Bible lehlin hmasa – Suria tawngin

-Biakhmingthanga Chhangte

Thuthlung Hlui, Hebrai Bible lehlin zinga hmasa ber pawl chu Suria ṭawnga Bible lehlin hi a ni. Hei hi lehlinna pathum lai a awm. Suria ṭawnga Bible an lehlinna hmasa ber te chu hengte hi an ni : –

1. Old Syriac (Suria ṭawnga Bible lehlin hlui) : Hei hi Suria ṭawnga Bible lehlin hmasa ber a ni. Suria Hlui Bible (Old Syriac) tih a ni. Kum zabi 2-na AD a lehlin a ni a. St. Catherine Monastery, Sinai tlanga Mrs. Lewis leh a laizawnnu Mrs. Gibson-i ten 1982-a an hmuh chhuah a ni. Chanchin Ṭha bu pali chauh a awm. Hei hi British Museum-ah leh Sinai Tlanga puithiamte chenna hmun St Catherine-ah hmuh tur a la awm.

2. Diatesaron : Hei hi Suria ṭawnga Tatiana’n AD 170-a a lehlin a ni. Amah hi Asuria mi, Kristian ṭha tak a ni. Rom khuaah a zin a, rei tak a cham a; a cham chhungin Pathian thu a zir a. Rom khuaah Pathian thu a zir chhung hian Suria ṭawngin Chanchin Ṭha bu li te hi a letling a, chu a Bible lehlin hmingah chuan Diatesaron a vuah a ni. Bu khatah a chilh khawm a, a ken vel pawh a awlsam phah hle. AD 175-ah chuan an hmang zau tawh hle a ni. A chhiar a nuam a, tum khatah thui tak tak a chhiar theih a ni.

3. Peshitta (Commom Syriac ) : Hei hi kum AD zabi 5-na vela ziak a ni a. Hebrai ṭawng Thuthlung Hlui bu Suria ṭawnga lehlinna bawk a ni. A letlingtute chu Hebrai Kristianho Hebrai ṭawng thiamte an ni. He an Bible Suria ṭawnga an lehlin hi Peshitta tih a ni a, a awmzia chu mawl, hriat awl, tihna a ni. Suria Bible Peshitta hi a tira mi chu Hebrai Bible Massoretic Text nen a inzul hle a. A hnu lama he Bible lehlin hian Grik Bible Septuagint a âwn hle. Kum AD zabi 5-naah khan Suria ṭawng hmang Kohhrante tan Bible-a nemngheh a ni. Edessa Bishop Rabulla chu Suria Bible Peshitta, a bikin Chanvhin Ṭha bu lehlin kawnga sulsutu ber a ni.

Suria Bible Peshitta hnu deuhvah hian Suria Hexapla Thuthlung Hlui chu kum AD 612 khan Tella khuaa Bishop Paula kaihhruaina hnuaia tihchhuah a ni a. Hei hi Origena Hexapla zûla siam a ni. Suria Hexapla hi Thuthlung Hlui lehlin hmuh theiha la awm tlemtê zinga mi a ni.

4. Philoxenos-a leh Thomas-a lehlin : Peshitta lehlin hi ennawnna siam ṭhat leh a ni a. Mabbuq khuaa Philoxenos Mar-Xenai-a chuan AD 508 khan a ennawn (revised) leh a. Herkel khuaa Thomas-a chuan AD 616 khan a ennawn leh a, a bua siam ve ve a ni.

5. Palestina rama Suria ṭawng Bible : Hei hi a hmasaa mite nen khian a inang lem lo va, kum zabi 5-na vela Palestina rama Suria ṭawng hmang te tana lehlin bik a ni.

Leave a Reply

Your email address will not be published. Required fields are marked *

error: Content is protected !!