Chawlhna Isua Krista – Lal Ramhluna Ralte

Matthaia 11:28 “Nangni thawk rim leh phurrit phur zawng zawngte u, ka hnenah lo kal ula, keima’n ka chawlhtir ang che u.”

Kan naupan lai chuan kan Sikulah Minister emaw Sikul hotute’n min rawn tlawh anih chuan chawlh kan lo dil thin a, chawhhnu hun emaw a tuk nileng chawlh min phalsak te hian kan lawm thin hle a nih kha.

Sikul kal chu a hahthlak viau pawh a ni si lo va, chawlh han dil kher a tul em ni tiin a ngaihtuah theih awm e.

He hringnun hian chawlhna a zawng a, chawlhna hmu turin a thawkrim tlat thung si! Lehkha kan zir chhan pawh chawlhna kan mamawh vang a ni a. Hnathawktu pawhin chawlhna a hmuh theih nan a thawkrim thin.
Zu leh ruihhlo dang ti thinte pawh hian chawlhna an duh vanga ruihhlo ti an ni a, nulat tlangvalna kawnga tlan thinte pawh chawlhna mamawh vanga chutianga tlan ve bawk chu an ni.

Chawlhna zawngin kan hmanhlel a, kan thawkrim a, kan hah em em fo mai! Chhūnin a daih loh khawp hiala thawkrim te, zanin a daih loh khawpa thawkrimte kan ni hlawm awm e.

A nih leh kan thawhrimnaah chuan chawlhna kan hmu em le.?
Hmu lo, chawl tur chuan thawh zel a ngai si thin a ni.

Kan damchhung hi thawhrimna leh hrehawmnain a khat a,dam rei pawh lungngaihna mai a ni. ( Sam 90:10) chutiang ngawt chuan kan khawvel nun chu kan hmang zo dawn a nih hmel e.

Bibleah mi pakhat thawkrim em em, hausa bawk si, a thawh chhuah tam avanga hah chawl tura inngai kan hmu a, chumi chuan, “Thlarau, kum tam tak chhung atan sum tam tak i khawl hi; chawl la, eiin bar la, hlim takin awm rawh ka ti ang,’ a ti a. Nimahsela Pathianin a hnenah, ‘Mi a, zaninah hian i thlarau an laksak dawn che a ni; i thil dehchhuahte kha tu ta nge ni ta ang le?’ a ti a. Mahni tana sum khawla Pathian lama ngah si lo chu, chuti chu a ni thin,” tiin Pathian aw a hre mauh mai! ( Luka 12:19-21 )
Sum leh pai ngah ringawt pawh hahchawlhna a la tling lo fo a nih chu!

Mihring tan hian khawvel hi chawlhna kan hmuhna tur a ni lo réng a ni. Bible chuan “Buai turin mihring a lo piang, ” a tih hi a dik reng dawn a ni.* (Joba 5:7)

Anih leh chawlhna zawnga thawkrimte tan chawlhna a awm si loh chuan ava thinrimthlak ve, khawiah nge chawlhna chu kan hmuh tak ang le?

“Nangni thawk rim leh phurrit phur zawng zawngte u, ka hnenah lo kal ula, keima’n ka chawlhtir ang che u.” min titu Isua Krista a awm e.

Isua Krista neitute chauh hi chawl chunga thawkrim thei, tawrhna karah pawha lawmna thurûk neitu, lungngaihna karah pawh thlamuanna thurûk neitu, hlauhna karah pawh huaisenna neitute chu an ni. Isua nen chuan he hringnun hahthlak tak hi zangkhai takin an pal chhuak thei thin!

“Khawvelah hlimna a awm lo,
Thlamuanga awmna nen;
He lei hi ka in a ni lo,
Thlaler hrehawm a ni.”

Lal Isuan i phurrit a chhawk chungin i nun i hmang ve tawh em le? Nge i nun hahchawlhna chu khawvel thil niin i la hre tlat zawk le?
Pathianin malsawm rawh se.
Tuk chhuah nuam u le.

Leave a Reply

Your email address will not be published. Required fields are marked *

error: Content is protected !!