KUM 2019 FFEBRUARY THLA AṬANGIN CABLE TV MONTLY FEE LAK DAN THAR HMANG DAWN

28th Dec 2018: Central sorkar Cable Television kaihhnawiha thuneitu sang, Telecom Regulatory Authority of India thupek angin kum thar 2019 February thla fee khawn atangin Cable TV Monthly fee lak dan kalphung tih danglam a ni dawn.

Sorkar laipui, Ministry of Information and Broadcasting hnuaia Cable TV chungchanga thuneitu sang, TRAI hian Cable TV subscriber ten langtlang taka an duh ang channel an thlan theihna turin Cable TV Monthly Fee lak dan thar, New Regulatory Framework for Broadcasting and Cable Services, New Tariff Order (NTO) tia sawi bawk hi a duang chhuak a, he dan thar hi kumin December ni 29 atanga hman tan tura tih nimahse, India ram pumah mipuiten a kalphung an la hriat mumal loh avangin a hman tan hun tur hi a sawn hla a, kum thar 2019 February thla fee khawn atanga hman tan turin a ti a ni.

Sorkar laipui thupek anga Cable TV Monthly Fee lak dan thar, NTO hnuaiah hian pay channel zawng zawngah MRP tarlan vek tawh tur a ni a, Cable TV Operator ten an duh ang channel a hlawma subscriber te hnena pe chhuak tawh lovin, subscriber tinin an channel duh zawng awmna Package engemawber an thlang ang a, chumi bak channel mal tin chu subscriber ten a mala an thlan theih tura chhawp chhuah vek tur a ni bawk a. Subscriber tinin an en duh zawng channel leiin, monthly fee an chawi pawh a inang lo zung tawh dawn a ni.

India ram hmun dang ang bawkin Mizorama Cable TV Operator te chuan kum thar January thla chhungin subscriber tinte chu an channel duh zawng an thlan fel tir vek ang a, Monthly fee lak dan kalphung thar hi February, 2019 fee khawn atanga hman tan a ni ang.

—–Issued LPS & ZONET———-

Leave a Reply

Your email address will not be published. Required fields are marked *

error: Content is protected !!