Chanchintha tihmelhemtu i ni ve em – Mizo Sermon

Ṭpa Ngente.

“An ziak ang ngei khan, Pathian hming chu nangmahni avangin Jentailte zingah tihchhiatin a awm ta a nih hi.” (Rom 2:24)

Thlarau Thianghlim sawichhiatna kha enge a ni kan tih kha? ‘Pathian hnathawh dodal hi Thlarau Thianghlim sawichhiatna chu a ni e’ tiin kan sawi a ni lawm ni kha.

‘Abrahama thlah’ an nihna chapopuia, ‘Dan’ ṭha tak an neih chhuangtu Judate chuan Pathian âw an ngaithlak duh loh avangin Abrahama thlah an nihna leh an chhuan em em Dan hmang ngei chuan Pathian hming an tichhe ta hlauh zawk a, Pathian pawi sawitu an ni.

Khai le, keini pawh inbih chiang ang u.

Rawngbawltu ni chung si a i kâ aṭanga Pathian thu a chhuak ngai lo a nih chuan, ‘Pathian kohna zawn a ni lo a ni ang’ a la tih hram hram theih a. Mahse, ṭhahnemngaite tha tichaktu ni lo va ti ṭhuanawptu leh ṭhahnemngaite tithangtlawmtu i nih fo chuan Chanchin Ṭha tihmelhemtu i ni lo vang tih i sawi thei em le?

Rawngbawltu ni chung si a ṭawngkam mawi lo leh mei nei chhâk chhuak fo ṭhin i niha, i nihna chelh leh i nun a inmawi loh viau chuan, mite zingah nangmah avangin Chanchin Ṭha tihmelhemin a awm thei a, Pathian pawi sawitu i ni thei tih i ngaihtuah ngai em le?

Rawngbawltu ni chung si a, rawngbawlna chanvoin a ken tel mawhphurhna thawk ṭha peih si lo i nih chuan, nangmah avangin mite zingah Chanchin Ṭha tihhmelhemin a awm mek tih i ngaihtuah ngai em?

Rawngbawltu ni chung siin social media-ah ṭawngkam mawilo leh dengkhawng i chhak chhuak fo ṭhin a nih chuan, nangmah avangin mite zingah Chanchin Ṭha tihhmelhemin a awm mek tih i ngaihtuah ngai em?

Social media lam sawi kai tâkah chuan, ringtute hi chu kan DP, pro-pic leh status te thleng hian Chanchin Ṭha nena inmawi ngaihtuah hi ‘Krista Isuaa nunna thlarau dan’ hian min beiseiin min phût tlat a, heng thil tê tham tê avang hian Chanchin Ṭha hi keimahni avangin tihhmelhemin a awm thei tih pawh hi kan ngaihtuahna hian a thlen phak a ngaiin a pawimawh em em a ni.

Pathian thu hi lei leh vana thu ropui ber, thu hlu ber, thu zahawm ber a ni a. A rawngbawl hna pawh hi lei leh vana hna pawimawh ber, hna ṭha ber, hna hlu ber leh hna zahawm ber a ni bawk a. A neitu Pathian pawh hi lei leh vana ropui ber leh zahawm ber a ni.

Chuvangin, khawi hmunah pawh, eng hunah pawh Pathian thu leh a rawngbawl hna hi fimkhur tak leh zahawm takin kan thawkin kan enkawl tur a ni a. Kohhran rawngbawltu kan ni emaw, hmun danga rawngbawltu kan ni emaw, keimahni avanga Chanchin Ṭha tihhmelhema a awm loh nan, min tithianghlim thei awm chhun ‘Thu nung’ hi belbul tamin Pathian duh zawng enge tih hi i zir fo ṭhin ang u. Chu chu ringtu mimal tin mawhphurhnaah Pathianin a dah a ni.

Lalpan kan zaa tan mal sawm rawh se, Amen.

Leave a Reply

Your email address will not be published. Required fields are marked *

error: Content is protected !!