Brig. Thenphunga tupa Zodinliana Sailo leh a thiante chu Zothansanga rapthlak taka sawisaah puh an ni

Brig. Ṭhenphunga tupa Zodinliana Sailo leh a ṭhiante chu Zothansanga rapthlak taka sawisaah puh an ni
(mipa leh mipa intihbuainaah hursualna rawngkaiin innghaisa zui)

Dt. 19th November 2018

Thil thlen ṭan dan: Ni 7.9.2018 zan a Zarkawt veng (Lalbuaia Shopping Complex opposite) kawngpuiah chuan tlangval rual intihbuaina a thleng a. Lyrics Karoke Zarkawt-a ṭhianho intihlim Zothangsanga leh a ṭhiante an intihlim a. Tin an bul maiah chuan Zodinliana Sailo leh a ṭhian te, lainate chuan nupui nei mai tur Zodinliana Sailo chu a tlangval thlahna intihhlimna neiin hun an hmang ve bawk a. Hetia lehlam lehlama hun an hman tawn lai hian an zinga ṭhenkhat chu an lo intibuai ta a. Tichuan he thil thleng hi a thlen aṭanga zan sawm leh pahnihah chiah ‘Zothangsanga’ chhungten Press Statement siama thu an vawrh darh tak avangin Zoram khawvelah mite beng hriatah vawrh darhin a awm ta a ni. An thu vawrh darhah chuan :

PRESS STATEMENT

‘World Bank Road-a thil thleng rapthlak kha….’

Ni 7.9.2018 zan a Zarkawt veng (Lalbuaia Shopping Complex opposite) kawngpui a tlangval rual intihbuaina thleng kha thil thleng palha ngaih theih a ni a. A hnu lama thil thleng erawh chu Zoramin kan la hriat ngai loh, TV leh Film-ah te ‘Savdhaan India’ a kan hmuh ṭhin ang mai kha a ni!

Ka fapa, Zothansanga (24) chunga pawi khawihna rapthlak tak thleng hi a tuartu chhungkaw tan chuan a nain a run thlak hle a, a tuartu rilru leh thinlungah nghawng thalo tak a neih avang leh hetiang hi midang chungah pawh thleng tawhlo tura kan duh avangin kan rawn auchhuahpui ta a ni.

Hemi zanah hian kan faten birthday lawmin an thiante nen Lyics Karaoke, Zarkawt-ah hun an hmang a, room lehlamah hian Zodinliana Sailo Bachelor’s night (party) hmang an awm ve bawk a. Hemi zawha an ṭhianho inthlah lai hian Zodinliana Sailo ṭhian thenkhatte nen inhnialin intihbuaina rei vaklo a awm a. Chumi hnuah chuan kan nauten “Intihbuai kan duh tawh lo, kan tlawm” an ti chungin Zodinliana Sailo hian bul rawn ṭan ṭha lehin intihbuaina a thleng nawn leh a, Police te pawh lokalin F.I.R. thehluh kan duh leh duhloh min zawt a, a ṭul kan tih loh thu kan lo hrilh a ni.

Intihbuaina zawh hnu, Police pawh an haw tawh hnuah ka fapa upa zawk leh a ṭhiante inhliam, Civil Hospital Casualty-a First aid la a an kal avangin ka fapa naupang zawk Zothansanga leh a thiante – Stephen Lalhmingthanga leh Vanlalnghaka ten an lo nghak a. Chutih lai chuan Brig. Ṭhenphunga Sailo (L) tupa, Zodinliana Sailo (28) S/o Lalsangliana Sailo, Kanan Veng, Aizawl leh a thianpa R. Lalhruaitluanga s/o R. Zakapa, Ramhlun North (Pema Colony) te chu car (Hyundai Verna MZ-01 – J 3333) a lo kal lehin hmanrua nen a vauin Stephen Lalhmingthanga chu Car-ah nawr lutin an phur chhuak a.

A hnu rei vak lovah Zodinliana Sailo leh R. Lalhruaitluanga te chu rawn let lehin, ka fapa Zothansanga chu a thianpa Stephen Lalhmingthanga’n a nghak tia bumin an phur chhuak leh ta a. Thakthing veng thla an tlan lai sawn Car kawngkhar lock-in “I thianpa kha chu a dawihzep khawp a, Car atangin a zuang chhuak a, nang chu i huai khawp mai kan Car-ah te ila chuang ngam a” an ti a, hetah hian a thianpa Stephen-a chanchin a hre ve ta chauh a ni. Tichuan, Zampuimanga lungphun piah Salem Veng panna kawng kual reh lai, Zodinliana Sailo in “SPOT NGAI” tia a sawiah chuan an hruai ta a ni.

Hetah hian ka fapa hi Pistol, Police Security Stick, Taser, Body Bag leh Bottle keh hriamte hmangin thahah an vau a, a T-shirt te pawh an pawhthler sak a, a thawhnaw phelh vek turin an vau bawk a, an that duh mai dawna a hriat avangin ti tura an tih apiang a ti ta ringawt a, mipat-mipatna lam hawi thlengin an nghaisa a ni. A taksa a hliam hnuhma hmuh theih tur hnutchhiah miah si lovin an nghaisa lai leh a saruak thlate mobilephone in an laksak a, ‘I hmel hi kan thaichhe vek ang a, I ruang hi body bag-ah kan khung anga, kan dah \ha ang che, tuman an hre chhuak theilo ang che. Ruang hi kan dah bo hnem tawh,’ tiin an vau a ni.

Zodinliana Sailo leh R. Lalhruaitluanga ten duhtawka an nghaisak hnu chuan ka fapa chu a thawmhnaw te pe letin “Kan Car-ah rawn chuang ve tawh suh” tiin an kalsan a, hetihlai hian khua a var tawh a, darkar khat vel zet chu an sawisa a ni. An kalsan hnu hian ka fapa chu chau tak chunga ke a thui tak a kal hnuah, vawksa phur taxi pharin a lo haw phei ta a ni. A lo haw hnu hian thil thlen dan kimchang tak chu a sawi nghal mai lo va, an sawisak dan te chu sawi ve bawk mahse mipat-mipatna lam hawi a an khawihna hi chu a hnu deuhah a u hnen aṭangin ka hre ve chauh a. Civil Hospital Casualty-a medical examination titu Doctor pawhin, “I fapa thil tawn hi a rapthlak em mai, Psychiatrist hnenah hruai ngei ngei ang che” min ti a, a lehkhaah pawh “Sexually molested” tih a ziak nghe nghe a ni.

A tuartu hian rilru lamah harsatna nasa tak a tuar zui a, mu tha thei lo, chaw ei tha thei loin a awm a, nunphung pangngai nei thei lovin, a chhe vek a ni ber mai! Doctor, amah medical tuin min rawn angin Psychiatrist leh Psychologist ten an enkawl mek a ni.

Ka fapa chunga thil rapthlak tak thleng avang hian F.I.R. chu ni 10.9.2018 khan Aizawl Police Station-ah thehluh a ni a. A tirah Police lam hian F.I.R. hi register lovin enquiry-ah an dah a, 11.9.2018 ah Police chuan thiltisualtu leh keini lam statement an la a, an medical nghal bawk a. Police te nen 12.9.2018 ah Spot Verification neiin thiltisualtute leh ka fapa hi motor pakhatah chuangin an sawisakna hmunah an hruai a. Zodinliana Sailo hian inkiltawihna leh inthlahrunna nei miah lo leh engmah tihsual neilo ang maiin a pu, Brig. Ṭhenphunga Sailo (L) chanchin chhuang taka sawiin Police te a titipui kawng tluan zak a ni.

Police ten investigation/enquiry ti tho siin kan F.I.R.chu an register si lo va, inbiakrem a that zawk thu min hrilh reng bawk avangin kan mangang chuan ni 27.9.2018 ah Aizawl S.P., Pu Bijendra Kumar Yadav chu kan va hmu ta rawih a. Aizawl S.P. hmalaknain F.I.R. kan thehluh atanga ni 17-na, 28.9.2018 ah Case chu Register a ni ta chauh a (vide AZL-Case/No-202/2018 Dt.28.9.2018 u/s IPC Section 341/342/323/506), F.I.R. original chu “A sei lutuk” tiin min lo kaihtawi tir bawk. Mahse, Aizawl P.S. hian kan complaint lam hawi IPC Section an pek loh avangin Police hotu liante leh Aizawl S.P. chu kan hmu leh ta a ni. Case register a nih hnu pawh hian thil sualtitute hmanrua F.I.R-a kan ziahlante chu vawiin thlengin man sak an ni lo.

Hemi hnu hian Case I/O tharin Investigation ni 23.10.2018 ah kan inah ka fapa statement a rawn la tha leh a ni. MLA General Election lo awm turah an buai viauin kan ring a, amaherawhchu, han insang mar deuh se, keini case pakhat lek chu kar lovah an chin fel mai theih kan beisei tlat a ni.

Tih palh thil nilova sualna uchuak tak ti tur a lo kir leh ngatin, ka fapa chunga an thil sual tih man hi Zodinliana Sailo leh R. Lalhruaitluanga te hian, an phu tawk hremna an hmu ngei ngei tur a ni. A nihloh chuan hetiang sualna hi tu chungah pawh a la thleng leh thei a, dan pawhin a khawih phakloh anga an in hriatna thlengin tihtawpsak an ngai bawk a ni.

Dated : Aizawl (LALTHANZUALI)
The 19th November, 2018 Zarkawt, Aizawl

He thu hi nasa takin social media hrang hrangah rang takin a darh nghal a. Chung thu thehdarh zingah chuan Side B lam tia an sawi Zodinliana thlavang hauhtute aṭanga an thil hmuh dan an rawn tarlanna a awm ve bawk a. Chu chu lo tarlang leh ila:

“Hmanzan ni 7th sept 2018 zana zarkawt a buaina thleng diktak chu hetiang hi a ni e. Ka thianpa Zodinliana baclelor’s night chu lyrics lounge ah zan dar 9 atang in kan lawm a mipa 8 kan ni a kan hlim tlang hle, chutih lai chuan room lehlam ah chuan ka hriat theih chin ah mi 15 aia tlem lo chu lo awm ve in ka hriat ngai an ni lo. Tichuan a hnu rei vak lo ah chuan ka thianpa nupui tur te chuan min ron join ve nghal a an thian ho hmeichhia 5 an ni, chuan a hnuah kan room leh lama mi te ho chu kan room ah te ron lut luai2 in a then in min ron chibai kual a, a then an ron lam lut a, a then in middle finger te ron show in a then in kan thiannu te washroom lut tur te chu lo chhaih nawmnah in ‘engzat man nge’ te an lo ti a mahse thutak khuk ah kan khuk pui lemloh avang chuan ngaihtha tak chuan kan awm veleh mai a ni.

Chuan a hnu ah chuan an haw fel ta ah ka ngai a an reh duak a mahse a hnu ah chuan kan thianpa kan zinga tel ve tho chuan min rawn hrilh a zorammawia ( kan zinga tel ve) chu an khawih tih min rawn hrilh ta a, ka zuk tlan chhuk nghal a, ka zu hmuh meuh chuan kan thianpa zorammawia chu a hmai hmuh hreawm khawp in an lo khawih a, a mit ah te thisen tling in, a hnar te chu a thi nasa an a hnungzang te pawn an lo chhir rawn na ah a duk nasa khawp mai (hei hi evidence poh image leh video a awm vek ani) kan rilru na leh thinrim chuan a kawt a lo la awm thenkhat te chu kan zawt a tute nge an ni tih te, mahse han tihvak ngaihna kha a awm toh lo a, in lamah kan thianpa zorama chu hruaithlak kan tuma mahse sunflower chanmari kawt ah khan kan han ding leh rih a, kan in phone kual a, a cousin te ho poh lo chho in an thin a rim hlawm hle.

Chutih lai chuan kan thianpa Zodina chu a nupui leh a thiante a lo va thlah zo chu lyrics lounge kawt ah tho chuan a lo let leh a, an lo la awm hlawm a an mahni thian mi 5 vel chu, ani chuan a va zawt a tunge Zorama khawih tu mahse an ni chuan, nang poh hi i ron la pawr a mi tih pah in an sual rawn leh nghal a, a hmai duk vek khawp in a mit lemlam ve ve ah thisen tling vek khawp in an khawih rawn leh a hei pawh evidence a awm vek ani thlalak hmuh tur. Chuan a hnu lawk ah chuan kan thianpa pakhat rawn tlan phei in sunflower kawt ah kan awm chu min rawn hmu a zodina an khawih leh thu chu a rawn soi ta a, kan vai chuan tlan phei in kan khawih ve ta ani.

A hnu ah Zodina chuan an mahni zinga mi te chu a car ah chuan tawngkam pangai tak in lokal ula car chhung ah kan soifel don nia atia, tichuan an mahni zinga mite chu an duhthlanna ngeiin car hnung ah chuan an thu luta, zodina leh kan thianpa pakhat chuan phur in beer te an in pui a an titi pui leh a, engvanga kut lo thlak nge an ni tih te an zawt a, an soi thaih vel ta mai mai a kut erawh an thlak lo.

Hei hi thu diktak a nia ka mit ngeia ka hmuh ani, nilo tak tak in social media ah an rawn thehdarha, silai ten an tin a, kidnap ang ten leh huatawm em em chu an chhungkua zawng zawng tleng a an rawn beih na hi thil tullo tak ani. Mi hausa fa an nih avangin chu ti khati tih thu te an rawn post ka hmuh phei chuan a hmuna awm ngei leh mit ngei a hmuchiang tan chuan a thanat thlak in a thinrim thlak duh hle. Tin, ka thianpa Zodina hi tunah pawh kan in tihbuai puite chhungten rawn khing tum in an rawn bei a, mahse a whole incident erawh an chhungte hian an hre hauh lo ang tih ka chiang, social media ah mi hausa fapa ten mi an ti buai a, mi an kidnap tih ang ten an post chuai chuai a mahse buaina chhuah chhan ber Zorammawia leh Zodinliana an khawih rawn thu erawh an soilang duh miah lo thung.”

(He thu hi a post tu tak sawi a ni tawh lo thung a. A tira copy chhawngtuin a tih dik tawh loh vang pawh a ni thei)

Hetianga Pu Zodinliana te lam thlavang hauhna a awm leh tak si avang hian mipui tan thu dik hriat a har a. Tin, Zodinliana Sailo pu Brig. T.Sailo, Mizoram Chief Minister lo ni tawh leh a fapa ZPM ticket-a kum 2018 MLA inthlanpui chuh tura Aizawl West II bial vil mek Pu Lalhmangaiha Sailo a lo awm bawk a, chumi avang chuan mi tam takin politics thila inbeihnaah an ngai bawk a. Amaherawhchu Zothansanga inentirna lehkhaah chuan doctor-in ‘Mipat hmeichhiatna hawia khawih’ a nih thu a ziak lang tel a, tih ENT doctor leh rilru lam doctor pan tel turin thu a rawn bawk.

Zothansanga medical certificate

Hetianga boruak a kal chhoh mek lai hian Zothangsanga nu hian a press statement-a a ziah ang hian Police lam aṭangin hma lakna a ṭha tawk loin an hria a, tin Police lam zawk hian inbe rem turin an ti tih a thuziakah kan hmu a. Heng a nih avangin hian mipuiin Police lam pawh an dem hle bawk a ni. Mi ṭhenkhatin an fate pawh Brig. Ṭhenphunga chhungte hian Zothansanga an lo nghaisak ang chiah hian an lo nghaisak ve tawh thu post chhiar tur a awm bawk a. Amaherawhchu a victim nia insawi midang te hi an nihna chianga sawi theih erawh a la ni lo thung.

5 thoughts on “Brig. Thenphunga tupa Zodinliana Sailo leh a thiante chu Zothansanga rapthlak taka sawisaah puh an ni

  1. He thil thleng hi thil serious tak a ni a. Victims leh accused lam atangin insawifiahna a awm ve ve a, chutihrualin doctor’s result pawh hriat a ni bawk a. Chuvangchuan police tan pawh mi pathum hnen atangin chhui tur leh ngaihtuah ngai a awm thei niin a lang a. Police te hian thudik tak hriat leh hau chhuah a nih theih nan serious taka he case hi an kalpui a ngai dawn a ni.

  2. thudik chanve hmanga thu an thehdarh vak2 mai hian min ti ringlo zo zothansanga te lam. hi… engemaw chu a tuar ngei tihchu a chiang reng a mahse thu a tam ta em a.. ngaihdan lo siamfel a har..

    politics in chirh thehna hi a ang theih. a a tam ve bawk a, chumi rual chuan zothansanga hi a thinrim tuar zolo in mimal inbeihna (thudik kimlo leh inpuhna dik tawklo thlenga in beihna) a an theihna chin a awm, personal vendetta or revenge lam thil..

    chuan lehlam political power leh dinhmun sang tak2 a influence an neih chhuanlam nghal ngawt vek lo hian kan police te hi an nep ve hrim2, thil engkim ah tih te hi ngaihtuah tel ila, chuan mizoram law amd order a kan fail hrim2 zia hi hre tel ila.. thutlukna siam hma in… (harhchhuah nan hman nghal bawk a fin thlak ang) .. lehlam political power neih hi chu chiang in, engemaw chen an influence anlo hmang thei tih erawh thil theih chiang sa a nilo ka tilo

    a tisual tu diktak in a tihsual ngei thil ah hremna a phu tawk hmu ngei rawhse… “may justice be served for everyone”

    chuan a tawp nan, “innocent until proven guilty” hi a pawimawh a, chuan thudik a pawimawh ka ti, thudik chiah… dawt leh thudik chanve te, mi chapo tak mai nih vanga a puh tu thu zawng2 thudik vek a ngaih ngheh nghal hmiah te a thalo ve thei..
    thudiktak han haichhuak teh u!

Leave a Reply

Your email address will not be published. Required fields are marked *

error: Content is protected !!