A BU NGEI KEU RAWH

Lalṭanpuia Ngente

Tunlai hian social media aṭang chauha thlarau lam pur chawk tum, Bible keu peih hlawl lo tam tak an awm tawh awm e. ‘Pathian thu ka ngaihven, ka tuipui’ tia whatsapp leh facebook vel aṭang chauha inhnangfak tum chuan thlarau nun chawmna tak tak dawn a har. Chuvangin, Pathian thu group ah chauh lutin Pathian thu chauh sawiin chhiar ṭhin mah la, fb leh whatsapp-ah i hunawl zawng zawng hmang ral suh, i sawi anga, i chhiar anga, i mit a kham urh anga, i kawng, i dar, i ban a kham ut ut anga, i lu a na bur anga, chu zawng chu i hlawh chu a ni mai.

Thlarau pawlna thar dawng tur leh thlarau nun chawmna tak tak hmu tur chuan ṭawngṭai leh Bible chhiara Lalpa pawl tam rawh. Fb leh Whatsapp vel ringawta inhnangfak i tum chuan Pathian thu buaipui viau siin i ro tulh tulh anga, i thatchhe tulh tulh anga, i thiangzau tulh tulh anga, i inhmu ṭha tulh tulh anga, belhchian i dawl lo tulh tulh anga, i vengte ngaihsan i hlawh lo tulh tulh anga, i phunchiar hle bawk ang a, Pathian thua puih ngai ten an ko ngai lo bawk che ang a, chu zawng chu i thlen chin tur chu a ni mai.

Chuvangin, mi thuziak copy ringawt lova nangmah ngeiin Whatsapp leh fb group-a share tur thlarau pawlna thar i dawn reng theih nan Lalpa pawlna hun insiam tam rawh. Ringtute mamawh lian ber chu Bible chhiar leh ṭawngṭai tam a ni. Hemi thlahthlam reng reng thlarau nun puitling a awm theih ngai loh. Bible ngei keu la, a chhunga Pathian aw hi chhiar ṭhin la, tichuan i thlarau tana chawtak chu i hmu dawn nia.

Leave a Reply

Your email address will not be published. Required fields are marked *

error: Content is protected !!