BAWHCHHIATNA

Lalṭanpuia Ngente

Bawhchhiatna chungchang hi heti hian han sawi fiah dawn ila. A hmasain Pathian chuan bawhchhiahnaah khan ‘Mipa’ (Adama) chungah chauh mawhphurna a nghat a, ‘Hmeichhia’ (Evi) chungah mawhphurhna a nghat ve lo tih kan hre hmasa dawn nia.

(Genesis 3:17 Tin, Adama hnenah chuan, “I nupui thu i zawm a, thing pakhat, ‘A rah i ei tur a ni lo’ tia thu ka pek che kha, a rah i ei avangin lei hi nangmah avangin anchhe dawngin a awm ta a ni.)

Setanan thlahtu bulte a thlem hma khan Pathian chuan a mihring siam Adama, sual reng reng la hmelhriat lo, thlemna leh bumna pawh la tawng lo, thinlung thianghlim tak ai chuan Setana chu nasa takin a fing zawk tih leh, setana chuan mipa thinlung kawltu hmeichhia chu hmanruaah hman nachang a hre em em dawn tih a hre sa vek a. Mahse, Adama ah chuan duhthlan theihna zalen a dah avangin setana chu dan a tum lo va, chu mai ni lovin Setana chuan Adama chu suala a hnuh luh theih nan tihluihna tel lo chinah chuan eng hmanrua pawh a hman a phalsak a ni. A chhan chu, Pathianin a chatuan lawmna fa a zawnna kawngah hian tihluihna tel lova mahni duh thu ngeia a thu awihtu chauh hi a zawn leh a duh a nih tlat vang a ni. Hei vang hian a mihring siam chu duh thlan theihna zalen a pe a, duh thlan tur pawh a pe nghal bawk reng a, hetiangin:

(Genesis 2:16-17 Tin, LALPA Pathian chuan mihring hnênah chuan, “Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tiin.)

Hengte hi ngun takin i ngaihtuah teh ang. Engvangin nge ei loh tur thupek a pek.? Sawi tawh ang khian an duhthlanna hmanga a thu awiha awih lo thei tura a siam tawh vang a ni. Duh thlang thei lo hmaa duh thlan tur chhawp chhuah sak chu mi â hna a ni ang. Tin, Pathianin eng ang mi nge a zawn.? Tihluihnaa a thu chauh awih tura a phuar beh tur nge a zawn tihluihna tel lo va mahni duh thu ngeia a thu awihtu.? Khita kan sawi tawh ang bawk khian tihluihnaa a thu chauh awih tura a phuar behte chungah chuan a lawm a kim thei dawn lo va, chuvangin zalenna a pek hmanga mahni duh thu ngeia a thu awihtu hi a zawn chu a ni.

Tichuan, hei hi han chhiar chhunzawm ila. Genesis 3:1-6 “Tin, LALPA Pathianin ram sa a siam zawng zawngah chuan rûl a fing vervêk ber a. Tichuan ani chuan hmeichhe hnênah chuan, “Pathianin, ‘Huana thing rah rêng rêng hi in ei tûr a ni lo,’ a ti elo maw?” a ti a. Tin, hmeichhia chuan rûl hnênah chuan, “Ti lo ve, huana thing rahte hi kan ei thei asin: huan lai taka thing awm rah erawh chu Pathianin, ‘In ei tûr a ni lo, tawh pawh in tawk tûr a ni lo, chutilochuan in thi ang,’ a ti a ni” a ti a. Tin, rûl chuan hmeichhe hnênah chuan, “Thi teh suh e: in ei nî apang chuan in mit a lo vâr ang a, a chhia leh ṭha hriain Pathian ang in lo ni dâwn tih Pathianin a hre reng a nih chu,” a ti a. Tichuan hmeichhia chuan thing rah chu ei mi a ni tih leh, mit la tak a ni tih leh, mi tifing tûrin thing rah îtawm tak a ni tih a hriat chuan thing rah ṭhenkhat chu a lo va, a ei ta a; tin, a pasal a pe ve a, a ni pawhin a ei ve ta a.”

(Helaiah hian hei hi han sawi peng lawk teh ang. Engvangin nge Setana khan a chhia leh a ṭha hriatna thing ni lovin ‘Nunna thing’ rah zawk kha ei tir tuma a thlem zawk loh.? tih hi ngaihtuah tham a ni. Huanah khan Nunna thing pawh kha a awm ve reng si a, kha zawk kha ei turin han thlem thluin mihringte khan han ei hlauh zawk ni sela chuan thil a danglam nasat duai duai tur zia hi suangtuah thiam phak pawh a ni lo ve. Hei hian Pathian chungnun zia, a chatuan remruat fel zia leh Setana pawh a phal chin baka a chet theih loh zia a lan tir chiang hle a ni. Setanan Pathian laka zalenna a hmuhah hian thlarau thihna thlen theihna a nei a, nunna thlen theihna erawh chu a nei tel ve lo va, hei vang hian Nunna thing eitir tura thlem turin zalenna a nei tel ve lo. Nunna thing chu mihringin a chhia leh a ṭha a hriat hnuah ei nachang hriain mahni thuin a ei thei dawn a, mahse Pathianin a duh zawng ‘nun thianglim’ nei lo va ‘Van khawpui thianghlim’ luah a phal loh avangin a ven tir ta tlat a nih kha.

)

Tichuan, fing ver vek tak Rul chuan a finna hmangin hmeichhia chu a va vehthlem a. Pathian thupek awm sa chu dawtah chantirin ‘Thi teh suh e’ a va ti a. Pathianin thihna a sawi chu Thlarau thihna a ni tih a hre reng a, mahse chu chu thupin taksa thihna thu a va sawi pui ta daih a. Tin, mit varna te, a chhia leh a ṭha hriatna te, Pathian ang nihnate a va sihmuh bawk a. Hetah hian, sual reng reng la hre lo, thlemna leh bumna pawh la tawng lo, hmai chhana Pathian thupek pawh dawng ve lo hmeichhia chu bum a awl tur zia mai chu hriat sa a ni.

Tun laiin TV-ah te fakna (advertisement) chi hrang hrang mawi tak tak, thinlung leh mit la tak tak kan hmu ṭhin a. Thiam taka faknain mihring thinlung a hneh theih zia pawh kan hre vek awm e. Sumdawng company liante pawhin fakna thiltihtheih zia an hre chiang a, sum tam tak sen pawh an huam ṭhin reng a ni.

Sual reng reng la hmel hriat lo, bumna leh thlemna pawh la tawng lo, fakmawina thu pawh la tawng chuang lo hmeichhia chuan dâwt thu hmanga fakmawina thu thlum tak a han hriat chuan thing rah chu a hmu îtawm ta em em a, a insum zo ta lo va, tichuan a lo va, a ei ta mai a. A pasal pawh chu a pe ve a, ani pawh chu sual reng reng la hmel hriat lo, bumna leh thlemna pawh la tawng bik lo, fakmawina pawh la tawng chuang lo a nih avang leh, Pathian thuin, “Chuvangin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang,” a tih anga a nu leh pa, amah hringtu Pathian kalsana a thinlung chu a nupui lama a awm tlat tawh avangin Pathian thupek pawh ngaihtuah chang tawh lovin a nupui thu chu ihe lovin a zawm a, a ei ve ta mai a ni.

Hetah hian Setana fin zia a lang. Mipa (Adama) hneh tur chuan tihluihna hman phalsak a ni si lo va, mahse, mipa chaklohna ber chu hmeichhia a ni tih a hre chiang a. Pathianin mihringa a chhiar zawk leh thu a pek zawk mipa kha va bitum ngawt sela chuan a hlawhtling dawn hauh lo tih a hre chiang em em a ni.

Mahse, mipa thinlung kawltu chu hmeichhia a ni tih a hre chiang a, hei hi Pathianin mihring a siam dan phung a ni tih pawh a hre chiang a, mipa chaklohna ber hmeichhia, bum awl zawk lehnghal chu thiam takin hmanruaah a va hmang ta a. Tichuan Mipa (mihring) chu ama duh thu ngeiin bawhchhiatnaah a luh tir thei ta a ni.

Tichuan mihring hmasa berte chuan Van khua-leh-tui nihna kawl sa reng chungin thing rah chu an ei a, an chhunga chatuan minung, Van khua-leh-tui nihna neitu an thlarau chu anchhedawng a lo ni ta hlauh a. Pathian ang ni tawh sa reng chungin an ei a, Pathian an anna chin zawng chu a bo ta hlauh bawk a. Adama bawhchhiat anga bawhchhe ve lo an thlahte zawng zawng pawh thihna chuan min man ta vek a, vawiin thlengin sual zungzam chu kan miziaah a bet ta tlat a nih hi.

Lal Davida’n, “Ngai teh, khawlohnaa dinin ka awm a; Ka nun sualin mi pai a,” (Sam 51:5) a tih ang hian, mihring piang chhuak zawng zawng hi setana laka uire tawh thisen bawlhhlawh thlah vek kan ni a, Pathian mithmuha mi bawlhhlawh, a hnena chêng tlak lova piang chhuak vek kan ni.

Aw le, bawhchhiatna bul ṭanna chu a chian lehzual nan heng Bible chang palite hi han en chhunzawm leh ila.

(Genesis 3:17 Tin, Adama hnenah chuan, “I nupui thu i zawm a, thing pakhat, ‘A rah i ei tur a ni lo’ tia thu ka pek che kha, a rah i ei avangin lei hi nangmah avangin anchhe dawngin a awm ta a ni.)

(Rom 5:12 “Chutichuan mi pakhat avangin sual khawvelah a lut a, sual avangin thihna a lut bawk a”)

(Rom 5:18 Chutichuan sual pakhat avangin thiam loh chantirna rorelna chu mi zawng zawng chungah a lo awm a; chutiang bawkin thil fel pakhat tih avangin nunna hmuh nan thiam chantirna thilthlawnpek chu mi zawng zawng chungah a lo awm.)

(1 Timothea 2:14 Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a.)

Heng chang tar lan palite hi ngun taka kan thlir chuan, Pathianin lei anchhedawnga a awmna chhana a puan chu Adama a ni tih kan hmu a. Tin, Adama chu bumin a awm lo tih kan hmu bawk a. Buma awm lo Adama chu bawhchhetu a ni tih a tar lang bawk a ni.

Lalpan hriatfiahna neih tir ṭheuh che u rawh se, Amen.

(Hei hi Pathian chatuan thil tum tih chhunzawmna atana ziah a ni a, Kan tih tel lo chhandamna tih hmangin chhunzawm leh a ni ang.)

Leave a Reply

Your email address will not be published. Required fields are marked *

error: Content is protected !!