Awithangpa chanchin – Hmarlutvunga chanchin

LALAWITHANGPA

-R.L. Rokhuma

Lalawithangpa hi a hming tak chu Hmarlutvunga a ni a, mahse Awithangpa  tih hi a larin mi zawng zawng hriat dan a ni zawk mah awm e. Ani hi Mizo hla phuahtute zinga hmingthang ber leh hla kalphunga Mizo te zirtirtu a tling hial awm e. A pi leh pute hi hmanlai Mizo khaw lian ber Selesih aṭangin Rolura hoin chhim lamah pem pheiin Lunglei chhehvel khawi lai khuaah emaw sawn an awm a, chulai a an awm lai chuan ṭhing a lo tam ta a, hmar lam ai chuan chhim lam chuan an tuar na hle a, chuvangin hmar lamah Zahrawka khua Kanghmunah an pem a. Kum 1885 ṭhal laiin Mizo zinga hla phuah thiam ber pakhat ni tur Lalawithang pa chu a lo piang ta a ni. A nu leh a pate chu chhim lam aṭanga hmar lama lut an nih avangin a hmingah Hmarlutvunga an sa ta a ni. A Pa hi Dothanga Ralte Lelhchhun hnam a ni.

Hmanlai chuan Mizo te hi inrun chingmi kan ni a, chutih avang chuan kan pasalṭhate pawh an lo vak thuiin British sawrkar pawi pawh an lo zuk khawih a nih kha, chutih avang chuan British sawrkarin sipai tirin Mizo te chu min rawn kap ta a, hetih hun lai hian Mizo lalte zinga lian ber Lianphunga khua Lungtuiah an awm a, mahse British sipai ten Lianphunga  an man tak avangin an darh zo ta a. Tichuan Zahrawka fapa Khawvelthanga hoin kum 1903-ah Maubuang-ah an kai chho a, he khuaah hian a vanglai hun zawng zawng a hmang ti ila a sual awm lo ve.

[adToAppearHere]

A HLA PHUAH HMASA

Awithangpa chu a pain a thihsan hma avangin fahrah rethei a lo ni ta mai a, a pa nau Saileta hnenah a awm ta a. Maubuang lal ni ta Khawvelthanga’n aiphahpui atana Maubuanga a chhohpui a ni a, an lung rualin an inkawp thiam em em a, khawchhiar (Village Secretary) ah aṭang a. Mahse sikulah lehkha zir lovin, ama taihmakna avangin in lamah ziak leh chhiar a thiam a ni. Lal pawimawhin khaw chhehvelahte a kal ṭhin a, lal silai a keng ṭhin a. Ni khat chu Ṭhiak a kal tura a kal laiin Farṭuah hi kawng sirah a lo par vul chuk mai a, (Ṭhal lai ni a), Sava chi tin rengin a par zu chu lo tlanin hlim em emin mahni pianpui ṭawng ṭheuh hmangin an lo chiar nuai nuai mai a, chungleng savate zinga lal ber Vakulte pawh an leu zuai zuai mai a ni awm e. Chung lai chuan mi tin mai hian Vakul chang hi an duh em em mai a, lal silai chuan kah an tum ta a, mahse a thinlungah hla a lo lang a, ti hian an chham chhuak ta a.

“Ṭuahpui lo par thlangah vai puan sen angin,
Chengrang phirin chhai ka nuam e,
Chungah kulva lo fu rawh” a han ti ta a.

Hei hi a hla phuah hmasak ber chu a lo ni ta a ni. Chumi hnu atanh chuan hla hi a phuah ta zel a, nula hote pawh hlain mawi tak takin a phuah kur liai luai mai a, a lo lar ṭan ta hle a ni.

Vawi khat chu an lal leh Chenkual lal tlawm pakhat Hrangliana, a aia upa ve ve nen lal inah zu in-in an inkawm a, fa kan neih huna an hming tur i sa ang u, an ti a. Hmarlutvunga chuan kei chu kan lal zarah hla ka phuah tam ta hle a, fa ka neih hun chuan Lalawithanga ka sa ang” a ti a. Chuta ṭang chuan Lalawithangpa tih hi a fa neih hma aṭangin a hming lar zawkah a lo hmang ta a ni.

AWITHANGPA HLA BIL A LO PIANG ṬAN

Awithangpa hi Maubuang an kai hlim chhawn 1903 lai vel chuan Kristian a ni tawh a, Mizo kristian hmasate zinga mi a ni a, mahse la hla lamah a rilru a kal nasat em avang leh Kristian chuan Mizo hla lam reng  reng (Khawvel hla)hi kristian tan sak an khap tak hial avangin Kristianna lamah pawh a in hmang hlei thei ta lo.

Awithangpa hian Mizo ṭawng a thiam em em a, a han titi te pawh hian mi nazawng pawhin an hriat thiam em em si, mahse an hman ve thiam hauh loh hian a titi ṭhin a ni. Tunlai ang hian a hun lai khan record-na ṭha nei ila, a ṭawng kha lo record ta ila, a ṭha awm em tur a ni a, mahse khatih hun lai khan record-na tur hmanraw ṭha kan la nei si lo, a pawi hle a ni. A hla phuah hi Mizo hla phuahtute hruaitu ṭangkai em em a nih avangin a hla hian Mizo awm chhung a daih dawn a ni.

A HLA PHUAH TAM BER

A hla phuah tam ber chu mipui sak duh zawng (love song ) hi a ni a. Nula te hi ngai awm em emin a phuah ṭhin a, hmeichhe lamah chuan ama insawi danin a fihlim em em si a ni. Hla phuah thiam a ni a, nulate hian an bawr nasa em ṭhin a, mahsela a tlangval chhung khan nula a ngai ang em? tih hi a hre chiang hote hi an inhnial laih laih ṭhin a ni. Lal nulate zawk phei chuan an lo bawh nasa leh zual a, “A insum thei bik lovang”, te an ti a, mahse hriat a ni si lo a.

[adToAppearHere]

Hlate a phuah tam deuh hnu chuan Maubuang khua chu tlemte la ni mah sela, hlain an chawimawi ṭan ta a ni.

“A nuam mang e Buangkhawpui kan tual lenna;
Di kan chhai e zaleng runah,
Chhuihthangval annemte’n”

an ti bawih hnap ta a ni.

Lal khawchhiarah hian kum 26 a ṭanga, kum 16 a nihin nula Chawngthangpuii a ngaizawng a, hla a phuah ta a. He hla hi lengzem hla a phuah hmasak ber chu a ni.

“Ka dawn Thangnemi mah kur love;
Ka dawn loh tlanga thing len buangin
Lelte a kurpui reng e” tiin.

Tichuan kum 18 a lo tlinin Bawlte nula chhuanvawr Laltuahpuii chu dam chhunga a kawppui atan a lo nei ta a, tichuan kum 1905-ah fapa duhawm tak mai an lo nei ta a. A tlangval laia fapa a neih huna a hming atana a lo phuah lawk tawh angin “Lalawithanga” tih chu a hmingah chuan a sa ta a ni. Mahse vanduaithlak takin kum 1 mi a nihin a boral ta hlauh mai a, a sun nasa em em mai a, lusun zai a phuah ta a, chang 5 laiin a phuah a,mahse chang khat chauh tar lang ila,

“Puini chu lem ang zu der ta la,
Nang chu Awithang ka tuai lungrun
Hring-lamah lo kir leh la” tiin.

Ni khat chu Sabual nulaten Lalawithanga a thi tih hre hauh lovin a en turin an lo kal a, “Naute kan rawn en dawn e” an han tih chuan Awithangpa hnuk chu a ulh a, chhan pawh a chhang thei lawk lova, nakinah chuan hla an chham chhuak ta a,

“Bualtlang hmuh ka nuam e an ti,
Lalawithangan a sak hming ṭha
Rih tlang a liampui e”

tiin ruah ṭham loh hla mittui tla zung zung chungin a rawn chham chhuak ta a ni.

Lalawithangpa hi kan sawi tawh angin kristian ni mahse khawvel lam hian a hnuk hneh hle a, zu hmun zai khuang bente leh lam te hi a thiam chungchuang bik a. Awithangpa tel lo chuan lal leh upa-ho awh an tlei thei tak tak bik lo a ni ang, ṭum khat pawh lal inah an ko lut lui a, vawi khat chauh khuang min han bensak leh teh khai tiin an sawm lui tlat mai a, lal thu han hnial fithlak ṭhuai chu hreh tak chungin a bensak ta a, amah chu a tui ṭan ve ta hle mai a, mahse tlem tal han in ve loh chuan a lam duh an a ring si lova, an dawm bet a, zu chu an tulh lui ta a. Khang hun lai kristian chuan zu an tem phawt chuan kristian an inti ngam ngai lo a ni. A rilru a mangang hle a, a lo rui ta deuh va, ruah tham loh an chham chhuak ta a.

“Ngaih ngai ka ngai, ka dawn ngai ka dawn leh ta,
An sawi anga rauthlaleng min chhalh chuanin
Ka hawi hem hawm awm e, thangvanah”

a ti hial a, a khawngaihthlak ang reng hle a ni.

KOHHRAN UPA A LO NI TA

Tichuan kum 1918 aṭang chuan kristian lamah a rilru a lo pe tak tak ta a, Pathian rawngbawlna lamah pawh a lo inhmang tui chho ta zel a. Kum 1926 ah Biate Presbytery-ah Maubuang upa atan nemngheh a lo ni ta a, chuta ṭang chuan kohhran Committee pawimawh hrang hrangah a tel a, Assembly Pastoral Committee hial te pawh a lo han hawlh ve a ni.

PA RAWN TLAK A NI

Awithangpa hi pianpui finna ṭha tak nei, parawn tlak a ni a, vantlang zingah hnawka awmin emaw lal leh lalte zingah harsatna/inhmuh thiam lohna a awmin, a han sawi chuan a fel duak ṭhin. Mite ṭhat tlanna atan chuan Pathianin finna a pek a ṭulna taka hmang thiam mi a ni. Hnamchawmten an ngainat mai bakah lal ho hlei hlei hian an ngainain an khuaa awmah hian an it ṭheuh a, vawi khat pawh lal Saihnuna ‘n a khua a zin ṭumin pem turin leh Upa min ber ni turin a sawm a, hlain a chhang let zaih mai pek a nih chu mawle.

[adToAppearHere]

“Tu lal lai zu mah a thlum chuang lo;
Hmawng ang ka pem lo nang e Lalawithangpa,
Belh ngai Laldanga ka ṭhen thei lo” an ti a.

A belh ngai lal Khawvelthanga tan chuan a thlamuan thlak ngawt awm e. Ṭum khat pawh Zataia khawchhak lal khuaa a zin ṭumin Zataia chuan a ka leh a lei a ensak a, “Mi ka leh lei ang tho chu i pu ve a ni si maw, Kha mi khan maw Belh ngai Laldanga ka ṭhen thei lo,  i lo tih chu” a ti hial a ni an ti.

KAWNPUIAH A PEM

Kum 1937 January thlaah Kawnpui -Saitutera khuaah a pem ta a, kum 52 a nih kum a ni a, Zoram chhunga mi lar anih avangin miin an hlutin an lawm em em a, a lo thlen dawn ni chuan an hmuakin khawtlang an hlim em em a ni. Tichuan Kawnpui khua-ah awmhmun a bengbel ta a, Presbytery upa a ni bawk a, Kawnpui-ah pawh upa a thlan nawn pawh awm lovin Kohhran Committee-ah pawh tel zelin, inkhawm hruaina hna te pawh nei zelin, Kohhranah pawh a khaipate zinga mi a ni chho zel a, mahse mi thar chawk changin a nun khua chu a har ṭhin hle a ni ang. Vawi khat Aizawl Durtlang Leitan aṭangin Maubuang khua an thlir a, a ding chat mai a, hla a han phuah ta a, a tleirawl laia hla lar ber chhimthlang zai thlukin,

“Chhim an hnim e, hmaran khuangruah surin zawnhlei ngai lo ve;
Luah loh lungdi ka ṭhen sual e,
Ka ngai, hmana kan nun kha”

a han ti ta veng veng mai a ni. He hla awmzia chu, ruah surte chuan ban hun an nei leh mai ṭhin a, ka lo pensam tak mai, ka vanglai zawng zawng ka hmanna Maubuang ka ṭhen chu ka tisual der a ni, ka va han ngai tam e,, a tihna a ni.

Awithangpa hian khawvel thil (nature) lam pawh tam tak a phuah a, arsi te, mautam lam te leh thil dangte an ni hlawm a, chung hlate chu hla ṭha tak tak ṭhangthar zel tana zir tlak tak tak an ni hlawm a. Hla phuah thiam ve tak tak mi dangte pawh awm ve mah sela, eng vangin nge Awithangpa hi an tluk theih loh, kan tih chuan ani hla hi a thul kal hmangte, a thluk leh a thu inhmeh em em te an nih vek avangin hriat reng a awlsam bik em em a ni, ti ila kan tisual tampui lovang. Khanglai kha Mizoten ziak an la thiam tak tak hma a ni a, ziak hauh lo hian an han sa a, mi rilruah a cham nghal thei mai zel a, chuvangin a hla phuahte khan Zoram pum rang tak takin a deng chhuak thei ṭhin a ni. Tunah pawh tam tak mite lo vawn, lak khawm tur kan hmu thei ang. Tin, amah hi hla phuah thiam mai lovin pasalṭha, mi huaisen a ni. Mahse rannung tihhlum, silai kah, thangkam lam chu a tih zawng a ni lo. Rannung chunga a ngil neihzia chu ama ranvulh a enkawl danah pawh a hriat theih a ni.

Tin, lo a nei ṭhin a, a tui em em a, chhungkaw intodelh a ni. Mizo pa, in  ṭha takah a cheng kum khua a ni ber e. Kawnpui Play ground No 1. tlang lampangah a dam chhung hun chu a hmang a ni.

A fate:

1.Lalawithanga – kum khat mi niin a boral
2.Thantluangi – Fa paruk (6) neiin a boral
3.Thanzauva – Assam Police aṭanga pension-in a boral
4.Thankunga – Fa pathum (3) a nei a, ani pawh a boral tawh.

Lalawithangpa hi mi tlawmngai leh mi huaisen a ni a, ran chunga ngilnei, ransate tihlum duh ngai lo mi a ni. Tin, amah hi mi inchei fai peih tak mai a ni, ma neih tawkah felfai taka inchei mi a ni a. Kamis leh Kawrchung hain Mizo puan kaihsin ṭha tak hi a veng ṭhin a, sap pukhum kan tih hi a khum ngei bawk a, mi invawng fel peih tak mi niin amah pawh Pathian zarah a hriselna pawh a ṭha em em a ni. Kawnpui khuaah ni 11th, April, 1965, Pathianni zing dar 7:00 lai vel khan a rawng a lo bawlsak ṭhin hnenah chatuana chawl turin min lo chhuahsan ta a ni. A ruang hi ama kawmthlang huanah a ṭhiannu bulah dah a ni a, a hriatrengna lung pawh kum 1990 khan Kawnpui Hmarveng YMA leh Hrangbana College ten lungrualin ropui takin an phun a ni.

Awithangpa thlan

Lalawithangpa hi Kawnpui khuaa piang leh sei lian ni lo mahse, a dam chhung hun tam tak a hmanna leh a lo tlei tlakna hmun a ni a, a sulhnu leh a hlate hi Zofa ṭhangthar lo piang leh zel tur tan hian i vawng himin i hlut ang u.

Lehkhabu rawnte:

1.Kawnkhawpui

2.Pu R. Vanlawma kamchhuak

[adToAppearHere]

Leave a Reply

Your email address will not be published. Required fields are marked *

error: Content is protected !!