Emau kawng dai reh leh khawhar – Kleopa te thian dun an piangthar – Biakhmingthanga Chhangte – Sermon

EMAU KAWNG DAI REH LEH KHAWHAR
Kleopa-te țhian dun an piangthar

“Kal paha in sawi dun kha, eng thu nge ni?”,a ti a. Tin ngui takin an ding ta a… “Jerusalem khuaah nangmah chauhvin a mi i chen, tun lai thil awmzia hi i hriat loh?” Luka 24 : 17,18.

Emau kawnga thian dun titi : Jerusalem ațangin Emau khua hi fing 60-a hla a ni a, kan tehna angin mêl sarih leh a chanve vela hla a ni. Țhian dun pahnihte hi engti tura Emau pan nge an nih a lang lo va, pakhat zawk hming chu Kleopa a ni. Isua thawhlehna ni tak, tlai lam a ni tawh a, hmeichheho thlan en hawin vantirhkoh an hmuh thu leh Isua a tho leh ta a ni tia a lo hrilh thute pawh an hre hman a, Petera thlan en haw report pawh an hre hman bawk a. Tichuan beidawng takin Emau khaw lam pana an kal laiin chung thute chu an sawi vela, Isua chu “Israelte tlantu tur a nih beiseitute” an ni a, tunah erawh chuan, tlan tawh reng mah se, tlan zawh tawh an nih rêng inhre lovin beidawng takin an titi dun zel a.

Rom laka tlantu turah an beisei : Zirtirte leh Juda mipuiten an Messia an lo beisei dan ber nia lang chu , Rom sawrkar lak ata chhan chhuaka, Israel Lalram din tir leh turin a ni ber a. “Lalpa tunah em ni Israelte hnenah Lalram i pek leh dawn,” tiin an zawt he haw a, ( Tirh. 1 : 6). “Thisen chhuah lovin ngaihdamna reng a awm lo”, tih hi hre ber awm tak an ni a. An inthawina tinrengte khan chu chu a entir ber a ni si a, Heb. 9 : 22.

An hnenah Isua a rawn inlar : Chutia an titi malh malh lai chuan an hnenah Isua a rawn inlar a, “Amah chu an hriat mai theih loh nana an mit chu tihvaiha a awm avangin tu a nih an hre lo va. An hnenah, “Kal paha in sawi dun kha, eng nge ni?” a ti a. Anni chu “ngui takin an ding ta a,” Isua chu thil chinchang hre pha ve lo leh mawlmang lutukah an ngai a. Isua chunga an hruaituten kut an thlak dan zawng zawng te kha hre lo hrilhin an hrilh siah siah a, an sawi dan kal hmang ațangin an beidawng hle tih a hriat a. An Messia ni ngeia an rin tehlul nen thahin a awm ta hlauh si a, beisei tur reng awm ta lovah an ngai a. Thangkuran, “Inten tawnna a thlenga” a tih ang deuhvin “hre lo lutukah an inngai tawn”, a ni ber awm e!

Isuan thil awmzia a hrilh : Isua chu mawlmang lutuka ngaia an mi chhawih biak laiin, anni pahnih chu thu a hrilh ve ta chiam a, “Mi â te u, zawlneite thu sawi zawng zawng awih kawnga ngawngte u!” a ti let ve ta siah siah a! “Kristan chung thil chu tuarin a ropuinaah lut tur a ni réng lo vem ni?” a ti a. Isuan tuarna ațanga ropuinaa chawimawi tur a nih reng an lo ring pha ngai lo va.

Danin a sawilawkte a hrilfiah : Mosia dan ațangin a chunga thil lo thleng tur a hrilhfiah a. Mosia dan chu Genesis, Exodus, Leviticus, Number leh Deuteronomy te an ni. Chungte chu “Dan Bu” tia sawi a ni. An Biak Buk leh an inthawi dan zawng zawng te khan Isua Krista chanchin a hril vek a, Beram No an hlan țhinin a entir a ni tih an Dan bu leh Zawlneiten an sawi lawk te kha lo chhiar ngun se an hrefiah vek mai tur. Chung Lehkha ațangte chuan Ama chanchin an ziak apiangte chu a phawrh chuahsaka, a awmzia te a hrilfiahsak a. Fing 60 emaw lai kal tlanga titi malh malh an nih avangin an inzirtir tam viau hmang ngei ang.

Kan hnenah awm ta che : Kawng laka an thianpa an hai chu “Kan hnenah awm ta che, khua a tlai dawn ta a, ni pawh a tlak dawn tawh hi,” tiin “kain an chelh a.” Eng hunah pawh Isua sawmtute hi an hlawhchham ngai lo, “tuma boral duh lo va, mi zawng zawng lo sim” duhsaktu chuan, Amah sawmtute chu a ngaihthah ngai lo va, a hnena lo kal te pawh a hnar ngai hek lo, (Joh. 6 : 37; 2 Pet. 3 : 9), an hnena luta chawhlui kilpui turin an thinlung kawngkhar a kik reng zawk țhin a ni, Thup. 3 : 20. Isua sawmtute reng reng beidawng an awm ngai lo va, an rin leh beisei aia nasa zawkin malsawmna a thlen zel thin. Emau kawnga țhian dun te pawh hian an sawm hlawhtling hle a ni – “an hnena chaw kila a țhutin chhang a la a, mal a sawm a, a phel a, an hnenah a pe a.” Mikhualin a sawmtute chu a thleng ta zawk hlauh va, an ei tur te mal a sawm sak a; khual hawihhawm tak leh hmangaihna nei, rawngbsawltua țan zawk tum tlat mi a ni. Sawm ve mah teh, i inchhir lo vang!!

An mit a lo var ta: “Dan thu ațanga thilmak ka hmuh thei nan , ka mitte hi mi tihvarsak ang che”, (Sam 119 : 1) tia ziak angin Dan thute leh Zawlneite thu an ngaihthlak khan Thlarau Thianghlim țanpuinain an mit a tihvar saka, Isua a ni tih an hre ta a. Thutak thu ațang lo hi chuan Isua nihna hi hriat harsa tak a ni.

Ani chu a ral ta mai a : An hmuh lai rengin Ani chu a ral ta mai a. Hetah hian thawhlehna taksa danglam zia leh kan tisa taksa nena a inropui hleihzia kan hre thei awm e. Thawhlehna taksa kan neih hunah chuan Isua ang bawk hian mita hmuh theiha inlarin thil ei theiin kan la awm ve dawn a ni, Joh. 24 : 42.

Leave a Reply

Your email address will not be published. Required fields are marked *

error: Content is protected !!