Comparative study of Western and Mizo pop song

-Lalrinfela, Durtlang

Pop Music kan tih hi sawifiah thiam a har hle a, Pop Music hi chuan Music Genre dangte anglo takin kalhmang bik leh kaldan tur bik em em a nei hran lo va. A hun tawn mil zelin a in thlak danglam thin a ni. Rock te, Jazz, Country leh Music Genre dangte chu kalhmang bik, zawm ngei ngei tur leh telh ngei ngei tur a awm thin a ni. Mahse Pop-ah hi chuan dan zam bik leh tihdan tur engvak a awm lo a ni. Chuvangin sawifiah thiam a har a, a khawilai tak nge Pop a? A khawilai tak khan nge ti Pop? Tih pawh hi chhui tham fe a ni mai awm e. Chuvangin Pop chungchangah hi chuan inhnialna tawp theilo a awm a, thenkhatin a hla a lar vang a Pop ti an awm a. A thenin a music Genre anga then tur a ni ti an awm bawk a. Mahse tan hmun rem tak siam thei an awm chuang lo va, mang phan ang maiin a chiang lo va, mahse thinlung leh bengah chuan a fiah em em tho si a ni.

Definition Of Pop.

Pop kan tih hi Popular tih atanga lo kal niin an sawi a. Pop hi kum 1926 velah an hmang tan daih tawh a. Mahse a lar chhoh tanna tak tak chu kum 1950 chho velah daih a ni thung a ni. Pop Music hi Rock, Jazz leh Blues Music atanga rawn piang chho a ni a. Pop song kan tih chu hla nem leh sak nuam, hriat awlsam leh hla tawi, a ngaithla tute tana phurna leh tha thona pe thei hla hi a ni mai anga. Tin, Pop Song hi hmangaihna, a bikin nula leh tlangval inkara thil thleng an puanchhuahna lam hi a ni tlamgpui a. Mahse a vai chuan a ni lo va, khawtlang lunglen leh mahni rilrua vei zawng puanchhuah nan pawhin Pop Song hi an hmang tho a ni. Laltlanthanga Pachuau chuan, “Pop Music awmzia chu eng Music pawh sumdawn nana hman tlak khawpa lar leh pawisaa chang thei Music reng reng hi chu Pop Music a ni thei vek mai a ni” tiin a hrilhfiah a (Rimawi kamkeuna kailawn P. 140).  Pop Music hi sum lakluh hnem nan leh sumdawn nana hman thin a ni a. Chuvangin a hunlai mil ang zelin a Music kalhmang pawh a danglam a. Hla sak nuam leh nem tak leh, a Music pawh tha tho tak leh mi rilru sukthlek ti danglam thei tur ang ber leh a hla thu pawh awlsam leh hriat nuam tak a ni thin a ni.

Pop Song hi vuak 2;3;4;6 te hman thin a ni a; tin, Scale-ah chuan Pentatonic leh Diatonic Scale te hman thin a ni, tiin Laltlanthanga Pachuau chuan a sawi a (Rimawi kamkeuna kailawn P. 22). Heta langchiang deuh chu Pop hian kalhmang ve deuh chu a nei tih hi a ni. Pop Song-a lar hmasate chu Elvis presley te, Bob Dylan te, The Beatles te, The Beach Boys te, The Rolling Stones te an ni a.Kum 1950 vel khan khawvel an nghawr nghing nasa em em a. The Beatles Vocalist John Lennon phei chuan ‘Isua aiin kan ropui zawk’ a ti hial a nih kha. An larzia leh an ropui zia a tilang chiang em em a ni.

History Of Mizo Music:

Mizo te hi zai nuam ti hnam kan ni a. Nula tlangval kan awmkhawm a, Tingtang a awm tawh hi chuan kan zai mai thin a ni. Chuvangin Music lamah hi chuan kan chim chin  sang a, kan ei leh bar leh sum leh pai sang lemlo mahse Music hi chuan min chenchilh hma ve hle a ni. Mizo-ina Sap hla kan tih mai Western Music an ngaihthlakna ber chu Radio hi a ni a Rangoon te, Srilon leh BBC Channel te hi an ngaithla nasa thei hle a. Heta tang hian sap hla hi an hmelhriat chho tan a. Tin, kan Sap Missionary te khan Thingrem zai thei (Gramophone) an rawn keng chho a, Isua chanchin hrilh nan an hmang tangkai hle a. Mizo-ah chuan Pu Kira Ralte-in Thingrem zaithei hi a nei hmasa ber a. Lalzova hian Pu Kira Thingrem zaithei atang hian sap hla a ngaithla nasa thei hle a, mi lungleng mi tih takah, sap hla thluk hian hla a phuah nasa hle a ni. Chuvangin Mizo-ah chuan Western lam hawi hal phuah hmasa ber pawl chu Lalzova hi a ni awm e. Mizoah chuan Durra Chawngthu-ina ‘Tleitirah tleitiri’ hi Sap hla thluka phuah hmasak ber a ni maithei, he hla hi Scottish hla thluka phuah a ni. Mizo hian Music Track kan nei hmasak ber kum chu kum 1980 vel a ni a, Sailothangi Sailo hian The one and only album Burma-ah a siam tir a. C. Dinthanga pawh hi Music Track nei hmasa ber pawl a ni.

Kan sawi tawh ang khan kum 1966 rambuai hma khan kan music hmanrua chu a la tha tehchiam lo va. Tingtang leh Drum pawh a set kimin kan la nei lova, Drum khuang khat kha an vaw mai thin a ni. Mahse zaithiam leh hla phuah thiam an tam em em tawh a, Vanhlupuii te, Vanlalruati te, Lalhnuna Sailo te, Vankham te leh midang zaithiam tam tak an awm nual tawh a. Drum hi kum 1969 khan Dawrpui Carnival-ah ‘The Agent’s’ Band-in Shillong atangin an rawn keng lut a, hei hi kan hmelhriatna hmasak ber a ni. Tah hian an Drummer hi Kaia a ni. Mahse mizo-ina Band kan neih hmasak ber pawl chu Tahan lama kan unaute Zodi leh Vulmawi te hi an ni a. Tunthlenga hla lar leh mawi min sak saktu te an ni.

Mizo-in Electric Guitar leh Keyboard kan hmelhriat tak hi chu rambuai hnuah a ni awm e. C. Dinthanga hian kum 198 khan Casio Keyboard a nei a, chu chu a hla record-naah a hmang tawh a. Lalsangzuali Sailo pawh khan kumhlui hla a saknaah khan an hmang ve bawk a. Keyboard kan hman tak tak chu kum 1984 hnu lamah a ni a. ‘Sena Music College’ hi kum 1986-ah din a ni a, Piano zirna hmasa ber a ni. Mizoram hian Recording Studio hmasa ber chu Auto Recording Studio niin kum 1982 vel khan a ding tan a, a neitupa chu Lallianthanga a ni a, chuan a hnu lawkah GeeTee Recording Studio a ding leh a ni. Mizo Lengzem Cassete siam hmasa ber chu C. Lalsangliana a ni.

Dinthanga chuan Mizo hla deuh thaw kha Pop a ni a ti a. Music Genre dang Rock, Jazz leh Blues te kalpui tum mahse Mizo rilrem ber chu Pop a ni a ti a. Leikapui zai kan tih tak pawh hi a chhuahna a la reilo hle a, C. Dina hian Lelte chanchinbu-ah a hmanga, an hmang chho ta zel a, a sawi dan tak phei chuan Lalthakima zai hi leikapui zai a ti a, chuta tanga rawn ching chhuak a ti a ni. Leikapui zai kan tih tak hi a sawi dan chuan Western leh Mizo rilrem rimawi inpawlh a ni a ti.  Mizo ina Tape Recorder kan hmelhriat hi kum 1963-64 bawr vel a ni a, a nei hmasa ber chu Rothangpuia a ni. Mizo ChannelRadio- a kan nei kum hi kum 1966 July ni 31 a ni.

Tlem azawng Solfa kan thiam dan hi sawi ila. Solfa kan thiamna leh kan hmelhriat tan dan hi Zosap Missionary an ni a. Zosap zingah khan Pi Sandy leh Zosapthara te kha Solfa thiam an ni a, Mizo Solfa thiamte pawh anni hnena zir an ni. Mizo zinga Solfa ekzam-naa Certificate dawng hmasa ber te chu Rev. Liangkhaia leh Rev. Hranghnuna te an ni a. Rev. Liangkhaia hi kum 1913-15 Cherra Theological College-a azir laiin Junior Elementary leh Intermediate Certificate a dawng a. Rev. Hranghnuna hian kum 1921-1923-a Cherra Theological College-a a zir laia Elementary leh Intermediate practical leh Theory-a pass an ni a. Mizo zinga Theory leh Practical exerminer tling thei awmchhun an ni. Heng Certificate hi Pi Sandy-i buatsaih a ni a, Curwen College London zawmin a siam a ni. (Mizoram Leh Music P.82). Kan Zosap Missionary te khan Khuang hi Biak inah lakluh an khap a, chuvangin Solfa hla hlir sak a ni thin a ni. Hei vang hian Synod pawh hian Solfa zir hi a ngai pawimawh em em a, kum 1973 khan Music Institute neih rawtna a awm tawh a. Pu Tlanghmingthanga chuan kum 1971 May 24-25 khan Central Music Institute nei turin Music Conductor training vawikhatna koh a nih thu leh a hmun atan Mission veng biak in ruat a nih thu a sawi a. Hetah hian Solfa thoery te, harmonize te, staff notation bul te, hla sak dante zirtir an nih thu a sawi (Mizoram leh music P. 90). Music Institute kan neih tak tak chu kum 1975 Sep 25-28 atang khan a ni a, Pastor bial 37 atnagin zirlai 160 an tel a ni. Heng kan sawi atang hian Solfa kan thiamna hi a rei ve tawh hle a, chuvangin western ziarang hla kan nei hma pawh hi a demawm loh.

Comparision of Western Pop and Mizo Pop Song:

Music hian thil a tithei hle a, Plato leh Aristotle chuan, “Mipui zirnaah, an taksa thunun turin gymnastic hmang sela, an rilru thunun turin music hmang sela, mi dik takah an lo chhuak thei ang” an ti hial a. Plato-a vek hian Republic tih a ziakah, “Music ngaihthlak tam lutuk chuan mipa pawh a ti hmeichhia thei a, a tipiangsual thei. Infiamna an uar lutuk lahin a timawl (uncivilized) a, a tinunrawng thei” a ti hial a ni. (Mizoram leh Music P. 25). Music kan tih hi Greek tawng ‘Mousike’ atanga lak a ni a, Augustine chuan, “Music chu awmze nei taka ri control-na” tiin a sawi a ni (Mizoram leh Music P 29).

Hetiang khawpa Music in thila titheih avang hian Pop Song pawh hian nasa takin mi nunah nghawng a nei a. Kum 1950 vela Rock leh Jazz hrula kal ve mai mai ni si khan tunah chuan a thang duang ber leh thiltithei ber a ni ta hial a ni. Pop Song rau rauah hian sap ho pop song ziarang leh Mizo Pop Song ziarang hi danglamna eng emaw chen hi chu a awm ve a. In anna lai pawh tam tak an nei bawk a ni. An danglamna leh in anna tlem azawng lo tarlang dawn ila;

  1. Theme: Pop Song ziarang pawimawh tak leh langsar tak pakhat chu a tum (Theme) hi a ni awm e. Kan sawi tawh ang khan Pop Song chu sumdawnna (Commercial) a nih ber avangin a hunlai nun mil zelin a inher danglam ve zel a. Hla thu nem leh sak nuam, a music pawh dam raih leh mi zauthauna thlen thei a ni deuh tlangpui a. Chu chuan mi nunah nghawng neiin, hla lar Pop Song nih tir thei turin, a hla thu leh music te hi an tang ho ta vek mai a ni. Kum 1990-a World Cup Theme Song ‘To be no 1’ Giorgio Moroder-a phuah leh 2010 World Cup-a Shakira hla ‘Waka waka’ chu inang tawhlo tak a ni. Hla reng reng hi a hunlai mila lar tur ang zelin an ti danglam thin a ni. Hei hi Pop Song tum leh a ziarang (theme) lian tak pakhat chu a ni. Hei tak hi sap ho pop leh mizo pop song-ah pawh a ni chiah reng a. A hunlaia an duh thei tur ang berin hla thu kalhmang leh a music pawh a danglam ta thin a ni. Kum 1960 chho vela Vanhlupuii te, Ssailothangi Sailo hla leh tunlai Feli Fanai leh DJ. Lalvenhimi hla thu leh music chu danglam tawh tak a ni.
  2. Lyrics: Sapho hla thu kan en chuan, an hla nawlpuiah hian mihring nun nena inmil leh mihring nun an tarlang nasa thei hle a. Anni culture leh society-ah an zalen avangin an vei zawng leh duhzawng eng pawh sawi hi a rem vel vek avangin an hla thu pawh pehhel loin an sawi mai thin a ni. Tim Mcgraw leh Faith Hill hla ‘Let’s make love’ leh CFL-a hla ‘Kan vang khawpui bela chhingkhual i rawn chan ni khan e’ tih hla-a an nun an sawi dan chu in anglo tak a ni. Sapho-ah chuan Sex lam a ni emaw eng lam pawh pehhel lovin an sawi pawp pawp zel a, hei tak hi Pop Song rau rauah pawh an danglamna chikhat ve chu a ni. Mizoah chuan kan Society in min phuar avangte leh kan sakhuana avangte hian kan hla thuah pawh hian phuartu a awm a ni tih a hriat viau a ni.
  3. Love: Mizo leh Sapho pop song reng rengah hian a laimu ber chu hmangaihna (love) hi a ni awm e. Pop song ziarang lian ber pawh hi hmangaihna hi a ni ber a ni. Mahse hla hi chu kan chenna hmun a zir hian kan hla thu hman duh dan leh kan lunglenna pawh hi a inanglo hle a ni. Mizo hla kan thlir chuan Love Song ni si hian inthenna lam hla te, phuloh hla te, karhla hla te leh kir leh tura an duhna lam hla te leh pian rual loh hla te a ni deuh tlangpui a. Tin, Mizo chu khuarel (nature) nen an hmehbel tlangpui a. Renaisance period laia William wordworth-a ten Romanticism an tih leh Mizo hla hi chu inang tak a ni. Mahse sapho hi chu Love song pawh ni mahse khuarel (nature) nen a inkungkaih vak ngai lo va. A hmaa kan sawi tawh ang khan engkim pehhel lovin an sawi mai thin a ni. Hei hi chu Situational Effect a nih a rinawm ber a ni. Zirsangzela ‘Luahloh run’ te, ‘Darthlalang’ tih te leh Justin Timberlake-a ‘Mirror’ te chu danglam taka ni a. Lalzova ‘Mahriakten ar ang ka vai e Parte’ leh Elvis Presley-a ‘Can’t help falling in love with you’ te pawh a danglam hle a ni.
  4. Instrument: A hmasa lama kan tarlan tawh ang khan Mizo hian Music Instrument hi kan nei tha har hle a. Music Instrument tak tak hi chu kum 1960 hnulam a ni deuh fur hlawm a. Drum Set phei chu kum 1969-a ‘The Agent’s’ hoin Shillong atanga an rawn ken kha a ni mai a. Electric Guitar pawh hi Shillong atanga an ken chho tho a ni a. Hei hi a chiang lo va, kum 1969-a ‘The Agent’s’ ho lo kal hian an rawn ken chhoh tel ve a rinawm a, a chhanchu he band-a an lead guitar chu Remmawia Vanchhawng a ni a, chuvang Drum kan hmelhriat tanna leh Lead Guitar kan hmelhriat hun hi a inang viau maithei a ni. Sapho khu chuan kum 1924 khan Accoustic siamtu Engineer lar tak leh musician ni bawk Lloyd Loaran-a te leh a thian hovin an siamchhuak daih tawh a ni. Tin Piano kan tih pawh hi sapho chuan kum 1533-1603 laia Elizabeth I hunlai khan an hmangn daih tawh a ni. Chuvangin kan music dai hi a la inzau hleih hle a, hnam changkang hmasa an nih avangte pawh a niang kan la phalo hrih hle a ni. Tunlaia Music lam rem nana instrument an hman tak DJ (Disc Jockey) pawh hi keini chuan kan hmelhriatna a la reilo hle a, kum 1990 hnulam a ni maithei a ni. Sapho chuan kum 1935-ah an lo hmelhriat daih tawh a ni.

Conclusion:

Mizo hian Pop Song kan hmelhriatna a rei ve ta hle mai, Lalzova te, Durra Chawngthu atanga kan sawi dawn phei chuan kum 100 a tling ve ta reng dawn a ni. Mizo hian Pop Song awmzia kan hriat hma hauh atangin kan hla kalhmang leh duhdan hi a lo Pop viau tawh tih a hriat theih a. C. Dinthanga chuan Mizo hla rilrem zawng tak a ni a, music genre dang hi chu a larchhuak hleithei lo a ti hial a ni. Tin, Pop hi a music genre-ah a innghat em em lo va, hla thu pawh hian a ti pop em em tho a ni. F. Laltuaia hla-ah pawh ‘i sei bawra’ tih te leh a hunlai tawngkam lar tam tak hla dangah pawh hmuh tur a awm a ni. Chuvangin Pop hi a Music Genre ang thoin a hla thu pawh hi a pawimawh in a ti Pop tu khaidiat pawimawh tak a ni tih kan hre thei a ni.

Work Cited

  1. Lianzuala,Rev. ‘Mizoram leh music’. Gilzom Offset. 2012. Aizawl. Print.

Pachuau, Laltlanthanga. ‘Rimawi kamkeuna kailawn’.  LV Art. 1987. Aizawl. Print.

Personal Interview with C. Dinthanga, Editor, Lelte Weekly Magazine. Dt 15.4.2019 p.m

 

Reference:

Lalzama, Dr. ‘Mizo Language and Literature’ KL. Offset Printers . 2017. Aizawl. Print.

Lalrawna. R. & R.K. Lalhluna ‘Fam lalzova’. Gilzom Offset.  2018. Aizawl. Print.

 

Leave a Reply

Your email address will not be published. Required fields are marked *

error: Content is protected !!