Eng – Sermon

-Upa K. Zalawma

I thu hi ka ke atânte hian khâwnvâr a ni a, Ka kawng atân êng a ni. Sam 119:105

Mi tupawhin ĕng pawimawhzia chu kan hre ṭheuh awm e. Kan awmna khawvel pawh hi a tirah chuan a thim mup ringawt mai a, ĕng a awm hma chuan a chhia a, a ruak ringawt a ni tih Biblein a sawi a. A nih tur anga a lo awm theih nân Pathianin ĕng a siam hmasa ta ber a ni.

Chhun pawh zân ang:
Kan ni tin zan tin hun hman hi thim leh ĕng in chhawk ṭhin hnuaiah nimah se, Ringtute tân chuan Pathian hruaina ĕng tel lo chuan khawvel hi zân thim anga ngaih a ni a, mahni thua kan kal thui poh leh kan bo thui a ni mai.

Thihna te, natna te, lungngaihna te a lo thlen hian zân thim angin an sawi bawk ṭhin a; ramin indona leh hun harsa a tawh te hian ‘hun thim’, an ti ṭhin a, mi ṭhenkhat chuan kan ram hian thim thuah hnih a hmabâk niin an ring mĕk bawk a ni.

Khawnvar leh eng:
Zân thimah engmah a hmuh theih loh va, kalna tur pawh a hriat theih loh; chuvangin, ĕng kan mamawh ṭhin.

Zoram buai lai khan zân thimah inkahna a awm fo va. Tualbung khua chu Selingah an sawikhawm hnuin sipaiin an la luah a, zânah mizo sipaihoin an han bei a, thim zingah chuan mahni lam leh râl lam pawh a hriat hran theih loh avangin in ruak kha an hâl ta a. Chumi ĕngah chuan an mahni lam leh râl lam an hre hrang thei ta a ni an ti. Hmun ṭhen khatah chuan thim thama an inkah chuan kahĕn (very light) ĕng hnuaiah an inkap ṭhin. Thim zingah chuan khawnvar leh ĕng a pawimawh a ni.

Pathian thu hi khawnvar leh ĕng a ni.


Sam ziaktu chuan, “I thu hi ka ke atânte hian khâwnvâr a ni a, ka kawng atân ĕng a ni,” tiin a ni tin nun kawng chu Pathian thuin a hruaitir ṭhin.

Keini pawh thihna leh lungngaihna zân thim te, sualna leh thuawih lohna zân thim tein kan inchhungah te min chim ṭhin. Ni tina kan eizawnna leh Pathian hna kan thawhna kawngah pawh Pathian kaihhruaina tel lo chuan zân thim hnuaia kal ang chauh kan ni tih i hre reng ang u.

Chutiang hun te, natna leh thihnaten kan chungah ro a rĕl châng te hian Pathian thu hi inhruaitirin kan kalna turah kawng min kawhhmuhtu a tân leh kan ke pĕn te min hruaitu atân i hmang ṭhin ang u. Chutichuan, kalna tur kan hmu ang a, kal dàn kan thiam thei bawk dâwn a ni.

Ĕnna nunnĕm, thimin ka vel a bawm,
Mi kai ang che;
Zân a ni e, in (home) hlatin ka lo awm,
Mi kai ang che.

Leave a Reply

Your email address will not be published. Required fields are marked *

error: Content is protected !!