Chhanna dik kan pe em – Lal Ramhluna Ralte

Matthaia 16:16-17 Tin, Simon Peteran, “Krista, Pathian nung Fapa chu i ni,” a ti a, a chhang a. Tin, Isuan a hnenah, “Simon Bar-Jona, i eng a thawl e; tisa leh thisenin a hriattir che a ni si lo va, ka pa vana miin a hriattir zawk che a ni.”

Isua kha khawvela a len lai khan hlim hmel reng reng a hmu lo, a nui ngai lo angin sawitu tam takin an sawi ka hre tawh thin a. A dikna lai a awm tho awm e. Amaherawh chu a nui tih chiah chu ziak ni lo mahse lawmna tam tak a nei a ni tih erawh chu a hriat theih. Zakaia ina a thlen chilh tum a, Zakaia a inlamlet nghal mai a han hmuhte khan a hlim hian a rinawm a ni. “Vawiinah he inah hian chhandamna a lo thleng ta, ” tiin hnehna a puang a. Misual sim a hmuh khan ava lawm dawn em aw! tih chu ka ngaihtuah thin. Kum sawm leh kum hnih zet hmeichhe thi pûtin rinna nasa tak maia a puan hmawr chauh deka damna a chan tumte khan a hlim hian ka ring thin. Mitdel Bartimaian beidawng duh miah lova a auh khan Isuan a ngaisak lo thei lo. Amah mamawhtu nia inhriaa pantute khan an tihlim ngawt ang chu!

Tun tumah pawh hian chhánna dik tak petu Petera lakah hian a lawm hle tih a hriat theih. “Simon Bar-Jona i eng a thawl e,” tiin a chhang nghal mai a ni.

Miten min hai, min hai chuan a nuam lo duh ve khawp mai! Kan bulah an awm tam lo va, min hre chiang lova, min ngaihsak tak tak loh vang a ni fo. Kan bula awm reng thinte chuan min hai ngai em ni?

Lal Isuan a zirtirte hnenah miten amah an hriat dan a zawt a. Thenkhatin Baptistu Johana a ni, an ti a, thenkhatin Eliza a ni an ti che, ” tiin an chhang a. A nih leh nangnin tunge ani mi tih? a ti ta khauh mai a. Chu veleh Simon Peteran, “Krista, Pathian nung fapa chu i ni.” tiin a chhang ta chiah mai a. Isua a va lawm em! “I chhang dik zet mai,” a ti nghal a ni.

Zirtirtuten zirlai hnenah zawhna an siam a, an chhan dik ngai loh chuan an zirlai an ngaihsak lo niin an hria a, an lawm thin lo, chhanna dik petute chungah an lawm thin.

Greek tawnga ‘Christos’ chu hriak thih (Anointed) tihna a ni a. Fakna hlain,
“Chhandamtu Pathian sahriak thih, ” a tih ang khan Isua chu Pathian hriak thih a ni.

Bible-a Pathianin hriak a thihte chu lal ni turin hriak a thih thin. Saula chu Israel lal hmasa ber atan hriak thih a ni a. Davida pawh kha Israel lal atan hriak thih a ni.
Thuthlung tharah chuan Bethani khuaa Mari khan Isua chu hriak a thih a, a ke leh a lû-ahte a chulh a ni. Chu chu Isuan a taksa chu phum turin a buatsaih a ni tiin a sawi. Chumi awmzia chu Isua chuan chhandamna atan a nun a pe dawn tih a hriattirna a ni.

Pathianin Isua chu Lal leh Chhandamtu ni turin hriak a thih a, a chawimawi a nih chu! (TT. 5:31)
Isua, Lal a nihna leh Chhandamtu a nihna hriaa pawmtute hian chhânna dik an pe a ni.
Chhânna dik pe theitute chu a hnena awm rengte hi an ni. Isua hlata awm thin ten chhanna dik an pe thei ngai lo vang. Chhanna dik kan pe thei ang em le?

Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!