CHHUNGKUAA LALPA RAWNGBAWL

K. Zalawma

“Chuvângin, Lalpa chu ṭih ula, tihtakzet leh dik takin a rawng chu bâwl ula, in thlahtuten Lui râl leh Aigupta rama a rawng an bâwl ṭhin pathiante kha paih vek ula; Lalpa rawng bâwl ang che u. Tin, Lalpa rawng bâwl hi ṭha lo âwm anga in hriat chuan, vawiinah hian tu rawng nge in bâwl dâwn thlang mai rawh u: in thlahtuten Lui râla a rawng an bâwl ṭhin pathiante kha nge, in luah ram Amor-hote pathiante kha? Kei leh ka chhûngte erawh hi zawngin Lalpa rawng a ni kan bâwl dâwn ni,” a ti a. Josua 24:14‭-‬15.

Tin, a deh atân a hnênah naupang tête an rawn hruai a; tin, zirtîrte chuan an lo hau va. Nimahsela, Isuan chu chu a hmuhin a lungni lo êm êm a, zirtîrteho hnênah chuan, “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a. Tihtakmeuhvin ka hrilh a che u, tu pawh Pathian ram chu naupang têin a lawm anga lâwm lo apiang, a chhûngah an lût tawp lo vang,” a ti a. Tin, anmahni chu a kuangkuah a, an chungah a kut nghatin mal a sâwmsak ta a. Marka 10:13‭-16.

Joshua chuan a hun tâwp dâwn khân Israel mipuite hnenah, “In thlahtuten Lui râl leh Aigupta rama a rawng an bâwl ṭhin pathiante kha paih vek ula, Lalpa rawng bâwl ang che u,……..Kei leh ka chhungte erawh hi zawngin Lalpa rawng a ni kan bâwl dâwn ni,” tiin a sawi a nih kha.

Luiral : (Beyond the River) Thuthlung Hluiin hrilfiahna dang awm chuang loa ‘lui’ a tih chu Euphrates lui a ni ṭhin. ‘Lui râl’ tih pawh Euphrates lui râl tihna a ni. Asuria leh Kaldai ram te kha Euphrates lui Abrahama te kha kam khawchhak lama awm a ni a, Abrahama te kha Kaldai rama an awm lai chuan milem pathian be ṭhin an ni.

Aigupta: Jakoba leh a fate ṭàm tlàn tura an chhuka an awm hlen takna kha Aigupta ram a ni a, Pharoa bawih an lo nih tak khan Aigupta mite milem pathian kha an be ve ta mai a ni tih Joshua thu atang hian a lang reng mai.

Amor ram: Amor hnamho chênna chu Moab leh Ammon inkar Tupuithi leh Jordan lui chhak lam ram hi a ni a, Israelte Kanan rama an luh hma khan he lai ram hi an luah a ni. Amor-ho chu milem pathian bia bawk an ni.
Milem pathian biak leh a rawngbawl chuan sualna chi hrang hrang, hurna leh mihring hial hmanga inthawina a keng tel a ni.

Hetiang pathian rawng bawl ai chuan Lalpa rawngbawl zawk turin Joshua hian Pathian mite chu a chah a, an zawm dawn loh pawhin amah leh a chhungte chuan an bawl tho tho dawn tiin a hrilh a ni.

1. Tu rawng nge kan bawl ve dawn?: Israel fate khân Pathian rawng an bawl hnuah pawh an harsat viau lai te, an nawmsak viau lai te khan Pathian an ring zo lo fo va, hnamdangte pathian an be ve leh mai ṭhin. An lal ṭha deuh-ten milem pathian an then fai châng pawh khân hmunsânga inthawina chu an thehthang tel lo fo ṭhin a; a chhan nia ngaihdan pakhatah chuan, an pathian biak khân a lo ṭanpui lo hlauh a nih pawha an mahni ṭanpui turin milem pathian hnena inthawina kha an tibo duh lo ṭhin nia rin a ni.

Chutiang chuan Kristian chhungkua kan nih tawh hnu pawh hian, van Pathian bâkah rin tel neih ve hi kan ngah ve tho lo maw? kan hlimna leh hlawhtlinna min petu te, kan mangan leh kan nat chânga damna thlentu leh minpuitu tûra kan beiseite hian Pathian a thleng pha lo fo ṭhin em? Khawvel mi lian leh thuneitute emaw, kan dam nân Pathian aiin a thilsiamte hi kan ring hmasa zawk fo țhin em? Chûng zawng zawng hmasa zawkah chuan Lalpa ringin a rawng bawl tlat tur kan ni.

2. Lalpa ṭiha tih tak zet leh dik taka rawngbawl a ngai: ‘Lalpa ṭih’ tih chu Pathian chu Lala neiha hlau chung leh zah chunga a thu zawm tihna a ni mai. ‘Rawngbawl’ tih chu ‘Pathian thu anga nun leh thil tih’ tihna a ni leh mai e. Chuvangin, Kan ni tin khawsakna hmun apianga kan awm dân, ṭawngkam leh thil tihte hi Pathian thu nêna inrem zêla rilru leh thinglung taka tih hi Lalpa ṭih leh dik taka rawngbawl dân chu a ni.
Pathian thu nêna inrema kan nun chuan dik lohnain keimahniah hmun a chang lo vang.

3. Chhungkuaa Lalpa rawngbawl:
‘Chhungkuaa Lalpa rawngbawl’ tih hian chhungkaw member tinin kan phak tawk ang zela Pathian thu kan nunpui ṭheuh hi a a tum niin a lang.
1) Mahni inchhungah: Tirhkoh Paulan min zirtir angin naupangten Lalpaa Nu leh Pa thu zawm te, Nu leh Pa ten Lalpa thununnaa fate kahhruai hi kan rawngbawlna kawng hmasa a ni. Fanaute Lalpa hnena hruai hi chhungkaw rawngbawlna tur a ni. Isua hnenah kuta a lo deh a, mal a sawmturin naupang te te an rawn hruai ang khân, kan fanaute Isua hnena hruai hi Lalpa rawngbawlna a ni.

2) Kohhranah: Chhungkuaa Pathian biak hote, Biak In leh Sunday School-a kal te, thawhlawm thawh te, Kohhranin tih tur a tih ang zawm leh tih hi chhungkaw tin rawngbawlna tur a ni.

3) Ṭhenawm khawvêngah: Chhungkaw member tinin ṭhenawmte lakah ṭhat chhuah hi kan rawngbawlna pawimawh tak a ni. Miin a ṭhenawmte a rêl fo chuan, a rawngbawlna dang pawhin dem a hlawh phah ang.

4) Khawtlangah: Khawtlang roreltu leh Pawl hruaitute thu zawm hi Lalpa rawngbawlna a ni.

4) Sawrkarah: Sawrkar laka rinawm a, thupek awih a, tih tur tih leh khapna thupek zawm te hi rawngbawlna pawimawh tak a ni.

A tawp berah chuan, Chhungkaw member tinte kan inchhûng khurah kan in ngeih a, kan inhmangaih tlàn a, kan tih theih tawk apiang kan tih tlàna kan thawh ṭheuh hi chhûngkuaa Lalpa rawngbawlna a ni a, He mi kal kâna Kohhran leh khawtlanga va inpek viau ringawt hi a kalh a kim lo va, mahni inchhung khurah Lalpa rawngbawl hi kan ṭan hmasa phawt zawk tur a ni ang. Chumi hnuah mi dang tana thil ṭha tih hi Lalpa Isua rawngbawl nihna a ni e (Kol 3:22-24).

Leave a Reply

Your email address will not be published. Required fields are marked *

error: Content is protected !!