CHAKMA LEH BRU TE VANG HIAN ZIRNAAH I HARH ANG U
(Sawrkar leh kan mi hausaten ram leh hnam tan mei kawha ṭan in lak a hun e.)

Lalṭanpuia Ngente

Eng vangin nge heti taka Chakma leh Bru ho vanga kan buai.? A chhan chu, tun hma aia an fin tawh vang leh lehkhathiam an tam tawh vang a ni.

Kum tlemtê liamtaah khan, ‘Nakin lawkah chuan Chakma minister te kan la nei ang a, kan nulate hian parṭhi an la awrh tir ang’ kan ti ṭhin a. Kum tam a la liam lo, tunah chuan a takin a thleng daih tawh.

Tunah hian Mizote hi central service, IAS ect. a tling kan awm hleithei tawh lo hle a, harh a hun tak zet mai. Hranghluite an ṭil mêk a, a thlaktu tur an awm hleithei tawh si lo va, chutih laiin Chakma leh Bru te chuan he lamah hian harhtharna an chang nasa hle a, nakin lawkah chuan department head ah te, secretary post pawimawh zawng zawng leh DC ah te, Chief Secretary thlengin Chakma leh Bru ten an luah vek lovang tih a sawi theih ta lo.

A bikin Chakma te chuan ADC an neih avangin sum an ngah a, phai lam zirna ṭha ṭhaah an ṭhalaite an dah nasa a. Central service-a tling turin institution ṭha leh man to tak tak, kum 1 course fee pawh nuai 4/5 laiah te coaching an inkaltir nasa a. A rethei deuh pawh zir thei deuh chu an mi hausa ten sumin an pui nasa hle bawk.

Chuvangin Mizote hian nasa taka ṭan kan lak loh chuan thiamna hmangin min la chaldelh thuai dawn a, kan ṭhalaite hi an thawh theih tawk thawkin inti officer takin mahni veng aṭangin an inkhalh chhuak ang a, office lamah chuan Chakma leh Bru nula tlangval te kha ‘Sir’ ‘Madam’ an la ti dût dût dawn tih a chiang hle. An aia lal zawk Chakma leh Bru officer te hnuaiah zum dûkin an la ṭhu ngei dawn a ni.

Tunah hian Mizo ṭhalai, nu leh pa suma zir theite hian central service a tling tura beih hi an tum peih lo zo a ni ber a, mahni ram chhunga thawh theih chin MCS leh thil dangah hian an lungawi tawk hle niin a lang a. Hei hi a tawk mai lo tih a lo lang chho ta mêk a nih hi. A nei zo leh zir thei chuan ram leh hnam tan a ni tih hriain ṭan han la sauh sauh teh u khai.

Tin, kan ṭhalaite zingah hian mi rethei leh rualawt, lekha zir peih leh thiam thei, puih tlak tak tak, mahni suma zir thei si lo tam tak an awm. Heng ho hian financial support an mamawh em em a, anmahni pui tur hian, ram leh hnam tan a ni tih hriain kan mi hausate kha han pên chhuak teh u khai.

Tin, Sawrkar pawh hian kum tin 5 crores vel tal chu hemi atan hian sum ruahman thei sela, kum tinin naupang thiam thei puih tlak mi 100 vel India rama coaching ṭha ber berah zir tir se la, kum 5 chhung chuan IAS leh central service chi dangah mi 20/30 chu kan inhlangkai thei ang. Sawrkar apiangin ngun taka ngaihtuahin hetiang zawng hian ruahmanna siam nachang hriat a hun hle mai. Hei hi Mizoten central service a tling kan neih tam leh theih dan tur kawng awm chhun niin a lang.

Leave a Reply

Your email address will not be published. Required fields are marked *

error: Content is protected !!