A ni maw

K. Zalawma

Ngaihtuah hmun khatin awm tawn ṭheuh rawh u. Inngaihtuah sâng lutuk suh ula, mi tête pâwl zâwk rawh u. Intifing suh u. Rom 12:16.
Kherkhiap lutuk suh la, intifing lutuk hek suh; engah nge mahni i intihchhiat ang? Thuhriltu 7:16.

Pathianin mi hringte hi awmho turin min siam a, kan finna leh hriatnate hmang tlâng tur leh mi dang hriatna te pawmpui thei turin min duh tih kan chângthlan aṭang hian a hriat theih awm e.

Intifing:
Mizo ṭawngah ‘inti’ tih hi prefix-a a awm tawh chuan mahni a bera in ngaihna lam a kawk ṭhin. Thuhriltuin intifing a tih hi Paulan ‘inngaihtuah sâng lutuk’ a tih nĕn hian a inzăwn viau awm e.

Keimahni ang bawk hian mi dang pawhin hriatna leh ngaihdân an nei ve ṭheuh tih hriat a ṭha. Mi dang aia hria nia kan inhriat tlat chinah chuan ‘intifing’ nih kan hlawh fo va, miin min ngaisâng lo ru riau tawh ṭhin. Mi thil sawite hi kan hriat tawh hnu pawh ni se, ‘ani maw’ tiin pawmpui mai thei ila, miin min lâwm ang.

Kherkhiap lutuk suh:
Kherkhiap tih hian ‘chimlim, ti kher kher, duhtui lutuk’ tihte pawh a keng tel awm e.

(Ka inhlawhna pakhatah chuan inhlawhfate thawk rei duh an awm lo. Hna thawh zawh hmâa bàn san an awm zut a, an rawih tawh hnu thawk leh duh lo an awm thluah mai. An kherkhiap nupa lah tak a!)

Bible chuan kherkhiap lutuk leh intihfin lutuk chu mahni in tihchhiatna zàkhua mai a ni a ti si a. Mi dang ngaih dân leh leh nihna pawmpui thei mi nih hi mi ṭha nihna a ni a, ‘a ni naw’ ti thei mi nih hi ringtu leh rawngbawltu nihna tur a lo ni.

Mi tĕte pâwl zâwk rawh u:
Tunlai Bible lehlinna pakhatah chuan, …be willing associate with people of low pisition(NIV) a ti.
Mahni level-te pâwl leh kawm hi khawvel dân a ni. Pathian thu erawh chuan, ‘mi tlawm zawk leh dinhmun hnuaihnung zawkte pâwl zawk turin min ti si a nih hi! Mahni aia mâwl zawkte thu leh hla ‘a ni maw’ tia pawmpui thei mihring hi Lalpa mi nihna pakhat a nih chu.

Ram rorĕlnaah te, pawl rorĕlnaah te, ṭhian zaho thil tihnaah te, hlawhfa leh a ruaitu inkar chenin dinhmun hniam zawkte pâwl thiama an ngaihdân pawmsak thei mi chu mi ropui an ni.

Kohhran rorĕlna hmunah hlei hlei hian heng kan sawi tâkte hi a pawimawh. Committee neih nikhuaah pawh ṭha leh dik nia kan hriat chu kan sawi tlâng ang a, mahni ngaih dân tih thlûk tuma mi dang ngaih dân pawm hleithei lo mi nih erawh chu hruaitu tling lo nihna a ni ang. “A ni maw” ti thei nih hi a va pawimawh em!

Committee-in Pathian râwn chunga a rĕl thlûk tawh lo pawm hlei thei lo Kohhran member zingah kan awm fo ṭhin. Hotute thu rĕl ‘a ni maw’ lo ti thei te hi mi ṭha an ni a; a rĕltuin kan rĕl fuh loh deuh châng a awm pawhin rèl ṭhat leh mai hreh loh a ṭha.

“Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se.” Philippi 2:3

Leave a Reply

Your email address will not be published. Required fields are marked *

error: Content is protected !!