Aw ka Chhandamtu min hmangaihna – Upa K. Zalawma

MIN HMANGAIHNA

Aw ka Chhandamtu, min hmangaihna,
Thu leh hlain ka hril seng lo ve;
Khawngaihna thilthlâwnpĕk – chhadamna,
Kalv’ry-ah thiin kei min hlan ta.

Tawp nei lova min hmangaihna hi,
Chi tin, hnam tinin lo hria se;
Kan zâa dam nâna thi Lalpa,
I hmangaihna a va mak ĕm!

He hla hi Tumkau Ni hla phuahtu phuah bawk a ni a. 1951 June ni10-ah Buhban khaw zaipawl hruaitu Raltawnliana leh Kapzingi te fa 5-na atân khaw éng a rawn hmu ve a ni.

Zoram buai lai khan January ni 13 1967 khan Lailak khaw daia inkahnaah a malpui ruh kah tliah sak a ni a, chumi kum December thlaah Khawruhlianah group an ni a. Krismas zawh veleh sipai hmuh loh hlanin Kolasib panin an chhuak ru a; January ni 4.1968-ah Kolasib chu an theng ta a, tunah hian Kolasib Vengthar Presbyterian Kohhran Upa a ni.

1967 kumah hla pakhat a phuah a, chu chu a hla phuah hmasak ber a ni a, Zoram buai leh khaw hal, grouping vel avangin a hla phuah hmasak ber chu a pilril ta a.

1973 kumah hla 4 a letling a, 1974 aṭangin hla lehlin leh hlaphuah chu a chhunzawm ta zel a, 1981 thlengin hla 14 a phuah leh a. 1982 kumah hla 8 a phuah a, hlapui (Anthem) pawh a tel nual.

Min hmangaihna tih hla hi ni 25.2.1983 kuma a phuah a ni a; 1983 kuma a phuah hmasak ber a ni.

He hla a phuah dan:
A awmna Diakkawn Chhimveng Kohhran (tunah New Diakkawn Kohhran) KṬP Committee-in Zaipawl Conductor a nih angin Good Friday-a zaipawl sak tur hla thlang turin a ruat a.

A rilruah a vei lian hle a, ni 25.2.1982-ah chemlui zawla a nûlah maian phura a feh chu a haw kawngah a rilruah lo thlengin a thu leh a thlûk hi a rualin Pathianin a pe kawp nghal ta mai a ni.

Diakkawn Chhimveng Kohhran zaipawl chuan Good Friday-a sak turin phŭr takin an zir ta nghal a ni.

He hla hi Pathian hmangaihna puan chhuahna leh sawmna hla kan ti thei âwm e: chang 2-naah –

Lalpa, min hmangaihna thu hre lo hian,
Khawvel pârmawina ka lo ûm ṭhin;
Tunah Kalvaria min hmangaihna
Hriain, i hnĕnah ka lo kir e…. tiin 1966 favang laia a Lalpa hnenah a in tukluhna kha hlain a rawn chham chhuak ta phawt a; chang 3-naah chuan –

Nang pawh aw unau duh tak tunah,
Thlarau Thianghlimin a sâwm reng che;
Rûm sawi hleihtheih lohvin a dil sak che,
Eng chen nge i la rumtir dawn le?… tiin sawmna leh zawhnain a châng a khar a ni.

He hla phuahtu hi Thingtlâng khua, sikul sâng awm lohnaa seilian a nih avangin, Mizovin “mimawl” kan tih ang mi hi a ni a, a hla thu leh a solfa te pawhin belh chian a dawl lo mai thei e. Amaherawhchu, a phâk tâwk ang anga Lalpan hman a duhna chu hnar lova tihhlawhtlin tum tlat mi a ni a; a duh hunah Pathianin mal a la sawm mai turah a ngai ve tawp mai a ni.

Pi Lalsangzuali Sailo nen:
Pi Lalsangzuali Sailoin a hla phuah a buaa a rawn chhuah khan a hla thu hman chungchâng thuah lehkha te inthawn tawnin an sawi dun ṭhin a, Pro. Pastor Vanlalrawna (tunah Rev. Vanlalrawna) Kolasiba a awm lai khan Pi Lalsangzuali Sailo chu an chènna inah an an han lènchilh dûn nghe nghe a ni.

He hla “Min hmangaihna” tih leh,
A hla phuah pakhat “Pa thu tiam” tih chu Pi Lalsangzuali Sailo hnenah chuan sak sak turin a ngen ve ta tawp a. Ani chuan, “Ka hla nen a thlûk hi a in zûl em a, ka sa châk lo, i hla pakhat zawk erawh hi chu ṭha ka ti khawp mai,” a lo ti a. Mahse chu pawh chu a sak sak ta chuang lo va. Chuta ṭang chuan tuma hnenah ngenna pawh a siam zui ta lo.

Good Friday a lo hnaih tawh hi chuan a phuahtu rilruah chuan a lo thar ve leh ṭhin a, mihring nupaa insiam tawh pawh kan inṭhen leh pheng phung ṭhin te hi pawi tiin, Lal Isua erawh chuan –

Hmangaih chungin a la nghâk reng che,
Engchen nge i la bo san dawn?
I sual chung pawh hian a ko reng che,
Chathuan thihna chu tlân san rawh… tiin sual thihna chu tlan san turin mi a la sawm reng mai a ni.

Good Friday leh day lovah pawh a sa duh tân, mi mal leh zaipawl ten phalna hran dil ngai lovin sak a phal reng e.

Leave a Reply

Your email address will not be published. Required fields are marked *

error: Content is protected !!