Dr. Geoege Washington Carver
CHUNGLAM FINNA DILTU HLAWHTLINNA

-Biakhmingthanga Chhangte

“In zingah tupawhin finna a tlak chham chuan mi zawng zawng hnena hau lo leh ui lova pe țhintu Pathian chu dil rawh se,” Jakoba 1: 5.

A chunga Pathian thu kan tarlana “Finna” tih hi Thlarau Thianghlim sawina a nih rualin mimawl tifingtu chu Thlarau Thianghlim bawk a ni. Lal Isuaa “Nun Thar” neite, khawvel thila finna leh thiamna sang nei lo Thlarau hruaia awmte chuan “Finna, Hriatna ril” an nei țhin a ni. Khawvel mite mak tih an hlawh țhin. Chu Thlarau hruaia awmte chuan Thlarau hriattirna ang zelin thiltihtheihna mak leh ropui tak an nei a ni. Țhenkhat chuan mitthi kaihthawh theihna te, damlo tihdam theihna te an nei. Chutiang zingah chuan ki dang deuhin Dr. George Washington Carver-a chuan chunglam finna, mihringten nitin nuna an mamawh hmuh chhuah ropui tak a nei a ni. Amah hi țawngțaia Pathian pawl mi, Pathian ring tlat mi a ni. A rinna leh a nungchang hi kan entawn a țha ngawt mai. Chunglam finna a neih dan chu i han chhiar teh ang.

Chunglam finna neitu chu : Dr. Geoege Washington Carver-a, science lam thiam chungchuang chuan vawi tam tak a thil hriat theihna te, a thiam nalna te leh a hlawhtlinna te chu Pathian ațanga lo kal vek a ni tih a sawi țhin a. Amah tithatho va, tiphur turin englai pawhin amah siamtu Pathian lam a hawi reng a. A hnathawhna hmunpui ber, thil a finfiaha a enchhinna (laboratory)-a a luh apiangin finna dilin a țawngțaina hmunah chuan a lut hmasa ber zel a ni. Amah hi Negro sal chhungkua ațanga harsa taka sei lian leh Negro a nih avanga zirna sanga a luh ve an phal lo chungin he Negro pa inngaitlawm tak hian finna nasa tak neiin chawimawi leh mite ngaihsan leh hmingțhat a lo hlawh ta a ni.

Chawimawina a dawng : Kum 1935 khan United State of America sawrkara Agriculture Department-a dinhmun sangah dah a ni a. Kum 1949-ah Roosevelt-a tangkapui chu Science lama mithiam ropuite chawimawina pek a ni a.1941-ah Rochester University ațangin Doctor of Science, honorary degree a dawng bawk a. Kum 1942 khan Thomas Alva Edison Foundation for the Advancement of Science and Education chuan lawmman a pe bawk a. Heng bakah hian chawimawina sâng tam tak a thih hmain a dawng bawk a ni. Tunah hian a pianna hmun Diamond Grove, Missouri chu amah hriatreng nana America sawrkarin hnam hmun pawimawh atana a neih chu a ni.

A nun thuruk : George Washington Carvet- chuan Pathian chu finna a dil a, a nun thuruk chu hetiang hian a sawi a ni : “Ka hnathawhna hmunpui (laboratory)-ah engmah hmuhchhuah ka nei lo. Keimah maia heta ka lo kal hian ka bo va, amaherawhchu Krista zarah engkim ka ti thei a ni. Kei hi Pathian chhiahhlawh ka ni a, Pathian nen kan pahnih chauhvin kan awm a, a aiawh, a hmanrua keimah hmanga thu a sawina chu ka ni. Amah hnaiha ka awm reng chuan hei aia nasa leh tam zawk pawh hi ka ti thei ang. Ka țawngțaina leh ka hna te chu ka chawhpawlh a, a chang chuan Pathian chuan ka thawhrahte chu mal a sawm a. Lehkhabu pakhat mah ka hnathawhna (laboratory)-ah hian a lut ngai lo. Ka thil tih tur leh ka tih dan tur kal hmang chu ka hnenah hian a lo kal mai a. A tih dan tur kawng dapin ka buai ve ngai lo; a tih dan tur chu keimahah thil thar siam chhuak tura chawh phur ka nihin a tih dawn hunah a rawn puang chhuak mai țhin a ni,” tiin.

A thil hmuh chhuahte : America chhim lama an thlai chin nasat ber, la chi (mu) chu a nget hrik avanga dinhmun derthawng leh hlauhawma a han awm taka chuan Dr. George Washington Carver-a chuan badam (peanut) ching uar turin a râwn a. Chu badam thar chhuah chu hralh theih zat aia tam a lo thar takah chuan Pathian hnenah a thlen ta a. Badam rah ațanga thil siam theih chi hrang hrang zathum aia tam, țangkai tak tak tur hmuh chhuah a lo ni ta a ni.. Chungte chu : – chhangphut, bawnghnute, worcestershire chaw ei tuina (souce), rawng dumna te, rawng hnawih atan te, puan sukna powder te, thir tlereuh nawh tletna te leh hralh chhuah theihna zau zawk lo awm ta te – chung avang chuan badam chu America ram pumpuiah thlai chin pawimawh indawt dana parukna hial a lo ni ta a ni.

Ringtuten englai pawha duhna tak tak nena țawngțaia Pathian kan hnaih chuan finna a pe țhin a ni tih George Washington Carver-a nun ațang hian a lang chiang hle. Lal Isuaah a awm reng țhin avangin thiltihtheihna a nei a ni. Lal Isuan “Keimaha in awm reng a, ka thu bangmahnia a awm reng bawk chuan in duh apiang dil rawh u, in tan tihin a awm zel ang, Pa, Fapa avanga chawinawia a awm theih nan,’ a tih anga Amaha kan awm reng chuan a tiam angin thiltihtheihna kan nei dawn a ni. Chu finna nei tur chuan George Washington Carve-a tih dan lain țawngțaiin țan la rawh le, i bul lawkah a awm e. Ka tithlawn lovang che a, kal pawh ka kalsan tawp lo vang che,” a ti a ni.

Leave a Reply

Your email address will not be published. Required fields are marked *

error: Content is protected !!