Amah angin kan tholeh ang – Upa K. Zalawma – Mizo sermon

Adamaah chuan mi zawng zawng an thi ṭhin ang hian, Kristaah chuan mi zawng zawng tihnunin an awm bawk ang. Nimahsela, mahni hun ṭheuh zĕlah; Krista chu thawh hmahruaitu a ni a; chumi hnua a lo kal lehnaah chuan Krista tate chu. _(For Adam all die, so in Christ all will be made alive. But each in turn: Christ, the first fruits; then, when he comes, those who belong to him.) I Kor. 15: 22,23.

Tin, chûng thu chu an sawi laiin amah ngei chu an zîngah a lo ding a, an hnênah, “In chungah thlamuanna awm rawh se,” a ti a. Nimahsela, râpthlâk an ti êm êm a, an hlau va, thlarau hmu-ah an inruat a. Tin, ani chuan an hnênah, “Engati nge in mangan? Engah nge in rilruah rinhlelhna a lo awm? Ka kutte, ka kephahte hi en rawh u, hei keimah ngei kha ka nih hi! Mi dek ula, en rawh u; mi hmuh ang hian thlarauvin tisa leh ruh a nei lo ve,” a ti a. Tin, chu chu a sawi zawhin a kutte, a kephahte chu an hnênah a entîr a. Tin, an lâwm luattuk avânga an la awih loh cheuva mak an tih chhûngin an hnênah, “Hetah englo ei tûr in nei em?” a ti a. Tin, sangha rawh hrang khat an pe a. Tin, a la a, an hmaah chuan a ei ta a.
Luka 24:36‭-‬43.

Mi zawng zawng kan tho leh dawn:
Mi ṭhenkhat chuan Isua anga kan thawh leh hi an ring pha vak lo. Kan thih hian kan taksa chu leia ṭawih ral a, kan thlarau chu a kalna tur lam lama kal nghalin an ngai mai a, mitthi thawh lehna hi awmin an ring pha lo.
(Thawhlehna thurin hi Kohhran Pawl hrang hrangte rin dân pawh a inthuhmun lo. Hetah hi chuan Presbyterian Kohhrante rin dân aṭangin kan sawi dawn a ni.)
Biblea kan hmuh angin, mitthite chu ṭawih thei lova kaithawha an awm tur thu kan hmu a ni (I Kor. 15:52).

Johana 5:29-ah chuan, “..Thil ṭha titute chu nunna changin an tho leh ang a, thil sual titute chu thiam loh changin an tho leh ang,” tih kan hmu bawk.

Isua – thawhlehna hmahruaitu:
Isua chu thihna hnehin thlân ata Pathianin a kaithawh leh avangin, a ringtute tân chuan thawh hmahruitu (first fruits) a ni.
Adamaah chuan mi zawng zawng kan thi ang bawkin, Krisaahchuan mi zawng zawng tihnuna an awn tur thu kan chângthlanah hian kan hmu a, he lai thu hi mitin huap ni mahse, a ring duh lotute chuan thihna an chang dawn tih Bibleina sawi tho bawk a ni.

Mahni hun ṭheuh zĕlah:
Isua kan thawh hmahruaitu hi a ringtuin kan rin hun zĕlah khan kan tân thawh hmahruaitu a lo ni zĕl mai a ni hi.

A lo kal lehnaah… Krista tate chu:
Krista kha a thawh leh tawh avanginringtu tan thawhlehna hma a lo hruai tawh a, he khawvelah a lo kal lehna (second coming)-ah chuan amah ringtu/ama tate (those who belong to him) chu Isua thawh leh angin taksa ngeiin kan tho leh dawn a ni.

Thlarauvin ruh leh tisa a nei lo; Isua erawh chuan a nei:
Tho leh Isua kha a zirrirte hnena a inlar khan, thlahrâng emaw an ti a, an lo hlau nasa mai a. Isua chuan, “In chungah thlamuanna awm rawh se,” an ti te te a. A niin ruh leh tisa a neih ang khan thlarau (thlahrâng) chuan a nei ve lo ve. Min dek ula, min khawih ula, thlarau ka nih lohzia hi in hre mai ang a ti a, an la awih theih meuh loh avangin sangha hem hmin sa chu an hmuh lai ngeiin a ei ta a ni.

Tho leh taksa chu a ropuiin a danglam dawn:
Kha tho leh Isua taksa kha tho leh taksa a nih tawh avangin engmahin a dang thei lo va, hun leh hmunin a tikhawtlai tawh lo va, lei lam mamawhin a tibuai tawh hek lo. A duhna hmun hmunah chawp leh chilhin a inlar a, a bo leh mai thei si a, van taksa a pu tlat tawh a ni. A ropuiin a danglam tawh thung a ni.

Ringtute chu tho leh Isua ang hian van taksa puin kaihthawh kan la ni ve dawn a, he kan taksa tlâwm tak hi ama taksa ropui angin a la siam ṭha (transform) dawn a ni (Phil 3:21).

Kan thu khar nan Kohhran thurinin thawhlehna thu Bible zirtirna aṭanga a sawi dan hi i lo en ang u.

1. “Ni hnuhnungah chuan nungdama la awmte chu an thi lo vang a, amaherawh chu tihdanglam an ni ang. Mitthi zawng zawngte chu taksa dang ni lo, mahni taksa pangngai ngai ngei, nihphung danglam erawh puin kaihthawhin an awm ang a, chu tho leh taksa chu an thlarau nen a inzawm kumkhua tawh ang,” (Westminster Thurin bung 32:2.)

2. “Nikinniah chuan mitthi zawng zawng, mi fel leh fel lote pawh, kaihthawh an ni ang a; thi lova nung dama awmte chu tihdanglam an ni ang. Taksa phuma awm tawh, vaivuta chang tawh leh leilung nena inchawhpawlh tawhte chu eng anga tam pawh ni se, a mal malin, kim takin an zavaiin kaihthawhin an awm ang. Pathian Fapa thiltihtheihna leh a aw riin thil ṭha titute leh thil sual titute chu koh chuah an ni ang a, thlaraute chuan anmahni taksa ṭheuh an zawm leh vek dawn a ni. Vuta chang tawh taksa chu a ngai angin kaihthawh a ni ang a, a siam hmang leh nihphung erawh a dang tawh ang. He thutak hi Pathian lehkha thua hriattirna chiang tak leh Thuthlung Hlui leh Thara mitthi kaihthawh lehte chanchin chuan a nemnghet a ni…” (Welsh thurin bung 42.)

3. “Ni hnuhnungah chuan mitthite chu kaihthawhin an awm ang a, mi zawng zawng Krista rorelna hmaah an lang ang a, he dam chhunga an thiltih ṭhat leh ṭhat loh ang zĕlin rĕl sak an ni ang. Ringlote leh misualte chuan thiam loh changin an sual hremna an tuar ang; Krista ring a, a thu zâwmtute erawhchu a langchanga thiam chantirin an awm ang a, ropuinaa lawm luhin an awm ang.” (PCI Thurin no 10.)

Kan ropuina tûr engang nge,
A la lang rih lo ve;
Lalpa ropui ang zual zĕlin,
Amah kan ang tawh ang.

Amah angin kan tho leh ang Lalpan chu fakin awm rawhse. Amen.

Leave a Reply

Your email address will not be published. Required fields are marked *

error: Content is protected !!