Chhan loh tawngtaina (Unanswered Prayers)

CHHAN LOH ṬAWNGTAINA (UNANSWERED PRAYERS)   – Garth Brooks

-Lalrammuana Sailo

A khuhhawnna : Hla tam zawk hi chu an phuah chhan nih chakawm ngawih ngawih a ni ṭhin a. Mahse chutiang ni ve hauh lo, an phuah chhan tana thinrim leh zahthlak tur khawp chu a lo awm ve tho mai. Dik tak chuan ‘Kan lo innei lo kha chu a va han lawmawm’ han intih ringawt pawh  a tuartu tan chuan na deuh tur a nih laiin, chutiangah pawh duh tawk mai lova, a darh zau thei ang bera hlaa han phuah zui leh ‘Pathianin nang ka dilna che a chhan loh avang khan Pathian hnenah lawmthu ka sawi ṭhin’ ti chunga khawvel hmaa tlangauzui chu tu tan mah hian thil lawmawm a ni ngai lo ang. Mahse khawvel a ni miau a, mi tam tak hi chu hmanlai tluk loin puan ang kan chul mek zel a ni.

Nupuite nen inkhel enin : Zan khat chu Brooks a chu a nupui nen chuan an khaw football inkhel enin an chhuak a. An rin loh deuh pawh a ni mai thei. Brooks-a High School kal laia a ngaihzawng ṭhin chu an hmu fuh a, an nupa chuan Brooks-a ngaihzawng hlui awmna lam chu an pan ta a. Chutia a ngaihzawng hlui a han hmu leh chu Brooks-a tan chuan thil mak a nih rualin thil lawmawm tak a ni lawi si. A ngaihzawng hlui a han hmu leh chiah chu Brooks-a mitthlaah chuan a tunhma nunte chu a rawn lut zut zut a. Tuna a hmaa ding mek a vei ṭhin zia kha a hriatpui chiangtu ber chu Pathian a ni ang a. A ngaihzawng a neih theih nana a ṭawngtai nasat theihzia leh a ngaihzawng tana a inhuamnate pawh kha siar sing-sang-sawmsarih lak tum aiin a nepna a awm bik chuang lo ṭhin a nih kha.

Just the other night at a hometown football game
My wife and I ran into my old high school flame
And as I introduced them the past came back to me
And I couldn’t help but think of the way things used to be

Ngaihzawng la na mi : Brooks-a chuan High school a kal lai chuan ngaihzawn deuh mai a tawng a. Chu hmeichhia chuan a rilru zawng zawng a luah a. Hriatthiam awl tur zawnga sawi chuan Brooks-a chuan a hmangaih a tawng ta a ni.

Brooks a thil tawn hi a mak lova, a dik tak chuan khawvela mihring tam ber hi amah anga ngaihzawng la na mi kan ni. Mahni duh zawng ngei, kan hmangaih em emte neih theih hi a hlu a, chutiang thleng phak lo tam tak chu an awm. Mizo pipute chuan ‘duh loh nena se chhun khuangchawi ai chuan, duh tak nena bahra laih a thlanawm zawk’ an lo ti ṭhin a. Chu rilru, i rilru leh kan rilru ni bawk chu umin Brooks-a pawhin Pathian hnenah tuna a hmaa ding mek nula chu dilin a lo ṭawngṭai tlut tlut tawh ṭhin a. A chang leh ‘Aw Lalpa, he nu hi min pek phawt chuan thil dang engmah ka dil tawh lo ang che’ tiin naupang chhe thil ngen takin a han ngen leh ṭhin a.

 

CHHANNA AWM LO ṬAWNGṬAINA  : Chuti taka nasaa a hmangaih chung leh chuti taka ngenngawl taka Pathian hnena a dil ṭhin chung chuan Brooks-a ṭawngṭaina chu chhanin a awm si lo. ‘Dil rawh u, tichuan in hmu ang’ titu chu dil loh ang maiin a reh vung vung a. Chu tleirawl hmelhriat satliah nih ringawta lungawi zo lova a changtupa bera ṭan tum mek Brooks-a tan chuan a ṭawngṭaina te chhana a awm lo chu a manganthlak ngawtin a rinawm.

School-a a ṭhutna dawhkanah te chuan mi hmuh hlau tak si, tu emawin a lo hmuh ngei beisei chung si khan a ngaihzawng hmingte a han ziak ang a. Lehkha zir lai te chuan pawn lam hawiin a ngaihzawng nena an hlim dun dan tur te chu a lo suangtuah veng veng ṭhin ngei ang. Tlai a lo ni ang a, a ngaihzawn em em mai chu biak pawh tumin school kawtah te chuan a lo chang ṭhin ang a, a nih loh pawn mi tu emaw kaltlangin inhmelhriat tir phet a tum ang a, mi zakzum mi a nih phei chuan Brooks-a chu a va khawngaihthlak ṭhin dawn em! Mahse Brooks-an a khumlaizawla a lo suangtuah ṭhin chu a thlawn a, a ngaihzawng nei tura a beihna chu a hlawhchham a, Pathian pawh beisei tur a awm tawh lo ang maiin a reh vung vung a. Nun hi a ruak ang a, a la beidawng a la beidawng ṭhin ta ve ang, mahse thih thlang lova dam i duh tlat chuan zangkhua pawhin bungbut hun a nei ang a, ngaihzawng vanga harsatna neite tan pawh chu harsatna pumpelh hun chu a la awm ngei ang tih beisei chungin Brooks-a chu a nung ve hram hram pawh a ni mahna. A ngaihzawn em em mai nei thei lovin a school nun chu a hmangliam ta a ni.

She was the one that I’d wanted for all times
And each night I’d spend prayin’ that God would make her mine
And if he’d only grant me this wish I wish back
Then I’d never ask for anything again

Khuarei hian min hnem ṭhin an ti a, mahni lehkha zirlai theihnghilh hlau tak ni ve ngei tur Brooks-a  pawh chu thil a theihnghilh theih avanga Pathian hnena lawmthu sawi fo tur a ni ngei ang. Khuarei chuan a hnem ve a, a high school ngaihzawng a ngaihzawnna rilru chuan a kiansan ta deuh a ni ang. Hmangaih tak dang a tawng a, nupuiah hial a nei ta a. Tichuan chu a nupui nen chuan inkhel enna hmunah chuan high school a kal laia a ngaihzawng hlui chu an hmu fuh ta a, chu hmunah ngei chuan Brooks-a chuan Pathian hnenah lawmthu a sawi a.

THANGHNIANG A CHUL ZO VA : A ngaihzawng hlui chu a han en ṭhin a. Tun hmaa a lo mitthla leh a lo ngaihzawn ruk em em, van Angel ni maia a hriat ṭhin kha tunah chuan a hmel te pawh awih harsa khawpin a lo chuai danglam tawh a. Hun hian mihring nihphung leh pianzia hrim hrim pawh hi min lo thlak danglam thei hle a ni tih chu a ngaihzawng lan dan aṭang ringawt pawhin chiang takin a hre thei.  Nunhlui liam ta, a ngaihzawng a ngaihzawn em em ṭhin lai leh a ngaihzawng chu atana khawvela nula duhawm ber a nih lai hunte chu han sawi chhuak a, han tharthawh leh an han tum a, mahse chu zawng a harsa a ni.

Brooks-a chuan, a ngaihzawng hlui nena an inhmuh loh kara a ngaihzawng ṭhin hmel lo chuai zo ta chuan mawhpuh tur a zawng ruai a, Pathian pawh a dem lek lek mai. Chuti taka hun leh niin nula hmelṭha a sawisa danglam thei chu a mak a, a khawngaih duhtu tan phei chuan a khawngaihthlak hle ang. A ngaihzawng hlui hmel chu Isaia 53:2-a “piahmang thatna leh hmêl mawina rêng rêng a nei lo va; amah kan hmuhin amah kan duhna tûrin mawina rêng rêng a awm lo” a tih ang chiah chiah kha a ni hial mai thei, tun hmaa a lo ngaihzawn ṭhin em em hmel chu a han thlek ṭhin a, hmangaih tur chuan hmangaihna tam tak neih belh ngai tur chi niin a hria a.

She wasn’t quite the angel that I remembered in my dreams
And I could tell that time had change me, in her eyes too it seemed
We tried to talk about the old days, there wasn’t much we recall
I guess the Lord knows, what he’s doin’ after all

LAWM TUR RENG KAN LO NI : Chutia an inbiak zuai hnu chuan a ngaihzawng hlui pawh chu a kal sawn ve leh ta a. Brooks-a chuan thil tam tak a ngaihtuah a, Pathian chuan a lo hmangaih hle niin a hria a. A kiang maia ding a nupui chu a va thlek ṭhin a, nei fuh a inti a. Pathianin nupui ṭha tak a pek avangin a lawm a. A tleirawl laia a ngaihzawng ṭhin nu hmel lo danglam ta chu a han mitthla leh a, amah dila a ṭawngṭaina zawng zawngte Pathianin a lo chhang lo kha a lawm em em bawk a. Amah chu Pathianin a lo duhsak hle a ni tih a inhrechhuak a.

And as she walked away and I looked at my wife
And then and there I thanked the Good Lord for the gifts in my life
Sometimes I thank God for unanswered prayers
Remember when you’re talkin’ to the man upstairs
That just because he doesn’t answer doesn’t mean he don’t care
Some of God’s greatest gifts are unanswered prayers.

Brooks-a chuan kan ṭawngṭaina a chhan loh vang ringawtin Pathian chuan min ngaihsak lo tihna a ni chuang lo tih a hre chhuak a. Chumai chu a ni lo, ‘Pathian thilpek ropui ber ber chu kan ṭawngṭaina a chhang lo fo ṭhin hi a ni’ tiin midangte pawh a chah lawm lawm zawk a. Brooks-a thuchah hi tuipui ve thei turin nang leh kei hian hringnunah eng thil emaw kan tawng ve tawh ngeiin ka ring a ni.

Some of God’s greatest gifts are all too often unanswered…
Some of God’s greatest gifts are unanswered prayers

 A lawmthu sawi chhan erawh a ngaihzawng hlui a tawn leh vanga lawm satliah a ni lo

Sometimes I thank God for unanswered prayers
Remember when you’re talkin’ to the man upstairs
That just because he doesn’t answer doesn’t mean he don’t care
Some of God’s greatest gifts are unanswered prayers

(P.S :  Brooks-a chuan Larry Bastian leh Pat Alger te puihnain he hla hi a phuah a. He hla thu aṭanga a tak taka a thlen dan ang ni lo awmchhun chu a bialnu hlui nena an intawn leh dan a sawi hi a ni a. A bialnu hlui nen chuan inkhel enna hmunah ni loin chhawmdawl ngai tleirawl kum sawmpariat mi puala vehbur an khawnna hmun ‘Kraft fair bazaar’ -ah zawk an intawng a, mahse a hla thu nena inhmeh zawka a hriat avanga thlak a ni. Brooks-a chuan ‘Hlimna chu kan thil duh kan neihnaah ni loin kan neihte kan mamawhnaah a innghat zawk a ni’ a ti ṭhin. He hla sawizauna hi Staines Memorial School-a ka thawh lai 2014 a kan Principal Sir Rama thusawi aṭanga ka ziah zawm a ni)

 

 

Leave a Reply

Your email address will not be published. Required fields are marked *