Chanchinbuin Mizo thu leh hla a tihhausak dan

CHANCHINBU-IN MIZO THU LEH HLA A TIH HAUSAK DAN

Mizo thu leh hla hmasawn dan thlir hian kan hmasawn chak zia kan hmu tel thin, he kan hmasawn chak em em chhan hi chanchinbu thawh rah kan ti lo thei lovang. Kum 1894-ah thuziakna A AW B kan nei chauh a, hemi kum hian mi pathum chauhin ziak leh chhiar an zir a, lehkhathiam kan pung chak lo hle a, Mahse ziakna kan neih atanga kum 4-na lekah chuan chanchinbu hmel kan hmu nghal ta der mai a, chu kan chanchinbu neih hmasak ber chu “Mizo chanchin Laisuih” tih a ni a, kum 1898 khan Tarmita kaihhruaina hnuaiah Mizo lehkhathiam hmasa te kutchhuakin kan hmu ta a ni. He chanchinbu hi kutziaka chhuak thin a ni a, a chhuah vawi 4-na chu kum 1899 July thla khan a chhuak ngei a, eng chen nge a chhuah hriat a har hle a ni. He chanchinbu hi a tangkai hle a, vantlang mipui khaw hawi ti zautu, changkanna leh hmasawnna lama ke min pen tir tantu pawimawh tak a ni. A pawimawh zia chiang taka hriat dawn chuan a hunlai khawvel chiang taka kan hriat a pawimawh a, hetih hunlai hian Mizo kan la changkang lo hle a, lehkhaziak chhiar thei kan la awm meuh lova, Mahse a chhiar thiamte sawi atangin chanchinbu thuchhuahte chu a lar em em thova ram pum ti ti a tling phak tho a ni.

Hetih hunlai hian thu leh hla lamah kan la pachhe hle a, Pu Buanga leh Sap upate khan hla 7 vel min lehlin sak tawh a, zirlaibu atan “Zirtanbu” an chhuah tawh bawk a, Bible kan la nei hman lova, an lehlin lai vel chauh a la ni, Mizo lehkhathiam pawh kutzungtang chhiar tham lek kan la awm a, kan la pachhe hle a ni, mahse  mi thahnem ngaite zarah chanchinbu kan nei ta a, thuziak kan uar chho ta deuh deuh a, kan thuziak kalhmang leh tawngkam ziah chhuah dan pawh a changkan phah chho em em a ni. Laisuih chanchinbu chhuak hmasa ber hi hmuhchhuah a ni tawh lova, mahse vawi hnih chhuahna erawh chu hmuh theih a ni a, hetah hian thu hrang hrang a chuang a, Sakei leh Savawm kah lawmmana awm thu te, Bawrhsap nupuiin nau nuchham a enkawl theih thu leh a enkawl dan te a lang a, hei hian a hunlai khawvel a tarlang tha hle a a ni. Thuziak lam hmasawnna hnar pawimawh tak a ni a, thutluang ziak bul tanna leh ziak zel tura fuih phurtu tangkai tak a ni.

“Mizo leh Vai Chanchin Lehkhabu” tih chanchinbu chu kum 1902 atang chuan thlakipin a rawn chhuak chho ta a, he chanchinbu chhuak hmasa ber erawh chu kum 1898 May emaw june thla emaw vel daih a chhuak tan tawh a ni, mahse kum 1902 November thla atang chuan khawpui chhut ngatin a rawn chhuak chho tan ta a, a enkawltu ber chu Tarmita bawk a ni, kum 1911-1936 thleng khan Makthanga’n a enkawl a, Makthanga hi Mizo chanchinbu Editor hmasa ber a ni, Lalkailuia leh Sainghinga ten kum 1937 atanga a tawp kum 1941 kum 1941 thleng khan an enkawl ve leh a ni. Thu leh hla lam a tihhmasawn dan thlir nan kum 1902 November thla chhuak chu han tarlang ila,

  1. Sappui thu — Tarmita ziak.
  2. Vuta leh Lalpuithanga indo tirna thu — Suakhnuna Phulpui lal.
  3. Sa ka’ thu — Suaka
  4. Aizawl chanchin — Suaka.
  5. Chatuan Vok-sa thu — Zosaphluia.
  6. Nghaisakna — Zosapthara.
  7. Ram leh hnam dang thu — Zosapthara te (Hma thu)
  8. Hmashang Chanchin.— Lalhrima Sesawng lal.

Heta thuchhuah pariat zinga pali lai khi Mizopa ziah a ni a, Mizo ten hma kan sawn tawh hle tih a hriat a, lehkha thiam thutluang la ziak ngai lo ni a kan hriat mi pahnih lai ziak a rawn lang a, ziak leh chhiar lamah leh thutluang ziak lama hma kan sawnna a lang thei a ni.

Mizoram Presbyterian Kohhran Synod chanchinbu tun thleng pawha la chhuak “Kristian Tlangau” hi kum 1911 daih tawh khan “Krista Tlangau” tia chhuah tan a lo ni tawh a, he chanchinbu hi sap ho uapna hnuaia chhuah a ni lova, a hunlai parawn mi11 ten an chhuah a ni. An chhuah chhan deuh ber chu kristiante tana chhiar tur thlakip chhuak chanchinbu an duh vang a ni ber a, Kohhran pawl bik chanchinbu a ni lo, he chanchinbu chhuah theih nana hmalatu mi 11 te chu,

  1. Mizo Missionary hmasa ber, Manipura kal.
  2. Suaka Dahrawk Babu.
  3. Zakunga Sikul hotu hmasa, a hnua dawrkai.
  4. Daia, C I (Rahsi)
  5. Dohnuna H K Bawihchhuaka pa mi hausa hmasa.
  6. Thangruaia C I a hnua Lunglei Lushai Clerk.
  7. Bawrhsap pisa Babu.
  8. Lianhmingthanga Pastor ni ta.
  9. Thanga Mizo matric Pass
  10. Chawnga Mizo sikul Headmaster hmasa ber.
  11. Kawlkhuma, Salvation Army dintu.

Heng zinga Suaka, Dohnuna, Daia leh Thangruaia te hian chanchinbu bul tan nan cheng 100 theuh an hman hawh tir nghe nghe a ni.(Hetih lai hian Patling nileng hlawh hi Siki a ni). Tichuan kum 1911 October thla atang chuan a chuak tan ta a, October thla hian copy 350 a chhuak a, bu  khat hi Hna 1 man a ni, an chhutna khawl chu Dr. Frasera Hand Press pek a ni a, “Lushai Christian Press’ an vuah a, editor hmasa ber chu R Dala a ni a, Saptlangvala’n a pui thin a ni, R Dala hian kum 1912 tawp dawn thlengin a enkawl a, kum 1912 September thla atang chuan Chawnga’n a enkawl chhunzawm ve ta a ni. Kristian tlangau hi a pawimawh hle a, Mizote chanchinbu neih that hmasa pawl a ni, a hmaa chhuak chanchinbute kha chu sap ho kutchhuak leh sap ho enkawlna hnuaia chhuak a ni a, thuziakna kan neih tan atanga kum 17-na vel chauh a liam tihin Mizopa kutchhuak ngei chanchinbu kan hmu thei ta a, thu leh hla lama kan hmasawn chak zia a tarlang a ni. Kristian tlangau-ah hi a hunlai thuziaktu lark an neih te khan thuchhuah nan an hmang tangkai hle a, Laingkhaia pawhin a thuziakte tarlan nan a hmang tangkai hle a, kum 1911 atanga kum 1983 thleng khan a thuziak 121 lai chhuah a ni. He chanchinbu atang hian Article leh Essay lam pawh tha tak tak a chhuah phah a, thu leh hla lama hma kan sawn theih nan a thawh hlawk hle a, Mizo thu leh hla than chhoh dan chhuinaah hian he chanchinbu hi hmaih theih a ni bik lo a ni.

Chanchinbu lamah hian hma kan sawn hle a, kum 1920-ah “Thahdo-Kuki Kristian chanchinbu’ a chhuak a, rei vak lovah ‘Kristian’ tiin a hming an thlak ta a ni. Kum 1931-ah ‘Sipai Tlangau’ Salvation Army chhuah a rawn chhuak leh a, ‘Tlawmngaihna’ tih chanchinbu pawh kum 1934 khan a lo chhuak bawk, he chanchinbu hi Baptist Mission Serkawn Lunglei enkawl a ni, a hnuah ‘Robawm’ tiin an thlak a ni. Kum 1939-ah ‘Tun hapta kar chanchin’ tih chu kartin chhuak chanchinbu hmasa ber a ni. Chanchinbu a piang chho chak hle a, heng chanchinbu hrang hrangah te hian thu leh hla ti hmasawn thei leh tichangtlungtu alo piang chho ve zel a, kum 1970 tlenga chanchinbu chhuak lar deuhte chu,

  1. Nitin Chanchin. (1939)
  2. Mizo Zirlai Pawl chanchinbu. (1938)
  3. Scout Thlirna. (1946)
  4. Mizo (1946)
  5. Kohhran Beng (1947) (Baptist kohhran)
  6. Zoram Thupuan (1947)
  7. Mizo Arsi (1948)
  8. Upa Lengkhawm (1949)
  9. Thudik Tlangau (1951)
  10. Thlirvelna (1951)
  11. Sikul thlirna (1952)
  12. Hun Thar (1954)
  13. Krista Thuchah Puangtu (1956)
  14. (1957)
  15. Cathalic Kantu (1960)
  16. Ramthar (1961)
  17. Zalen Chanchinbu (1969)

Heng zinga thu leh hla lam hmasawn nana thawh hlawk ber pawl MZP chanchinbu hi i thlir zui teh ang. Kum 1938 khan MZP chanchinbu hi a lo pianga tluang taka kal zelin kum 1973 a lo thlen chuan Siamkima’n a enkawl ta a, Mizo thu leh hlaa theihnghilh tawh miah loh tur chu he chanchinbuah hian a rawn lang ta a ni. He chanchinbu hian thuziak thlitfim lama hma kan sawn nan boruak a rawn chhem alh tan ta a ni. Kum 1973 January thla chhuakah chuan lehkhabu thlirna (Book Review) hmasa ber chu a rawn chhuak ta a, “Ka ram leh kei” tih lehkhabu R Vanlawma ziak chu a rawn bihchiang a, heta tang hian thuziak thlitfim lama lehkhabu thlirna chin chhunzawm a ni ta, thuziak thlitfim lama bul tantu leh theh lar chho zeltu chanchinbu pawimawh tak a ni.

Kum 1980 hnu lamah chuan khawvel changkannain Mizoram a chim thui ve hle tawh a, chanchinbu pawh a changkang chho ta hle hlawm a, chhuak thar tha tak tak a awm chho ta zel a, thu leh hla tlafir lam bik ngawr ngawr thlirna chinchinbu pawh a chhuak chho vet a zel a ni. A bik takin “Thu leh hla” chanchinbu MAL chhuah hian thu leh hla hmasawn nan a thawh hlawk hle a, MZP chanchinbu rawn thehlar thuziak thlitfim lam pawh chak tak a rawn chhunzawm zelin a chhem nung zeltu pawimawh tak a ni a, thlakip chhuak chanchinbu a ni a, tun thlengin tawp lovin a la chhuak ta zel a, thu leh hla hmasawn zel nana ziakmite kutthlakna ber a ni chho ta hial a ni.

Mizo thu leh hla hmasawn nana chanchinbu hnathawh hi a ropui hle a, kan chanchinbu hmasa ho te phei kha chu thu leh hla chhuahna awm chhun hlu tak an ni hlawm a, thu leh hla lama tui deuh chuan an hmang tangkai thin hle a, an buaipui em em thin a ni. Kum 1937 chho vel khan Biakliana leh Kaphleia te pawn kutziak ngatin chanchinbu an lo chhuah ngat ngat tawh a, thu leh hla lama an tui chilh em avangin an thu leh hla puan chhuah nan chanchinbu hi an lo hmang thin a ni. Kum 2000 hnu lamah pawh chanchinbu a pung chak em em a, kan thu leh hla chhuahna ber a ni a, lehkhabu a puitlin tham em ni si lo thu leh hla tha tak tak chhuahna ber a la ni chho reng a ni.

 

Leave a Reply

Your email address will not be published. Required fields are marked *

error: Content is protected !!