Chhak leh thlang indo hnua inremna an siam dan – Chhak leh thlang indo remna sa ui tan

– L.Sanglura Sailo
Ramhlun South, Aizawl

Kum 1870 chho-ah Ṭhingtam hma aṭang khan Lalpuiliana thlahte leh Mangpawrha thlahte inkarah inhriatthiam lohna a awm a; an indo phah ta hial a, chu chu ‘Chhak leh Thlang Indo,’ an vuah a. Indo chuan reh lam aiin zual lam a pan zel a, Mangpawrha thlah ami Thanghulha, Lalsutpuii pasal khua Buallawn pawh chu Liankhama, Vangte khaw lal chuan a rawn run a; Buallawn chu an darh zo ta a. Thanghulha chuan Lalhleia, Sailutara awm chu a han bel a; mahse Lalhleia chuan a nuhoa awm a, a khawper Hnahsep-ah chuan Thanghulha chu a awm tir ta zawk a. Thanghulha hi zu ruih chhe tak mai a ni a, Lalhleia nu Chawngpuituali chu hmusit takin a tibuai ṭhin a. Chawngpuituali ṭhinur chuan a vahpa Pawihbawiha, Zawngin a awm chu a han hrilh a. Pawihbawiha chuan Darkhuma hovin upa a rawn tir a, Thanghulha Hnahsep a awm chu an zuk man a; Zawngin lamah an hruai chho va, rei tak an tantir a ni.

Ṭhingtam dawn avang khan khaw tin mai chu sazuin an buh a seh sak  a, buh seng tur an nei dawn lo tih an in hria a, nasa takin harsatna an tawk dawn tih an hriatin khawchhak lam lalte leh khawthlang lam lalte chuan inremna siam an rawt ta a. Lalhleia khua Sailutar chu intawh khawmna atan an ruat ta a ni. Sailutar-ah chuan Khawchhak lalte leh an ṭhuihhruaite an awm a. Hnahsep-ah khawthlang lalte leh an ṭhuihhruaite an awm bawk a. Sailutar-ah chuan an inbe ta a. Khawchhak lalte leh Khawthlang lalte chuan an inbiakna a tlawlh hlauh va, inkah mai a ṭul takin tiin an awmna ve veah chuanin kah mai peihsain an inralring ve ve bawk a. Ni thum lai an inbiak hnu chuan an inremthei ta a, an inremna nemnghettu atan Sailutar leh Hnahsep inkar kawnah chuan ‘SA-UI-AN TAN,‘ ta a; helai hmun hi vawiin ni thleng hian ‘Sa ui tan kawn’ tih a la ni.

KHAWCHHAK LEH KHAWTHLANG INREMNA SA-UI AN TAN DAN LEH AN INREMNA THUTHLUNG :

Ui an talh a, a thin leh a lung an la a, an zu khawn turah khan an chiah a; lalho zu khawn turah khan an chiah a. Lalho zu khawn tur apiangten hetiang hian chhia an chham phawt a, zu an khawn chauh ṭhin: “Khawthlang lalte ka kah leh tak a le leh ka zu khawn hian ka thin ka lung deng thla rawh se,” tiin Khawchhak lalten an chham a, zu an khawn a. Chutiang bawkin “Khawchhak lalte ka kah leh tak a le leh ka zu khawn hian ka thin leh ka lung deng thla rawh se,” tiin khawthlang lalten an chham a, zu an khawn ve bawk a. A in chhawkin he thutiam hi khawchhak lalte leh khawthlang lalte chuan an chham vek hnuah inremna thu an puang ta a ni. Hemi hmaa chhak leh thlang inep hi mita hmu pha chin ten an sawi dan chuan ‘a rapthlak hle mai,’ an ti hial a ni. Inremna nei lo se chuan helai hmunah ngei pawh hian mi tam tak an thi dawn a ni.

Leave a Reply

Your email address will not be published. Required fields are marked *

error: Content is protected !!