Emau kawng dai reh, Pathian inpuanna – Biakhmingthanga Chhangte

EMAU KAWNG DAI REH, PATHIAN INPUANNA
Pathian leh a kohhran hmusittu Malcom Muggeridge-a a piangthar

“Kan hnenah awm ta che; khua a tlai dawn ta a, ni pawh a tlak dawn tawh hi,” Luka 24 : 29

Emau kawng reh leh khawhar : Kan Lalpa Isua a thiha a thawhleh hnuah Jerusalem ațangin Emau khaw panin Kleopa te țhin dun chu an kal a, Jerusalem leh Emau khaw inkar hi fing 60-a hla a ni a, fing khat chu metre 201 niin chu chu tunlai tehna ang chuan km.12-a hla a ni. An zin kawng chu thui lo hle mah se, kawng reh leh khawhar tak, zin vei vak tam lohna lam tak a ni awm e. Khawhar taka an kala Isua thawhleh thua an inhnial lai chuan an hnenah Isua a rawn inlar a, an hnenah nungin a inpuang a, a chanchin Dan leh zawlneiten an lo sawilawk dan zawng zawng a hriattir a. Khua an thlen chuan ni pawh kâwlah a liam țep tawh a, an hnena riak turin an sawm ta a.

Film siamtu M. Muggeridge-a : Britain rama chanchinbu lar tak Punch Editor, Malcom Muggeridge-a chu Kohhran dodaltu langsar tak a ni a. Chanchinbu a enkawl hma chuan University-ah lecturer a ni țhin a, chanchinbu a enkawl hnu chuan nasa takin a lar zual ta a. Khawvel indopui 2-na lai vel khan Intelligence Cop-ah Major a ni hman a. Kristianten chanchinbua kohhran chanchin an chhuah țhin leh, radio leh telvision-a kohhran chanchin an puanzâr thin te chu a sawisel nasa hle țhin a ni.

Isua film siam turin an sawm : Vawi khat chu khawvel huapa chanchin thar puangtu lar tak, British Broadcasting Corporatin (BBC)-in Isua chettlatna hnuhma, Ram Thianghlim (Holy Land ) chanchin TV-a tihchhuah atan film siam an duh avangin Malcolm Muggeridge-a chu buaipui turin mawhphurhna an hlan a. Tichuan Isua film chu a buaipui ta a ni.

Emau Kawng dai reh leh khawharah : Mulcolm Muggeridge-an film a siam zawh tawh hnuin țum khat chu a țhianpa nen Emau kawngah an kal dun a, chumi chungchang chu amah ngeiin heti hian a sawi : “Emau kawnga kan kal lai chuan Kleopa te țhian dun kha kan inchan a, an hun laia Isua an khenbeh chung leh chumi kaihhnawih thil velte sawiin kan tunlai khawvel nen kan tehkhin vel a. An khua a har em em laia anmahni rawn zawmtu mi dang an nei chu an hlim turzia kan sawi nasa hle mai a. Kan kalna kawng chu khawi lai pawh ni se a kalate chu tute pawh ni se la, mi dang pakhat tu emaw chu kan kiangah rawn kala, kawng hrehawmah pawh min zui zel duh chu a awm ngei a ni,” tiin.

Kohhran sawiseltu chuan thudik a puangchhuak : Tichuan, kum 1968, January ni 14 khan Edinburg University-a zirlai tam tak pungkhawm hmaah chuan Bible-a thu awm te chu thudik a nihzia a puang chhuak ve ta a ni. Emau kawnga kal te leh an chunga thil thleng chungchang sawiin, “Hemi chungchang hi thil awih harsa tak pawh a ni thei e. Mahse, thu dik leh thil thleng dik tak a ni tlat si a ni. An zingah a tel a, an zingah zanriah a kil a, chhang laa phelin mal a sawm a; chu mi chu mikhual leh hriat ngai loh mi ni lovin an Zirtirtu leh Chhandamtu a ni zawk a ni,” a ti a ni.

Malcolm Muggeridge-a anga Pathian Kohhran hmusita, sawiseltu kan lo ni ve em le? Tunlai hian Kohhran leh a hnathawh te hmusita, sawiseltu an tam ta hle mai. Lal Isua hian a Kohhran hmusita sawiseltute hi a hmangaiha, an thiam lohzia leh dik lohzia te hriattirin an hnenah nungin a inpuang țhin. A rawn kal chhan : “Boralte zawnga chhandam a ni tlat a ni, (Mat. 18 : 11; Lk. 19 : 10). Amah leh kohhran hmusittu chu enganga sual pawh ni se, thinlung chhungril taka Amah mamawhtu chu A Bible thu te leh an mumangah te an tana thi a, tholeh, chhandamtu a nih zia a hriattir a, A hnenah a hruai țhin. “Tupawh a ring apiang engkimah ama thiam chantirin an awm,” a ni, (Tirh. 13 : 39).

Leave a Reply

Your email address will not be published. Required fields are marked *

error: Content is protected !!