ni. Ka pasal a thi tih chu ka hria a, mahse chu chuan min tina lo, a hlim hmel chiang taka ka hmuh avangin ka awt hle zawk a ni. Mahse in lama ka haw hnu eng emaw chenah chuan ka khua a har thei hle mai a, ka thil hmuh leh hriatte pawh ka ringhlel ta a.

A khua a har hle : “Ka thil hmuh leh hriatte kha tak tak a nih leh nih loh min hriat chiantir turin Pathian hnenah ka dil ta fo mai a, ka lu ka sawh avang khan ka thluak lam dik loh vang nia ngaihnate ka nei a, ka inringhlel zo leh ta a ni. Tin ka khawharna a nasa em em bawk a, hun kal tawh ka thlir kir a, ka pasal duh ngawih ngawih vuinaah ka tel theih loh te, phum hmaa a hmel vawi khat chauh pawh ka hmu leh lote chuan min tihrehawmin ka khua a har leh ta em em mai a ni.

A pasal mal chungah : “Tuk khat chu, ka pasal leh Isua ka hmuh dawna thim min tuamtu ang chiah khan min rawn tuam leh ta mup mai a, mahse ka harh chian si avangin sanain dar 6 : 30 a kawk tih pawh ka hmu thei si a ni. “Thawklehkhatah ka pasal John-a malchungah ka lo țhu reng mai a, thingbuk hnuaia phaitual hnim nuam tak hmun hi a lo ni a. A thingte chu a mawi em em hlawm a, kan bul lawkah chuan lui te tak tê, mawi tak mai, a tui tle sût mai a luang a, êng var tak mai kha a lo êng leh ta a.

John-a’n ringhlel lo turin a fuih : John-a chuan ka ban rawn vuan pahin thlawhnaa kan chetsual nia ka thil hmuh kha thil tak tak a nihzia leh, ringhlel lo tur ka nihziate min hrilh a; chuta ka sam chul heuh heuh paha a sawi chu engtikah mah ka theihnghilh lo vang. Chatuanin kan la leng dun dawn a ni tih min hrilh phei chuan ka hlim em em mai a ni.

Thih ka hlau tawh lo : “Mahse thawklehkhatah a reh leh ta vek a, ka pasal mal chunga ka țhut dan ang chiah chuan ka lo la țhu reng mai tih ka hre ta chauh a ni. Tun hma chuan thih hi ka hlau țhin a, mahse tunah chuan ka hlau tawh lo. Bible thu ka chhiar te hian Isuan min hrilhfiah kha ka hria a, ka fiah țhin.

Doctor-ah a inentir leh : Doctor hnena țum khat ka va inentir chu, X-ray thla an han en chuan mak an ti em em mai a, Doctor zirlaite hnenah pawh ka X-ray thla chu kengin zirtirtu Doctor-ten ka dam chianzia leh dam tura an ngaih chinte sawi fiah nan an hmang a ni.”

Tlak chhan enfiah ngiat : National Transportation and Safety Board chuan John Beck-a te nupa chetsualna chu thlawh hniam lutuk vangah an puh a, mahse Pi Denise Beck-i, damdawi in ațanga a chhuah hnua in lama an chetsual dawna a ri hriat a sawi chuan, a puzawn, John-a pa chuan thuneitute hnenah enfiah nawn a ngiat ta a.

Thlawhna tlak chhan : An enfiah hnu chuan an tlakna chhan chu thlawhna Carburettor chhiat vang a lo ni a, a tuiek leh tui a lo awm vang a lo ni a, enfiahtu zinga pakhat phei chuan, “Hetiang reng renga Carburretor chhia ka la hmu ngai lo, engtin nge an thlawh chhuah theih tih pawh hi chhut tham a ni,” a ti hial a ni./- bchhangte klsb vthr

Leave a Reply

Your email address will not be published. Required fields are marked *

error: Content is protected !!