Aw Lalpa lawmthu kan hrilh che – C. Saikhuma

1.Aw Lalpa, lawmthu kan hrilh che.
Malsawmna tinrengte leh
Lal Isua min pêk avângin,
Chhandamna kan dawng si a.

I hnenah lawmthu kan sawi e,
Ei leh in, silhfente nen;
Boruak thianghlim, ni eng, ruah sur.
Malsawmna tinrengte nen.


2.I thilsiam rimawi ka hriat leh
Rawng chi hrang mawi ka hmuhte,
Mihring siam chhuah thil hlu zawngte,
Malsawmna min pek a ni.

3.Mangana min ṭanpui turin,
Tih theih loh min tihsaktu;
Kalsualna laka min vengtu
Kohhranho min siamsak a.

4.Thih lungngaihna ka tuar laiin
Min hnemtu ṭhenrualte nen.
Ka lungngaihna min chhawk zangtu,
Hmangaihtu min siamsak a.


5.Aw Lalpa, lawmthu kan hrilh che
Beiseina lawmawm vang leh;
Engkim siamtharna hun ropui,
Thleng thuai se, kan nghakhlel hle.

Leave a Reply

Your email address will not be published. Required fields are marked *

error: Content is protected !!