Bible lehlin hmasa – Latin Version

-Biakhmingthanga Chhangte

LATIN VERSION : Latin ṭawnga Bible lehlinna hi pahnih a awm a, chungte chu :

1). Old Latin : Latin Bible Hlui (Old Latin Version) hi kum AD 150 vela Grik Bible, Septuagint aṭanga Latin ṭawnga lehlin a ni. A hming dang chu Vetus Itala (Itala Hlui) tih a ni. Africa hmar lama lehlin a ni. Latin ṭawng hi Africa hmar lama chengte, Rome-hote, Goul leh Spain rama cheng te ṭawng hman ber a ni. Tunah chuan Latin Bible Hlui (Old Latin Version) bu pum hi hmuh tur a awm tawh meuh lo. Tuna la hmuh theih hlui ber, a tira mi nia ngaih chu bu nga chauh a awm a, chungte chu 1 & 2 Makabia te, Solomona Thufingte, Siraka leh Baruka lehkhabute hi an ni. Heng lehkhabute hi Bible-a awm lo Apokrifa bu vek an ni.

2). Vulgate : Latin Bible hlui (Old Latin Version) hi a ṭhat tawk loh leh a lo chuai tawh avangin Rom khuaa Pope Damascus-a chuan kum AD 384 khan a hun laia mithiam hawlhlawr Jerome-a chu letling ṭha leh turin thu a pe a. Jerome-a chuan Bethlehem khuaah ṭhut chilhin Hebrai ṭawng te a zir leh ta a. Kum AD 390 – 405 chhung khan Hebrai ṭawng Bible aṭangin Latin ṭawng Bible chu a thar diaiin a letling ta a, a hmingah chuan “Vulgate” tih a ni a; a awmzia chu “Vantlang” emaw “Tualleng” tihna a ni. Thuthlung Hlui leh Thuthlung Thar a letling ve ve a ni.

Vulgate Bible hi ṭhat tawk lohna nei mah se Hebrai Bible aṭanga lehlin a nih avangin kawng tam takah Hebrai Bible kalhmang leh ziarang a phawk chhuak ṭha hle a, Bible zirna atan a pawimawh hle a ni. A tir lamah chuan Vulgate hian sawisel a tawk nasa hle a, kum AD zabi 7-na aṭang khan Latin Bible hlui (Old Latin Bible) nen intluk tlanga pawm a ni ta a. Roman Catholic chuan Vulgate hi Trent Inkhawmpui (Council of Trent), kum AD 1546 khan hman turin an pawm a ni.

Vulgate hi Roman kohhran chuan lehlin dang hmang lovin kum sang aia tam an hmang tawh a, ṭawng danga lehlin pawh kum rei tak chhung chu an phal lo a ni. Kum engemaw zat hnuah Vulgate chu Sapṭawngin an letling ta a, chumi hnu chuan Sap ṭawnga lehlin Douay Version te an nei chho ta zel a ni. Vulgate hi Roman Catholic te chuan an zah em em a ni.

4. AIGUPTA ṬAWNGIN – “COPTIC BIBLE : Coptic ṭawng hi Aigupta ṭawng peng pakhat a ni a. Kristiante hun ṭantirh lai khan Grik ṭawng tam tak an chhawm a; an hawrawp pawh Grik hawrawp vek an hmang a ni. Aigupta rama Coptic ṭawng hmang hian Thuthlung Thar Bible lehlinna pawimawh tak pahnih a awm a. Pakhat chu chhim lam ṭawng “Sahidic” an ti a; pakhat dang leh chu Memphis leh Delta vela an ṭawng hman “Bohairic” a ni. Heng Coptic Bible te hi Grik Bible, Septuagint (LXX) aṭanga lehlin ve ve a ni.

5. AQUILA VERSION : Rom lal Hadrian-a lal lai (AD 117 – 138)-a Aquila lehlin a ni. Amah hi Juda saphun, Ponto rama mi a ni. Ani hian Hebrai ṭawng thu mal chu Grik ṭawng kalhmanga dah lovin Hebrai lam zuiin Grik thu mal a dah zawm ṭhin. He lehlin hi a ngial angana lehlin an tih ang chi hi a ni. Chuvangin Hebrai ṭawng a phawk chhuak zo lo va, Grik ṭawng ulh leh mak pui pui zeh luh a nih phah thung. Juda-te leh Kristiante inhnialna chawk chhuaktu pakhat chu Isaia 7 : 14-a “nula thianghlim” tih a lehlin hi a ni. Septuagin lamah chuan “nula thianghlim” tih chu “parthenos” tih a ni a, Hebrai ṭawng chuan “alma” tih hman a ni a, chu chu hmeichhia, nau la nei lo sawi nan an hmang a, pasal nei tawh pawh a ni thei, nula thianghlim tih pawh a huam thei. Hebrai ṭawngah chuan nula thianghlim sawina bik chu “betula” a ni. Aquila hian Septuagint hman “parthenos” hmang lovin “neanis” a hmang thung a, chu chu hmeichhe nau pai thei chin nula (young woman) tihna a ni. A ṭawng hman hian Septuagint aiin Hebrai ṭawng a phawk fuh zawk a ni.

Tunah chuan Aquila Bible lehlin hi hmuh tur a awm tawh lo va, kan hmuh theih chhun chu a lehlin zinga ṭhenkhat, a them an hmuh chhuah leh kohhran hruaitu ṭhenkhatten an thu ziaka an lakchhawn te aṭangin a ni. Thu ziak ṭhenkhatte chu la khawmin chhuah a ni bawk.

Bible Lehlim Hmasa dang lar zual te : Khing kan sawi bakah khian Bible Lehlin Hmasa dang tam tak a la awm a, chung zinga a lar zual tlem han tarlang leh ila. Ethiopic Version, Persia and Sogdia Vesion, Arabic Version, Cothic Version, Georgia Version, Armenia Version, Slavonic Version, Theodation Version, Symmachus Version leh a dang tam tak a la awm.

Leave a Reply

Your email address will not be published. Required fields are marked *

error: Content is protected !!