Mary Jones chanchin
BIBLE SOCIETY LO PIAN CHHUAH DAN LEH A THIL TUM

-Biakhmingthanga Chhangte

“Chutichuan, kal ula hnam tin ami zirtiah te siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u,” Mat. 28 : 19, 20a.

Vawiin hi Khawvel puma Bible Sunday atan Bible Society chuan a lo ruat tawh a kum tam tak kan hmang ta. Bible sunday lo awm chhan ber nia lang chu Mary Jone-i a ni. Amah avang hian Bible Socirty a lo fin phah a, a chanchin i lo chhiar teh ang.

Mary Jones-i’n Bible man a tuak : Wales ram khawthlang lam tuipui kamah Landfihangel khuaah Pu Jakob Jones-a te chhungkua an awm a. Kum 1784-ah Mary Jones-i chu a piang a. Fa pakhat chauh Mary Jones-i an nei a, a nu leh a paten a naupantet ațangin Pathian thu an hrilh fo țhin avangin Pathian thu a hre em em a. Pathian thu chu ngaihnawm a tih em avangin mahnia Bible neih ve a chak em em a. Bible man chu a tuak ta a. Kum ruk chhungin a tuak ngah thei ta a, a hlim hle a ni.

Bible lei turin a kal : An khua Landfihangel ațanga mel 25-a hlaah Pastor Thomas Charles-a te khua Balla ami Bible lei turin a kal ta a. Pastor Edward-a te inah a thleng a, a tuk khua a var veleh Pastor Edward-a nen Pu Thomas Charles-a te inah an kal ta a. Pastor Edward-a chuan an kal chhante engkim a hrilh a.

Bible lei tur awm loh vangin Mary Jones a țap : Pu Thomas Charles-a chuan mi ta tur bu thum chauh a awm tawh a, lei tur a awm tawh lo tih Mary Jones-i a han hrilh chuan Mary Jones-i chuan Bible kum 6 chhunga harsa taka a lo tuak tawh leh an khua ațanga mel 25 laia hla hah taka kala a hlawhchham ta chu beidawng leh lungchhiain a hmai a hupa, a țap ta zawih zawih a; a mittui chu a kut kar ațang chuan a rawn dir thla ta zung zung mai a!! Chu mittui chu vawiin ni a khawvel puma luang darha, luang chhuak ta Bible Society luipui hnar a lo ni ta reng mai a ni.

Mary Jones-i’n Bible a lei ta : Pu Thomas Charles-a chu hnuk ulh țeuhin a rawn ding a, Mary lu chu a rawn vuan a, “Mary, bang rawh; Bible chu i nei ngei tur a ni. Kut ruakin ka hawtir lo vang che, mi dang chuan nei lo mai rawh se,” a ti a. Bible chu a va la a, Mary chu a va pe a. Mary Jones-i chu mittui tling kiauvin a rawn dak chhuak a, a hmelah chuan hlimna êng a rawn nei leh ta a!! Mary Jones chuan, “Keima ta ngei tur a ni em?” a ti a. Pu Thomas Charles-a chuan, “Ni e, i ta ngei a ni, i thawhrimna leh i rinna lawmman a ni e, i chhiar apiangin Pathianin thlamuanin malsawm che rawh se,” a ti a. (Hetih hun laia Mary Bible lei hi King Jame Bible, Papyrus lehkhaa kuta ziak, a ziala zial chi a ni-bc)

Mary Jones-i chu a Bible nen a haw ta : Pu Thomas-a chuan Pu Edward-a lam hawiin, “Țhian Edward, Wels țawnga Bible mamawhzia tilangtu pakhat chu hei hi a ni. He mamawhna phuhru thei tur hian thil engemaw ka tih theih hma chu ka bei ang,” a ti a. Chumi hnu chuan Mary Jones-i chu a Bible nen hlim takin an khaw lamah a haw ta a ni.

Bible Society a piang ta : Pu Thomas Charles-a thahnemngaihnain kum 1804, March ni 7 khan London Tavern (Vantlang Inah) Bible Society hmasa ber British And Foreign Bible Society (BFBS) an tih chu a lo ding ta a ni. BFBS hnuaiah hian India chu February ni 21, 1811-ah Auxiliary pakhat niin Calcutta-ah a ding a, November ni 1, 1944-ah Bible Society puitlingah hlankai a ni. June ni 1, 1978-ah Mizoram chu Associate Auxiliary-ah dah a ni a. February ni 26, 1983-ah Auxiliary puitlinga hlankai a ni leh ta a ni.

Bible Society thil tum : Bible Socirty hian thil tum pakhat a nei a chu chu :

“PATHIAN THU NUNG, THURININ EMAW HRILHFIAHNAIN EMAW A PAWLH DAL LOH, HLEP AWM LOVA THEH DARH” tih a ni.

BIBLE SOCIETY-IN a thil tum tihlawhtling turin hetiang hian ruahmanna a siam leh a :

PATHIAN THU HI

(a). MI TIN te hnena pek tur.

(b). AN HRIAT THEIH tur țawnga lehlin

(c). AN LEI THEIH TUR TAWK – a man tlawma hralh tur, tiin.

Bible lehlin a țulzia : India ramah hian țawng chi hrang hrang 1652 a awma
chhût a ni a. India ramah mihring tluklehdingawn khat aia tam kan awm a, chung zinga za zela mi 3 aia tam hretin Bible kan neia. Zaa 96 te chuan Bible an la nei lo a ni.

Chanchin Țha hril turin : Kan Lal Isuan, “Kal ula, hnam tina mite zirtirah te siam ula, …thu ka pek zawng zawng che u pawm turin zirtir rawh u” (Mat 28 : 19,20) tiin min chah a. Chanchin Țha chu an țawngin kan sawi thiam ve lo va, kan kal chhuak ve thei bawk si lo, engtin nge “Hnam tina mi zirtirah” te kan siam ve theih ang? Chutiang hrereng chung chuan Bible Society chuan awm hmuna Chanchin Țha hrilh theihna kawng hrang hrang a ruahman a, Bible Society-ah Member nih thei dan a siam a; chu chu hetiang hi a ni.

1. Patron member Rs 10,000/-
2. Life member Rs 5000/-
3. Members Rs 3000/-
4. Annual member Rs 1000/-
5. Patron Donner Rs 3000/-
6. Life Donner Rs 2000/-
7. Bible Missioanary Rs. 1000/-

Heng a chunga Bible Sociey member nih theihna anga sum kan pek hian Lal Isua Thupek zawmin hnamtin ami te zirtira siamin Chanchin Tha kan hril ve thei a ni.

Leave a Reply

Your email address will not be published. Required fields are marked *

error: Content is protected !!