BIBLE CHANCHIN

Biakhmingthanga Chhangte, Kolasib, Vengthar.

Bible hi a tirah chuan bung leh chang a nei lo va, khawvel finna leh thiamna lo sang zelah hmasawnna a awm chho ve zel a, tichuan kan Bible pawh changkanna lamah a phuisui chho ve ta zel a. Bung leh changte an dah belh a, chhiar duh lai te a hmuh zung zung theih ta a ni. Chutianga hma a sawn zel dan i lo zir ho ang u.

1. Bible ziakna hmun leh hunte :

Pathianin a mi 36-te hmangin Bible hi ziak a ni a, an ziak hun chhung chuan kum 1600 lai a awh a ni. Mosia hun ațanga țanin, Thupuan ziaktu Johana hunah a tawp a ni. A ziaktute chu berampu te, hla phuahtu te, zawlnei te, sipai te, sangha mantu te, miffing te, thil chik mi te, doctor te, Pharisai te, tirhkoh te an ni. A tlem berah țawng chi thum-Hebrai țawng te, Aramaik țawng te, Grik țawng tea ziak a ni. A ziakna hmun te chu – thlalerah te, thliarkarah te, pukah te, lal inah te, luikamah te, kawtthlerah te, lung inah te a ni. An ziakna hmun leh kum te, a ziaktute mi hrang hrang leh hmun hrang hrang, kum inkar hlat tak taka mite ni mah se an thuziakah hian inanna leh inzawmna a awm vek a ni. A siamtu tak chu mi pakhat Pathian a ni tih chiang takin a lang.

2. Bung neia țhen dan :

Bible hi kuta ziak a nih lai khan Hebrai hawrawpin, hawrawppuia ziak zawm pût a ni thin a, chhiar sual a awl hle a; chhiar duh lai pawh zawn hmuh zung zung a harsa em em a ni. Entir nan : ATIRINPATHIANINLEILEHVANASIAMA (Gen. 1:1). BC 586 khan Mosia lehkhabu panga (Genesis –Deuteronomy) hi hlawm hrang hrang 154-ah an țhen darh a, a zawn tiawl turin hmun 669-ah an then sawm leh bawk. Chu chu kum khat chhunga chhiar chhuah theih tura duan a ni.

Kohhran Pa an tih zinga mi, Kohhran chanchin ziaktu hmingthang tak, Theology lamah pawh mi thiam hawlhlawr zinga mi Eusebias-a chuan Thuthlung Thar Chanchin Țha Bu lite chu hlawm hrang hrang tam fein a then a. Matthaia Bu chu hlawm 355-ah, Marka 235, Luka 342, Johana 232. Heng hlawm hrang hrang te hi number a pe leh vek a, Chanchin Țha bute han khaikhinin a thu inang leh inang lote chu a hmuh chhuah zung zung theih a ni. Ani hi AD 340 khan a thi a ni. Hetih hun laia an Bible ziak pakhat Vaticanus pawh hetiang deuha hlawm hrang hranga țhen a ni bawk.

Tuna bung kan neih anga țhentu leh tichhuak hmasa bertu chu Bishop Stephen Langton-a, Archbishop of Canterbury; English mi a ni a, Theology lama mi thiam a ni a; Paris University-a Professor a ni. AD 1203 leh 1207 inkar khan Bible pum hi a sei zawng inang tlang deuh si thu hlawm kal khat ni siin a then a ni. A bunga siam hi Latin tawng Bible, Vulgate-ah a hmang hmasa ber a, miten remchang an tiin an duh hle. Miten lehkhabu chhiar an uar tan lai vel a ni bawk a, a copy pawh tam tak an siam a, a bu zangkhai chi, a tê zawk te pawh an siam bawk. Țawng danga Bible an siam pawhin he bung hi an zui ve ta zel a ni.

3. Bungte changa siam a ni :

Stephen Langton-an Bible bung neia a lo then tawh te chu kum AD 1551 khan Stephanus-a chuan Grik Thuthlung Thar bu chu a chang tê têin a then leh a. Amah hi Bible-a chang tichhuaktu leh chang number siam hmasa bertua ngaih a ni. A hming dang chu Robert Estienne-a a ni. Ani hi Paris khawpuia awm, khawl chhutna neitu, khawl chhu mi leh thiam tak a ni a. Ani hian Thuthlung Thar chu khawlin a chhu a, chutah chuan a chang number hi a dah a, kum 1551 khan Grik Bible, Thuthlung Thar chu a tichhuak ta a ni. Hei hi Bible chang nei tihchhuah hmasak ber a ni. Kum 1555 khan Latin tawng Bible, Vulgate bu pum pui chu bung leh chang neiin a chhu bawk.

Sap tawng Bible, a bung leh chang then, khawla an chhut hmasak ber chu Geneva Bible a ni a. AD 1560-ah khan chhut a ni. Hemi hnu hian King James Version-ah pawh bung leh chang hi an hmang a ni. Judate pawhin an Bible-ah pawh he bung leh chang nambar hi an hmang zui ve zel bawk a ni. Tichuan eng tawng pawh ni se Bible chhut apiangah bung leh chang a inan chuan a thu te a thuhmun vek ta a ni.

Leave a Reply

Your email address will not be published. Required fields are marked *

error: Content is protected !!