Buh seng tur a tam, thawktu an tlem – II

BUHSENG TUR A TAM, THAWKTU AN TLEM II-NA
K. Zalawma.

“Tin, chumi zawhah chuan Lalpan mi dang sawmsarih a ruat a, a kalna tur khaw tinah leh hmun tinah, a hmaah pahnih zelin a tir a. Tin, an hnenah, “Buh seng tur a tam hle a; nimahsela, a thawktute an tlem; chutichuan, a buh seng tura thawktu turte tir turin buh Neitupa hnenah chuan ngen rawh u…” a ti a(Luka 10:1,2).

Isua leh a zirtirte hmêl danglamna tlâng aṭanga an lo chhuk hnu khân rawngbawlin hun an hmang leh nghal char char a. Jerusalema kal a tumna kawngah Samari mite khaw pakhatah a lut a, Jerusalem lam pan tum nia an hriat avangin an lo lawm lo. Jakoba leh Johana te unau phei chuan an khaw kan vekna tur van ata mei koh thlak an rawt hial a, Isua erawh chuan an ni chu a kamkhat a, khaw dangah an kal ta a.

Kalkawnga an kal lai chuan Isua zui duh mi pahnih an hmu a, mi pkhat hnenah “Mi zui rawh,” tiin a sâwm thung a; mahse, engkim kalsana zui nghal tur a nih avangin tuman an zui ta lo. Zirtir sawm leh pahnihte chauh kha a zuitu an la ni.

Chumi zawha thil thleng chu kan changthlan hi a ni. Zirtir sawm pahnihte bakah mi dang 70 Isuana ruat a, a kalna tur khaw tin leh hmun tinah pahnih zela inkawpin a lo tir hmasa a ni. Kawp 35 laia kalin Isua rawngbawlna tur hmun leh khuaah Pre-Crusade an lo nei hmasa ni ngei tur a ni. Lal Isua chuan a hun tawp a hnai tawh tih a hria a, rawngbawlna tur a la tam si tih a hriatin, “Buhseng tur a tam hle a; nimahsela, a thawktute an tlem..,” a ti thlâwt mai a ni.

Khawvel zawng zawng Lalpa rama siam tur chuan mi 70 lek chu beitham tak an ni reng a ni.

[adToAppearHere]

Buh lu chuh a nâ:
Mizo thlawhhma neih dan aṭangin han thlir ta ila:
Kum bulah lo kan vat a, kan hal a, buh kan tuh a, kan thlo leh a, kum tâwpah buh seng a lo hun ta a, rilṭam lova ei tur kan neih theih nân kum tluana rim taka thawh hnuah kum tawpa buh ei tur a lo hmin ta chu Upain, “Buh lu chuh lai” an ti. Zan khat thil thûah sarualin an ei zo vek thei, ruah lo surin thlî rialin a dêng ṭil vek thei, sava leh sazu rualin an tlan zo mai thei bawk; duh ve apui an tam si. Rei lo têa nguia, leia buhvui far thla leh mai tur a ni bawk.

Chuvangin a riral loh nân a rang thei ang bera buh seng char char a ngai. Buh seng a lo hun tawh chuan naupangte nen chhungkaw bawngbawrin loah riah chilin buh kan seng thin. Buhseng lai chuan khawvar hmain chaw kan chhum hmin vek a, kâwl a lo en ve leha chaw ei a, buh vui a lan theih veleh buh la tura bun chhuah gnhal a ngai, tlaiah buhvui a lan theih thlengin, nitla vanvuaiin kan thawk leh a, zanriah eikhamah buh kan laksa kha kan chil leh a, men chhûng zawng buh kan chil leh a, zan dar 10:00 atanga zing dar 3:00 inkar hi kan mu hman chauh a ni ber mai. Buh hminsa kha a riralang tih hi kan hlauh ber a ni. Buh lu chuh chu muangchàn hman a ni lo.

Pathian buh lu chuh a hun :
Thuthlung Hlui hun chhûng zawnga Pa remruat anga chhandamna kawng buatsaiha Israel faten sakhaw rawng an lo bàwl chu, a hun takah Lal Isua lo kalin, lei mihring Pathian buhte cu seng a hun tawh tih hriain ṭhahnem ngai em emin buh lu chuh turin a zirtirte a rawn tir ta a ni. Buh seng tur chu mi zawng zawng an nih laiin a thawktutur mi 70 leh zirtir 12 lek chu an beitham em a ni.

Chuvangin buh neitupa Pathian hnenah buhseng tura thawktur ngên turin Lal Isua hian thu a pe tawp mai a ni. Pathian hnenah a buh sengbtura thawk tur i dil zel ang u.

[adToAppearHere]

Buh seng tur a la tam reng:
Lal Isua rawngbawl laia Palestina ramah mah khan buhseng tur a tam a ni a, “Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u,” (16:15) tiin vana a lawm dawn khân a chah lawm lawm a, vawiin thleng hian chu thuchah chu tihlawhtling turin Kohhranten thapui kan chhuah reng a ngai a ni.

Mi zawng zawng hi Lalpa buh, seng tura hmin tawh chu an ni a, sual ral chi hrang hrangin an eia an tih riral zawh hma hian, Lalpa buh lu chuh turin tan i la thar leh ang u le. Kan ram ṭhalaite pawh ruihhlo ralin a eiral mek a, khawvel changkanna leh sum îtnain chhûngtin min rûn lai hian, Lalpa tân sengkhawm turin thawh harh a hun e. Kan ram nun sual siam ṭha tur hian NGO mahin hma an lak chuan, Kohhran Pawl hrang hrangte hian ṭan lak ve a va hun em!

In lungrual a pawimawh: Hnathawktute hi ṭan rual loh chuan hna a sawt thei ngai lo ang hian, Lalpa buhseng tur hian Kohhran pawl hrang hrangte hi thawhho a va ṭul em! Pawl ram lak tuma mi beram lak sak hman kan ni lo; innghen luma in hawkbuk emaw, innghirngho a in tamsiak hman a ni lo ve, mahni hma zâwn ṭheuhah, mahni theih dan ang angin Lalpa buh seng turin i thawk chhuak zawk ang u.

Zing ata ni tlak thlengin kan Lalpa tan i thawk ang u,
A hmangaihna mak zawng zawng i hril ang u;
Tin, kan ni kan tum tawi zawh hunin, kan thawhrim zawh hunin,
Khita hming an lam hunin ka awm phawt ang.

‘Lalpa tana thawk lo hian khita hming an lam hunah ‘awm’ ti tur i awm dâwn em ni?’

[adToAppearHere]

Leave a Reply

Your email address will not be published. Required fields are marked *

error: Content is protected !!