Chhungkuaa nun ho dan tha – Upa K. Zalawma

CHHÛNGKUAA NUNHO DÂN ṬHA

Upa K. Zalawma

Lalpa ṭih apiang chu an eng a thâwl e, A kawng zawhtute chu. I kut thawh rim rah chu i ei dâwn si a; Lâwm takin i awm ang a, thawvengin i awm bawk ang. I nupui chu i in chhûngrilah chuan, grêp hrui rah duh mi tak angin a awm ang a; I fate chu, i dawhkân vêlah chuan olive ṭiakte angin an awm ang. Ngai teh, Lalpa ṭih mi chu chutiang chuan malsâwmin an awm ang. Sam 128:1-4.

Nupuite u, Lalpaa a âwm tâwk ang zêlin in pasalte hnênah intulût rawh u. Pasalte u, in nupuite hmangaih ula, an lakah vîn suh u. Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a. Pate u, in fate tinuar suh u; chuti lo chuan, an bei a dawng dah ang e. Kolossa 3:18‭-‬21.

Khawvel hnam hrang hrangte chhungkaw nun dan a in chen kher lo vang. Israel hnam chu Pathianin a Chanchin Ṭha khawvela hril nana a thlan chhuah an ni a, an hnam nunah chhungkua hi a pawimawh em em a ni.

Mizote pawh chhûngkaw ngai pawh hnam kan ni a, Pathian thu nen pawh a inmil em em bawk. Tun hmâ, thlawhma laa chhung tinte eizawnna mual khata kan liam ho lai chuan chaw ei hun te a rual a, khawtlang invawnna chenin kan inpawh tlâng ṭhin. Ram a lo changkâng a, eizawnna leh hnathawh a lo dang lam zêl tâkah hian chhungkua awm kim loh te, chaw ei rual loh te a tam a, chhungkhat pawh mu ho lo deuh vek kan ni ta a, ni khata inhmuh kim loh ni pawh a tam ta mai.

Heng hian chhungkuaa kan nun hona a nghawng nasa em em a, inzirtirna ṭha dawng lo naupang seilian kan ngah ta em em a; chuvangin chhungkaw nun ho dân ṭha hi kan zira kan din thar leh a pawimawh hle a ni. Heng point tlem tê hi lo zir ho dawn ila :

[adToAppearHere]

1. Ni tin chhungkuaa Pathian biak ho thin:
Ni tina Chhungkaw tana pawimawh hmasa ber pakhat chu Pathian biak ho hi a ni. Chhung inkhawm hi Pathian kan biak hona awlsam ber a ni a, Pathian thu leh nun dân leh awm dân ṭha kawng hrang hrangte inzirtirna remchâng ber a ni. Kan chhungkaw eizawn dân a zirin a hun chu a remchâng ber laiah neih mai a ṭha. Chhungkaw kim theih hun pakhat chu chaw ei lai hi a ni a, chuvangin chaw ei dawna chhûng inkhawm neih hi a tha hle; zîng aṭanga hna thawka chhuak ṭhin awmna chhûngkuaah chuan zîng thawh veleh chhûng inkhawm neih hi a remin a ṭha hle a, mahni inah zân pawh riah hram hram pawh tum tur a ni. Zân mut dawna chhûng inkhawm neih remchâng zawk pawh kan awm mai thei e.

2. Lalpa thununna leh zilhnaa fanau enkawl: Mi tin hi naupan lai hun nei vek kan ni a, puitling nu leh pa te hi fanau enkawl tur kan nih laiin, enkawl ngai kan nih hun pawh a awm vek. Mi thiamten chhungkua leh mi dangte nêna kan nun hona tura kan hriat tur an sawite zinga tlêm tê hi han sawi lawk ila, a pawimawh êm avangin kan chhiar hrâm hrâm dawn nia.

Chhungkuaa nun hona leh fanau enkawlnaah hian inbiak tawnna hi a pawi mawh em em a, kan ṭawngkam leh thusawi dan a zirin bo ruak a ṭhain a ṭha lo thei a, ṭawngkam bâkah kan zaizir leh chetzia (stroke)-in thu tam tak kan sawi reng tih pawh hriat tur a ni.

Inbiakna (Communication) : Ngaih dân, duh dân leh hriat dân sawi tawnna leh inthleng tawnna hi communicatin chikhat a ni. Hetah hian thil pali pawimawh tak tak a awm:
1) Inbunchhuahna (expression) :
Mi tin hian kan thinlunga kan vei emaw, kan thil hriatte sawi chhuah emaw, mi dang hrilh ve emaw, inbunchhuah emaw kan mamawh ṭheuh ṭhin. Kan thinlunga kan vei leh kan thinûrna chenin kan sawi chhuah zung zung theih chuan kan zâng huai ṭhin a, thinrimna pawh hi han àn bawrh bawrh hian a reh huai ṭhin. Chuvangin chhungkuaah pawh inkhap bet ringawt lovin kan fate thin rim pawh dawh thei takin an inbunchhuah hi lo dawn sawn zâwk tur a ni. Pa tam tak thimrimin bungrua tih chhiat an chin viau chhan pawh hi an nupuiten an ṭawngna hun kian lêk lova an ṭawng khalh zung zung vâng a ni fo ṭhin.

Inbun ruah nan hian hmanraw chi hnih kan hmang ṭhin:
i) Verbal expression – Tawngkâa kan sawi hi a ni.
ii) Non verbal expression – Zaizir leh thil tih hmanga kan inbun chhuahna hi a ni. Verbal expressionah hian thua kan sawi bâkah ṭah pawh a huam. Kan vei zâwng thil tam tak leh kan thinurnate kan sawi ṭhin a, kan lungngaih leh kan lawmin kan ṭap bawk thin.

[adToAppearHere]

Non verbal-ah chuan kan nui te, kan tûm bûr te, lû kan thing te, kan bù te, kan meng danglam te, kut kan bêng leh kan lâm leh thil tam tak zaizira kan tih te hi kan in bun chhuahna hmanrua vek a ni. Ṭawngkâa sawi ai chuan mittui hian mi a hneh awl zâwk bawk. Heng hi a ṭha zâwnga hman tangkai thiam hi chhungkaw in enkawl nân a pawimawh.

2) Ngaihthlâk (listening) : Kan hnêna miin thu an sawiin dawhthei taka lo ngaih thlâk a pawi mawh. An thu sawi zawh hmâa lo sawi ve sek kan ching fo. Kan ngaithla mang lo nia an hriat chuan an sawi tur pawh an sawi zo ngai lovang.

Mi thusawi ngaihthlâk hi hna ropui tak a ni. Miin kan thu an awih kan duh chuan an thu kan ngaithla hmasa phawt tûr a ni.

Hemia pawimawh te:
i) Kan kawmte nen inhmchhawn ngei a tha.
ii) Kan inkawm laiin kan position chu a hahdam (relax) tur a ni. Kan ṭan hmun a rem loh chuan chet chet a awl a, rilru a la peng duh. Fate kan zilh a nih pawhin vei thuak thuak pah ni lovin, inhmachhawnin thu hrilh ṭhin tur a ni.
iii) An rilrua an veite a tam thei ang ber an sawi chhuah theih nân kan hrethiam ngei a ni tih zaizirin kan lantir tur a ni a, kan pawmpui tih an hriat chuan an thâwl hawk hawk ṭhin. An thinrim a nih pawhin a reh huai thei a, an lâwmna lam a nih pawhin kan lawmpui tih an hre thei tur a ni.
iv) An rilru chhiar tum rawh: Kan mi kawm leh biak ten ṭawngkâa an sawi zawh theih loh emaw, sawi thiam loh emaw, sawi ngam loh emaw an nei thei, chûng hunah chuan chetzia/zaizir (non verbal)-in an lantir fo ṭhin. A kut ke chêt vel dân te, a chal a chuar dân leh a men tâl dân aṭang tein a thil vei te a hriat dâwn a ni.

Heng hi inbun chhuahna vek a ni a ngaihthlâk tel ngei tur a ni.

3) Chhân lêtna(responding) : Mi nena kan inkawmin emaw, miin kan hnena thu an sawiin emaw, eng emaw ti talin chhân lêt a ngai ṭhin. Kan chhânna chuan an thusawi chhunzawm zel turin emaw, sawi zawm tawh lo turin emaw a ṭanpui ṭhin.
Mi thusawi kan lo chhan ṭhin dan hian an nunah awmzia thui tak, a chhe lam emaw, a ṭha lamin emaw a neih ṭhin avangin lo chhân dân hi a pawimawh em em a ni.

Mi thu sawi chhan dan kawng 5 lo sawi ila:
i) Evaluatiive response : Mi thusawi dik leh dik lo te, a ṭhat leh ṭhat loh te, a ,angkai leh kai lohna te sawisakna chhânna hi a ni. “I thu sawi chu sawi sawi tlâk pawh a nih loh chu, thil ho mai mai a nih chu,’ emaw, “I thu sawi chu a dik khawp mai,” emaw tia kan inchhân ṭhinna ang hi a ni.

ii)Interpretative response: A thusawi awmzia hrilhfiah sak paha chhanna a ni. “Chu thil chu chutiang/khatiang vâng chu a nih chu,’ kan tih ang chhanna hi.

iii) Supportive response : An mahni ṭan zâwnga chhânna a ni. “Chu thilah chuan thiam lohna i nei lo ve,’ kan tih ang hi.

iv) Probing response : Mi thusawi chiang lehzuala hriat kan duh avanga zâwt paha kan chhânna ang hi a ni. Kan faten ṭap chunga kan hnena an rawn zualko laia, “Liana’n min vel i tia lo?” kan tih ang hi a ni.

v) Understanding reponse : Mi kan kawmte tuarna leh rilru hahna hre thiam tak chunga lo chhânna ang chi hi a ni. “Chuti a nih chuan i tan chuan a mangan thlak dawn a nih tak chu maw le,” kan tih ang hi. Hei bâkah hian Advising response an ti a, Mi thurâwn pêkna ang chi hi a ni. “Science subject hi zir la, i inchhir lo berin ka ring,” kan tih ang te hi advising response a ni.

Heng lo pawh hi a la awm ngei ang, heng aṭang hian a hun leh a hmun leh thil awm dan azirin an ṭangkai vek a a ni. Counselling-ah chuan Client-te an inbun chhuah tam leh zual nan ‘understanding response’ hi counsellor-ten an hmang uar hle.

Kan sawi tak aṭangte khian kan fanau enkawlnaah emaw, chhungkua kan inbiak tawnnaah emaw a ṭha zawng siam tûra hman tûr chhânna chu kan hrethiam tawh maiin ka ring.

4) Rilru chi hrang hrang (transactional analyses) :
Mi thiamte chuan mi tin hian rilru ze hrang pathum kan nei ṭheuh niin an sawi a, chungte chu : a) Parents ego state = Nu or pa rilru zia.
b) Adult ego state = Puitling rilru zia.
c) Child ego state = Naupang rilru zia te an ni.
A hmasa ber nu or pa rilru zia kan tih hi mihringa pa chan channa zia, hotu nia inhriatna, roreltu, mi chunga thu nei nia inhriatna zia, mi hau leh tirh duh maina rilru leh naupang kan duat anga mi dang kan duat leh hluauna zia ang chi hi a ni.

A ze pahnihna, puitling rilru zia hi chu mihring ze puitling lai ber, thil engkim a chhia a ṭha puitling taka tih duhna zia hi a ni. He zia hi chuan thil engkim mai hi fel thlapa tih duhna a nei a. A thil tih tur apiang a ngaihtuah nawn dim diam a, a tih sual pawhin siam ṭhat leh dân a ngaihtuah a, a pal zam mai mai ngai lo. A tlin lohna pawh a pawm ngam ṭhin a, ngaihdam dil pawh a huam ṭhin a ni.

A pathumna, Child ego state hi chu nuapang ze dik tak, pangchanna leh tih tauhna zia hi a ni. A hlim leh hlim lutuk, a ngui leh ngui ngui lutuk bawk ang chi hi. A hlim lai tak pawhin thinurna a lo kal chuan ṭap leh mai thei bawk. A ṭah lai pawhin awlsam takin a rilru a hruai kawi daih thei.

Heng kan sawi tâk ziate hi mi tinin kan neih theuh a, a ṭangkài hun pawh a awm ṭheuh ang.

[adToAppearHere]

Dân tlangpuiin Mizo paho hian kan ze hrang hrangte hi hman hun leh hman dân kan thiam lo tlangpui a, kohhran hruaitute leh sipai bâng leh zirtirtu ṭang rei ten an thiam lo leh zual em ni a tih theih. ‘Ka’ tih fote hi nupui fanau tân ngaihthlâk a ninawm hma em em a ni. Nupa inkâra harsatna te, kan fate nena kan kar boruak awm fo ṭhin pawh hi kan zia leh an zia inhriat tawn sak loh vang te, kan ze hman dik tawk loh vang te a ni fo thin.
Entir nan: Pa berin – “Arsa ei a va chakawm ve le'” = Child ego state.
Nu berin : “Ar i rawn hawn em ni, i hlawhin a daih lo,” = Parents ego state.

Nu berin amaha puitling zia (adult ego state khan, “Hlawh lak leh hunah kan lei ang a, i duh ang zânin kan siam ang a, puar takin i ei dawn nia,” tiin chhâng se, zanriah ei a tui loh phah chuang lovang.

5) Tarte chungchang : Chhungkuaah kum 60 china upa an awm chuan ‘tar’ kan tih hian a huam ṭan tawh a ni. Tarte hi ngaihsak tur an ni a, an khawhar thei em em a, kawm hlim an mamawh em em a ni.

Hengte hi hria ila:
1) Pitar leh putarte hian “Tar” tih hi an duh reng reng lo. ‘Tar a’ ‘Tar chhia’ tih te hi an huat zâwng tak a nih avangin hetiang hian tih loh tur a ni.

2)Hmuh khât deuh leh an dam loh nikhuaah pawh, “I va tar ve, i va chhe ve,” tih ai chuan, “I va nula/tlangval ve,” tih zâwk ṭhin tur a ni.

3) Naupang rilru an put thar leh avangin fak an lawm a, duat te an phût a, naupang ei tur lei
enaw hawn sak pawhin hawn kêp zêl tûr a ni a, fak leh dûat tûr an ni.

4)An titi tui ber chu an kawppui te leh an vanglai hun sawi te a ni a, chûng chu zawh leh sawipui ṭhin tûr a ni.

5) An taksa leh silhfente fai taka enkawl sak ṭhin tûr a ni.

Kan sawi tâkte hi chhungkaw inpawhtawnna siam nân a pawimawh êm êm a ni tih i hrereng ang u.

3. Chhungkuaa Lalpa rawngbawl : Ringtu chhûngkua chuan kan in leh loah te, Khawtlâng leh Kohhranah te Pathian duh ang zawnga thil kan tih ṭhin hian Lalpa rawngbâwl kan lo ni a, a bik takin kan inchhûngah chuan kan chhûngkuain Lalpa rawng kan bâwl theihna tûr chu inngeih tlâng dial diala kan tih theih tâwk ṭheuh te tih leh inkhawm ṭhinte hi a ni tih i hre thar leh ang u.

Kan chângthlana kan hmuh ang hian, Lalpa ṭihtute chu malsawmin an awm thin a, Nupa inhmangaih tawn te, nu leh pa te thu zawm te, fate tih thinur lohte hi chhûngkuaa Lalpa rawngbâwlna bul ṭanna a ni a, chhungkuaa nun ho dân ṭha pawh a ni e.

[adToAppearHere]

Leave a Reply

Your email address will not be published. Required fields are marked *

error: Content is protected !!