Diabola chu dodal rawh u (2) – Rev. VL Nithanga – Sermon

DIABOLA DODÂL RAWH U (2)

– Rev VL Nithanga

Diabola dodâl rawh u, tichuan, a tlân bosan ang che u (Jacoba 4:7).

Kan ram Kristianna hi han zir chiang ila, Pathian thu hmu țha bika inngai te, thlarau changsâng leh hlimsâng te, Pathian thu duh zual apiangte hi thil țha tih lamah harh chhuaha, Kohhranahte active zual deuh deuh tur awm tak hi kan ni a. Mahse, chutiang chu kan ni tlat țhin lo va, kan inthlahdah zualin, kohhranah kan active țha duh lo tlat zâwk zêl mai hi a mak hle mai. Kan Pathian thu lâk dân hi a dik tluan tling lo deuh tlat țhin a tin ni.

Chhûngkaw pakhat pawh hi Pathian thu duh tak chhûngkua an ni a, an inah Pathian thu duhho, veng hrang hranga mite pawh an lût khâwm țhin a. Pathian thu sawikhâwmna in a ni ringawt mai a. Chutih lai chuan, Upa pakhat hian chumite inah chuan Pathian ram ip, Envelope a va khawn a, “Hei, Pathian ram ip, envelope ka rawn khawn e,” a va ti dêk dêk a, Chhûngkaw nu ber chuan, “E, khatiangte kha in la khawn elo, keini chu engmah kan tihve ngai lo, a thlâwna Kristan Kraws-a min thawh zawh saknaah kan chêng tawh a, keinin engmah Lalpa tân kan pêk a ngai ve hlei nem. Amân a thlâwnin Lal Isua min pe tawh zâwk a lawm, thil țha tiha chhandam tum hi chu kan kawng a ni ve tawh lo,” a lo ti ta daih mai a. Hetiang deuh hian Kraws-a Lal Isua thawh zawhsa hi mi tam tak chuan kan kal sualpui deuh țhin a ni. Hetiang zâwng hian Diabola hian kan rama Pathian thua lût thûk deuhte hi Kraws thu hmang ve tho hian, che chhuak thei lo tûr zawng hian a lo bum tâng tlat țhin a ni.

Pathian thu chuan, “Diabola dodâl rawh u (Jacoba 4:7),” min ti a. A hranpaa Diabola dodâlna a awm chuang lo va. A duh loh zâwng kan tih a, a duhzâwng kan tih loh hi Diabola dodâlna chu a ni mai.
Piangthar tawhte tân chuan, Inkhâwm te, Sâwma pakhat pêk te, Kohhran activities hrang hranga tel te, Pathian thu leh lehkhabu țangkai dang inchhiar zau te, mi dang harsa zâwk țanpui te, thlaraubo zawn chhuah te, khawtlang tân leh ram tân pawha a țha zâwnga thawh a, siamțhat hna thawhte hi kan tih tur a ni a. Chûng ang thil țhate chu kan tih chuan Diabola huat zâwng tak kan ti a ni a, amah chu kan dodâl nghâl a ni bawk. Chuvângin, keini, Piangthar tawhte chuan Diabola dodâl nân Pathian duh zâwng thil țha hi i ti zêl ang u.

Ngaihtuah zui atan:

Piangthar țha i nih si chuan,
* I inkhawm ngai loh khan, Diabola i dodal nge, a duhzâwngin i awm?
* Kohhran activities-ah i tel ngai loh khan, Diabola i dodal nge, a lâwm zâwngin i awm?
* Sâwma pakhat i pêk ngai loh khan, Diabola i dodâl nge a duhzâwng tak i ti?
Diabola lo dodâl tawh la, i kawng chu lo titluang zêl ang che.

Leave a Reply

Your email address will not be published. Required fields are marked *